*ກອງປະຊຸມສໍາມະນາວິທະຍາສາດກ່ຽວກັບຮ່າງບົດຜັນຂະຫຍາຍມະຕິກົມການເມືອງສູນກາງພັກ ເລກທີ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ (ສອຈ) ຂອງຂະແໜງການເງິນ, ການທົບທວນ, ປະເມີນຍຸດທະສາດ ພັດທະນາການເງິນແຫ່ງລັດຮອດ ປີ 2025 ແລະ ການສ້າງຮ່າງຍຸດທະສາດພັດທະນາການເງິນແຫ່ງລັດໃນຕໍ່ໜ້າ ແລະ ຮ່າງແຜນພັດທະນາການເງິນແຫ່ງລັດ 5 ປີ (2026-2030). ກອງປະຊຸມຈັດຂຶ້ນເມື່ອມໍ່ໆນີ້ທີ່ໂຮງແຮມຈໍາປາສັກແກຣນ ນະຄອນປາກເຊ ແຂວງຈໍາປາສັກ ໃຫ້ກຽດເປັນປະທານຂອງທ່ານ ພູວົງ ກິດຕະວົງ ຮອງລັດຖະມົນຕີກະຊວງການເງິນ, ມີຫົວໜ້າກົມ, ຮອງຫົວໜ້າກົມ, ພະນັກງານຈາກກະຊວງການເງິນ, ຫົວໜ້າ, ຮອງຫົວໜ້າຫ້ອງວ່າການແຂວງ, ຄະນະພະແນກການເງິນແຂວງ, ພະແນກ ແຜນການ ແລະ ການລົງທຶນແຂວງ, ພະແນກສາທາລະນະແຂວງ, ພະແນກສຶກສາ ແລະ ກິລາແຂວງ, ພະແນກອຸດສາຫະກຳ ແລະ ການຄ້າແຂວງ, ພະແນກໂຍທາທິການ ແລະ ຂົນສົ່ງແຂວງ, ພ້ອມດ້ວຍພະນັກງານວິຊາການຈາກພະແນກການຂອງ 6 ແຂວງເຂົ້າຮ່ວມ ຄື: ແຂວງຄໍາມ່ວນ, ສະຫວັນນະເຂດ, ຈໍາປາສັກ, ສາລະວັນ, ເຊກອງ ແລະ ແຂວງອັດຕະປື.

    ໂອກາດເຂົ້າຮ່ວມເປັນປະທານກອງປະຊຸມທ່ານ ພູວົງ ກິດຕະວົງ ຮອງລັດຖະມົນຕີກະຊວງການເງິນ ໄດ້ມີຄໍາເຫັນກ່າວເປີດໂດຍຍົກໃຫ້ເຫັນກອງປະຊຸມໃນຄັ້ງນີ້ ເປັນກອງປະຊຸມໜຶ່ງທີ່ສໍາຄັນຫລາຍຂອງກະຊວງການເງິນ ກໍຄືຂອງທົ່ວຂະແໜງການເງິນ ເນື່ອງ ຈາກວ່າວຽກງານການເງິນ-ງົບປະມານແຫ່ງລັດ ແມ່ນພົວພັນທັງໝົດກັບທຸກຂະແໜງການນັບແຕ່ຂັ້ນສູນກາງຈົນຮອດຂັ້ນທ້ອງຖິ່ນ ໂດຍສະເພາະການມີສ່ວນຮ່ວມໃນວຽກງານການເກັບລາຍຮັບ ແລະ ການຄຸ້ມຄອງລາຍຈ່າຍງົບປະມານ ກໍຄືການຈັດຕັ້ງປະຕິບັດ ແຜນງົບປະມານແຫ່ງລັດ ໃນແຕ່ລະປີໃຫ້ມີປະສິດທິຜົນສູງສຸດ ແລະ ກອງປະຊຸມຄັ້ງນີ້ ແມ່ນຈະໄດ້ພ້ອມກັນຄົ້ນຄ້ວາປຶກສາຫາລື ແລກປ່ຽນຄໍາເຫັນຢ່າງກົງໄປກົງມາດ້ວຍຄວາມຮັບຜິດຊອບສູງ ແລະ ມີວິທະຍາສາດຕໍ່ກັບ 3 ຮ່າງເອກະສານບົນພື້ນຖານວຽກງານ ທີ່ຕິດພັນກັບແຕ່ລະຂະແໜງການ ແລະ ທ້ອງຖິ່ນ ຈຶ່ງຮຽກຮ້ອງມາຍັງບັນດາທ່ານເອົາໃຈໃສ່ມີຄໍາເຫັນ, ປະກອບເນື້ອໃນ ແລະ ແລກປ່ຽນທັດສະນະເຂົ້າໃສ່ບັນດາຮ່າງເອກະສານຢ່າງມີຈຸດສຸມ ໂດຍສະເພາະເນັ້ນໃສ່ເນື້ອໃນທີ່ໄດ້ຜັນຂະຫຍາຍມະຕິ 04/ກມສພ ແລະ ມະຕິ 05/ລບ ໃນວຽກງານສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່; ສຸມໃສ່ວຽກງານຄຸ້ມຄອງລາຍຮັບ, ຄຸ້ມຄອງລາຍຈ່າຍ, ການຄຸ້ມຄອງລັດວິສາຫະກິດ, ວຽກງານຄຸ້ມຄອງໜີ້ສິນສາທາລະນະ, ວຽກພັດທະນາການເງິນເປັນທັນສະໄໝ ແລະ ວຽກອື່ນໆ, ພ້ອມທັງສຸມໃສ່ຄົ້ນຄວ້າຮ່ວມກັນກ່ຽວກັບແນວຄວາມຄິດໃນການວາງວິໄສທັດ ແລະ ຍຸດທະສາດພັດທະນາການເງິນແຫ່ງລັດໃນຕໍ່ໜ້າ ໂດຍສະເພາະການກໍານົດທິດທາງລວມ, ຄາດໝາຍມະຫາພາກ ແລະ ວຽກງານຈຸດສຸມໃນແຕ່ລະດ້ານ ໃຫ້ມີຄວາມຊັດ ເຈນ, ພາວະວິໄສ ແລະ ສອດຄ່ອງກັບທິດທາງການພັດທະນາແບບຍືນຍົງ.

    ພ້ອມນີ້ກອງປະຊຸມຍັງໄດ້ຮັບຟັງການລາຍງານຫຍ້ໍໃນບາງວຽກງານເປັນຕົ້ນ: ແຜນພັດທະນາການເງິນແຫ່ງລັດ 5 ປີ ໃນວຽກງານງົບປະມານແຫ່ງລັດ,  ແຜນພັດທະນາຂະແໜງການເງິນໃນວຽກງານການຄຸ້ມຄອງການບັນຊີ, ພິເສດຈະໄດ້ແລກປ່ຽນບາງບົດຮຽນທີ່ຖອດຖອນໄດ້ໃນການຄຸ້ມຄອງການເງິນ-ງົບປະມານແຫ່ງລັດໃນໄລຍະປີ 2021-2025 ແລະ ທິດທາງແຜນພັດທະນາການຄຸ້ມຄອງການເງິນພາກລັດຢູ່ຂັ້ນທ້ອງຖິ່ນຂອງພະແນກການເງິນແຂວງ ຈຳປາສັກ.

ບົດ-ພາບໂດຍ: ຈັນທະວີສັກ

KPL