*ພາກອຸດສາຫະກໍາທ່ອງທ່ຽວລາວມີບັນຍາກາດຄຶກຄັກເປັນພິເສດ ພາຍຫລັງ ສປປ ລາວ ປະກາດຍົກເວັ້ນວີຊາທ່ອງທ່ຽວໃຫ້ຫລາຍປະເທດ ຂະນະທີ່ນັກທ່ອງທ່ຽວຈາກປະເທດໄທ, ສປ ຈີນ, ຫວຽດນາມ,  ເອີຣົບ, ເກົາຫລີ ຕິດອັນດັບດັບຕົ້ນໆເຂົ້າມາທ່ອງທ່ຽວລາວ, ຄາດວ່າໝົດປີ 2024 ລາວຈະສາມາດດຶງດູດນັກທ່ອງທ່ຽວຕ່າງປະເທດໄດ້ຢ່າງໜ້ອຍ 3-4 ຄົນ.

    ຫລ້າສຸດເວັບໄຊ (Travel - Daily News)ໄດ້ລາຍງານອີງຕາມການສໍາຫລວດຕົວຈິງຂອງຕົວເລກນັກທ່ອງທ່ຽວເຂົ້າມາລາວວ່າ:  ປະເທດລາວຍັງເປັນຈຸດໝາຍປາຍທາງການທ່ອງທ່ຽວຍອດນິຍົມ ຍ້ອນວ່າມີນັກທ່ອງທ່ຽວຈໍານວນຫລວງຫລາຍເຄີຍເດີນທາງເຂ້ົາລາວແລ້ວໄລຍະຜ່ານມາ ແລະ ມີການເດີນທາງເຂົ້າມາທ່ອງທ່ຽວ ສປປ ລາວ ອີກຊໍ້າກັນຫລາຍເທ່ືອ ໃນນັ້ນ ແມ່ນນັກທ່ອງທ່ຽວໄທ,  ຈີນ, ຍີ່ປຸ່ນ, ຫວຽດນາມ ແລະ ຊາດ ອື່ນໆ  ເຊິ່ງສັນຍານດັ່ງກ່າວສະແດງໃຫ້ເຫັນ
ວ່າ: ແຫລ່ງທ່ອງທ່ຽວໃນປະເທດຍັງເປັນບ່ອນທີ່ສົນໃຈ  ແລະ ໃຫ້ຄວາມນິຍົມບໍ່ໜ້ອຍກວ່າຊາດອື່ນ.  

    ໂດຍສະຖິຕິຈາກຜົນສໍາຫລວດນັ້ນໄດ້ອ້າງອີງວ່າ: ກຸ່ມນັກທ່ອງທ່ຽວຕອບສ່ວນໃຫຍ່ທີ່ສຸດຢາກກັບມາທ່ຽວລາວຄື:  32% ເພື່ອການຜະຈົນໄພເປັນຈຸດປະສົງຫລັກສໍາລັບການເດີນທາງ, 23% ແມ່ນເດີນທາງເພື່ອໄປຊິມອາຫານ, 20% ມັກດ້ານສິລະປະ, ວັດທະນະທໍາ, ວິຖີຊີວິດຂອງຄົນລາວ. ລົດໄຟລາວ-ຈີນ; ພາກໃຕ້ລາວເຊັ່ນ:  ຫລີຜີຄອນພະເພັງ, ຕາດຟານ,  ຕາດມຶດ, ຕາດເຍືອງ, ສວນກາເຟໃນເມືອງປາກຊ່ອງ ແຂວງຈໍາປາສັກ;  ເມືອງວັງວຽງ, ເມືອງເຟືອງແຂວງ ວຽງຈັນ ແລະ ນະຄອນຫລວງວຽງຈັນ. ຫວ່າງບໍ່ດົນມານີ້, ລັດຖະບານລາວໄດ້ປະກາດຍົກເວັ້ນວີຊາໃຫ້ນັກທ່ອງທ່ຽວຈາກຫລາຍປະເທດ ເພື່ອສົ່ງເສີມການທ່ອງທ່ຽວລາວ ພ້ອມທັງຍົກລະດັບການຮ່ວມມືກັບປະເທດເພື່ອນມິດໄກ້ຄຽງ ແລະ ວົງ ຄະນະຍາດສາກົນໃຫ້ມີໃບໜ້າໃໝ່ອີກດ້ວຍ ໃນນັ້ນມີ ສປ ຈີນ, ບັນດາ 10 ປະເທດສະມາຊິກອາຊຽນ ແລະ ບາງປະເທດເພື່ອນມິດສາກົນ.

     ອີງຕາມທະນາຄານໂລກ ແລະ ທະນາຄານພັດທະນາອາຊີໄດ້ລາຍງານ ເມື່ອບໍ່ດົນມານີ້ວ່າພາກອຸດສາຫະກໍາທ່ອງທ່ຽວຈະຊ່ວຍເຮັດ ໃຫ້ເສດຖະກິດໂລກຄ່ອຍໆຟື້ນຕົວຂຶ້ນຕາມລໍາດັບໜຶ່ງໃນນັ້ນ ສປປ ລາວ ແມ່ນໜຶ່ງໃນບັນດາ 10 ປະເທດສະມາຊິກອາຊຽນ ທີ່ບໍ່ມີຊາຍແດນດ້ານໃດຕິດຈອດກັບທະເລ ແຕ່ມີເສ້ັນທາງລົດໄຟລາວ-ຈີນ ນ້ັນຄືໂອກາດສໍາຄັນຈະປ່ຽນໃບໜ້າ ແລະ ສະຖານະຂອງລາວເປັນປະເທດເຊື່ອມໂຍງເຊື່ອມຈອດກັບພາກພື້ນ- ສາກົນ ແລະ ປະເທດອື່ນໆໃນໂລກ ເຊິ່ງນັ້ນໝາຍວ່າຜ່ານມາລາວໄດ້ພົບພໍ້ ແລະ ຜະເຊີນໜ້າກັບການແພ່ລະບາດພະຍາດໂຄວິດ-19 ອັນໄດ້ ເຮັດໃຫ້ກະທົບຕໍ່ສະພາບລວມຂອງປະເທດຫຍຸ້ງຍາກ ມາຮອດປີ 2022  ພະຍາດດັ່ງກ່າວໄດ້ຈາງຫາຍໄປ  ແລະ ເປີດປະເທດຢ່າງທາງການຈະຊ່ວຍເຮັດໃຫ້ ສປປ ລາວ ໄດ້ຮັບໂອກາດໃໝ່ໆ ແລະ ມີສ່ິງທ້າທາຍແຕກຕ່າງກັນດີຂຶ້ນເປັນກ້າວໆ ໂດຍສະເພາະການບໍລິການທ່ອງທ່ຽວ ຕິດພັນກັບເສັ້ນທາງລົດໄຟລາວ-ຈີນຈະເຮັດໃຫ້ເສດຖະກິດຂອງລາວ ຄ່ອຍໆດີຂຶ້ນຢ່າງ ໜ້າສົນໃຈ.

    ດັ່ງທ່ີ ຮູ້ນໍາກັນ, ເສັ້ນທາງລົດໄຟລາວ- ຈີນ ເປັນສ່ວນໜຶ່ງຂອງເສັ້ນທາງສາກົນ ແລະ ເປັນປະຕູອາຊຽນທີ່ມີປະຊາກອນລວມກັນທັງໝົດ 600 ລ້ານຄົນ ເຊິ່ງຈະກາຍເປັນໂອກາດປະກອບສ່ວນເຂົ້າໃນການພັດທະນາເສດຖະກິດສັງຄົມ, ການແກ້ໄຂຄວາມທຸກຍາກ, ການສ້າງວຽກເຮັດງານທໍາ, ການຍົກລະດັບຊີວິດການເປັນຢູ່ດີຂຶ້ນລະຫວ່າງອາຊຽນ,  ສປ ຈີນ ແລະ ບັນດາຂົງເຂດອື່ນໆ.  ຫລ້າສຸດໃນວັນທີ 26 ມິຖຸນານີ້,  ກະຊວງ ຖວທ ແຫ່ງ ສປປລາວ ໄດ້ເຊັນເອກະສານເລກທີ 29 ກ່ຽວກັບ  “ລາຍລະອຽດໃນການປະຕິບັດນະໂຍບາຍວີຊາຕໍ່ນັກທ່ອງທ່ຽວຈີນ ສະເພາະໃນປີທ່ອງທ່ຽວລາວ 2024 ”ໂດຍລະບຸວ່າ: ນັກທ່ອງທ່ຽວຈີນ ຜູ້ຖືພາສປອດທຳມະດາສາມາດເຂົ້າໄປທ່ຽວປະເທດລາວ 15 ວັນ ແບບຍົກເວັ້ນວີຊາ ໂດຍຜ່ານການຈັດຕັ້ງຂອງບໍລິສັດທ່ອງທ່ຽວ ເຊ່ິງຈະປະຕິບັດແຕ່ວັນທີ 1 ກໍລະກົດ ຫາວັນທີ 31 ທັນວາ ປີ 2024. ການປະກາດຍົກເວັ້ນວີຊາໃຫ້ນັກທ່ອງທ່ຽວຈີນ ຄັ້ງນີ້ບໍ່ພຽງເອື້ອອໍານວຍຄວາມສະດວກສະບາຍໃຫ້ນັກທ່ອງທ່ຽວເທົ່ານັ້ນ ຫາກຍັງເປັນການຊຸກຍູ້ສົ່ງເສີມ ການພັດທະນາເສດຖະກິດ-ສັງຄົມ, ການສ້າງວຽກເຮັດງານທໍາ, ດຶງດູດເງິນຕາຕ່າງປະເທດ, ການສ້າງຄວາມເຊື່ອໝັ້ນຢ່າງໜັກແໜ້ນລະຫວ່າງສອງປະເທດ.

    ໃນປີ 2018- 2019 ມີນັກທ່ອງທ່ຽວເຂົ້າມາຢ້ຽມຢາມລາວ ເກືອບ 5 ລ້ານຄົນ ໃນນັ້ນມີນັກທ່ອງທ່ຽວຈີນ ເຖິງ 1 ລ້ານຄົນ, ສ້າງໄດ້ຮັບລວມເກືອບ 700 ລ້ານໂດລາ. ສະເພາະປີ 2024 ນີ້ ສປປ ລາວ ໄດ້ເປີດປີທ່ອງທ່ຽວຄາດວ່າຈະມີນັກ ທ່ອງທ່ຽວເຂົ້າມາຢ້ຽມຢາມ ລາວ ຢ່າງໜ້ອຍ 3 ລ້ານຄົນ ແລະ ສ້າງລາຍຮັບເຂົ້າປະເທດປະມານ 3-4 ລ້ານໂດລາ.

ໂດຍ:ເກີດຂວັນໃຈ ມາລີຈັນສີ

KPL