ປ່າໄມ້ແປກມໍລະດົກຕົກທອດນັບຫລາຍຮ້ອຍປີເຊື່ອງຊ້ອນຢູ່ເທິງຈອມພູເຂົາຄວາຍ ກາຍເປັນແຫລ່ງທ່ອງທ່ຽວອັນມະຫັດສະຈັນກັບຕໍານານນິທານປິດສະໜາ ເປັນຮ່ອງຮອຍປະຫວັດສາດຍາວນານບົ່ງບອກຮາກເຫງົາມະນຸດດໍາລົງຊີວິດຢູ່ທີ່ນັ້ນຈະເປັຄວາມຈິງ ຫລື ບໍ່?

            ມື້ນີ້ຜູ້ຂຽນຈະພາທ່ານໄປທ່ຽວຊົມ “ຜາຈ້ອງ” ຕັ້ງຢູ່ສາຍພູເຂົາຄວາຍ ຫລັງວັດປ່າພຣະເທບທັມພະວົງ ຫລື ວັດຫລວງປູ່ ສຸວັນຄໍາ, ບ້ານຊຽງແລທ່າ, ເມືອງປາກງື່ມ, ນະຄອນຫລວງວຽງຈັນ. ຖ້າຂັບລົດ ຫລື ນັ່ງລົດເດີນທາງໄປໃຊ້ເວລາພຽງແຕ່ 2 ຊົ່ວໂມງ, ມີໄລຍະທາງ 84 ກິໂລແມັດ ຈາກນະຄອນຫລວງວຽງຈັນ ໄປຕາມທາງ 13 ໃຕ້, ສະພາບເສັ້ນທາງຫາວັດແມ່ນທາງປູຢາງ ລົດທຸກປະເພດສາມາດໄປໄດ້.

            ເມື່ອຮອດວັດແລ້ວກໍຍ່າງຂຶ້ນໄປຕໍ່ລັກສະນະທາງຂຶ້ນກໍຈະຊັນແດ່, ການເດີນທາງຈະຍ່າງເລາະໄປຕາມຮ່ອງຮອຍຂອງຊາວບ້ານເຂົ້າປ່າ, ລະຫວ່າງທາງຈະເຫັນຄູບາເພິ່ນໄດ້ເອົາຜ້າເຫລືອງມັດໝາຍໄວ້ເປັນໄລຍະ (ກັນຫລົງທາງ) ໂດຍໃຊ້ເວລາຂຶ້ນປະມານ 4-5 ຊົວໂມງ, ໄປກັບປະມານ 8-9 ຊົວໂມງ (ບໍ່ແນະນໍາໃຫ້ຂຶ້ນເອງ ຕ້ອງມີຄົນທ້ອງຖິ່ນ ຫລື ຄູບາພາຂຶ້ນ, ທີ່ສໍາຄັນຕ້ອງແຂງແຮງພໍສົມຄວນຈຶ່ງຈະຂຶ້ນຮອດ).

            ຄືຮູ້ ແລະ ໄດ້ຍິນນໍາກັນຈາກການບອກເລົ່າ “ຜາຈ້ອງ” ເປັນໜ້າຜາສັກສິດແຫ່ງສາຍພູເຂົາຄວາຍທີ່ຄູບາອາຈານ ຫລາຍອົງຈາກທົ່ວທຸກທິດຖືເປັນຈຸດໝາຍປາຍທາງໃນການອອກທຸດົງ, ບໍາເພັນ ແລະ ພາວະນາ. ຢູ່ເທິງຜາຈ້ອງ ຈະເປັນປ່າໄມ້ແປກ, ມີໜ້າຜາທີ່ສາມາດເຫັນທິວທັດແມ່ນໍ້າຂອງຝັ່ງລາວໄທ, ທິວທັດແມ່ນໍ້າງື່ມຕັດໃສ່ນໍ້າຂອງ, ມີຫິນຕັ້ງຢູ່ແຄມໜ້າຜາ ທີ່ຄູບາເພິ່ນຖືເປັນເຈດີສັກກາລະບູຊາ ແລະ ບໍ່ໄກຈາກໜ້າຜາ ມີຮອຍພຣະບາດ.

            ຜາຈ້ອງນອນໃນເຂດອຸທະຍານແຫ່ງຊາດ ພູເຂົາຄວາຍ ເປັນອີກໜຶ່ງຈຸດຊົມທິວທັດທີ່ກໍາລັງລໍຖ້າທ່ານເຂົ້າໄປຄົ້ນຫາ ຄວາມງົດງາມທີ່ທໍາມະຊາດສ້າງຂຶ້ນເອງ. ຂໍ້ແນະນໍາຖ້າທ່ານຕ້ອງການຢາກຂຶ້ນໄປຊົມທິວທັດຢູ່ຜາຈ້ອງ ແມ່ນຂຶ້ນໄດ້ສະເພາະໃນລະດູແລ້ງຈະດີກວ່າ.

            ຈຸດເດັ່ນຂອງຜ້າຈ້ອງມີຄື: ເບິ່ງຕາເວັນຂຶ້ນ ແລະ ຕາເວັນຕົກດິນສວຍງາມຫລາຍ, ໄປສໍາພັດໝອກ ແລະ ອາກາດເຢັນ, ໄປຕັ້ງເຕັ້ນນອນຢູ່ພະລານຫີນ, ໄປນະມັດສະການບູຊາ ພະພຸດທະຮູບຫລວງປູ ພຸດທະບາຣະມີຕັ້ງສູງເດັ່ນ ເປັນສະຫງ່າເທິງໂງ່ນຫີນ, ໄປເບິ່ງຮອຍພະບາດ, ໄປເບິ່ງທິວທັດ ແລະ ແສງສີຂອງນະຄອນຫລວງວຽງຈັນ ໃນຍາມຄໍາຄືນ, ໄປຟັງສຽງນົກ ສຽງແມງໄມ້ຮ້ອງມ່ວນຫູ, ໄປເລາະຊົມ ປ່າໂຄກແລະ ພະລານຫີນໃຫຍ່ ຮູບຊົງຫລາຍແບບ ແປກຕາ, ໄປນັ່ງສະມາທິສະຫງົບສະຕິອາລົມ.

            ໂດຍ: ເກີດຂວັນໃຈ ມາລີຈັນສີ

KPL