ຖ້າເອີຍເຖິງແຂວງໄຊຍະບູລີ ອາດເຮັດໃຫ້ຫລາຍທ່ານນຶກເຖິງຄວາມຊົງຈໍາດີໆທີ່ເຄີຍໄດ້ໄປທ່ອງທ່ຽວ ແລະ ສໍາຜັດບັນຍາກາດ ສະຫລອງບຸນຊ້າງນັ້ນເອງ ແຕ່ທ່ານຮູ້ບໍວ່າແຂວງໄຊຍະບູລີບໍ່ພຽງຂຶ້ນຊື່ເລື່ອງຊ້າງເທົ່ານັ້ນ ຫາກຍັງບອກເຖິງຄວາມອຸດົມສົມບູນຂອງທໍາມະຊາດທີ່ເຊື່ອງຊ້ອນນໍ້າຕົກຕາດທີ່ສວຍງາມບໍ່ໜ້ອຍກວ່າແຂວງອື່ນໆ.

ໃນລາວທີ່ພວມປະກົດເຫັນຜ່ານສື່ສັງຄົມອອນລາຍທີ່ມີຜູ້ຄົນ ແລະ ນັກທ່ອງທ່ຽວໄປແວ່ຫລິ້ນເປັນຈໍານວນຫລວງຫລາຍນັ້ນຄື: “ ນໍ້າຕົກຕາດສະແນນ” ອັນຄໍາເວົ້າທີ່ວ່າສະແນນ ອາດມີຊື່ຄວາມໝາຍແຕກຕ່າງກັນ ໄປໃນແຕ່ລະເຂດແຂວງສະເພາະ ຄົນທາງພາກໃຕ້ຂອງລາວເອີ້ນສະແນນ (ຕຽງຢູ່ກໍາຂອງຄົນເກີດລູກ) ເພີ່ນເອົາມາຢ້າງ ຫລື ຂາງໄຟແບບວິທີດັ້ງເດີມຂອງຄົນເກີດ ແຕ່ໃນທີ່ນີ້ ຜູ້ຂຽນມະໂນພາບໄປເອງວ່າ ລັກສະນະຂອງນໍ້າຕົກຕາດແຫ່ງ ນີ້ຄ້າຍຄື: ຕຽງນອນ ແລະ ເປັນຂັ້ນໄດທີ່ມີຫລາຍຊັ້ນ ເຊິ່ງມີສາຍນໍ້າຫ້ວຍໄຫລລົງມາຈາກຍອດພູສູ່ເຂດຕໍ່າ. ນ້ຳຕົກຕາດສະແນນເປັນອີກສະຖານທີ່ທ່ອງທ່ຽວໜຶ່ງຂອງເມືອງບໍ່ແຕນ, ແຂວງໄຊຍະບູລີ ທີ່ເໝາະສຸດໆ ສຳລັບຄົນທີ່ມັກໃນຄວາມທ້າທ້າຍ ແລະ ຢາກສຳຜັດກັບທຳມະຊາດອ້ອມຮອບ ທີ່ມີບັນຍາກາດບໍລິສຸດສົດຊື່ນ...ເພາະເປັນນໍ້າ ຕົກຕາດທີ່ໃຫຍ່ ແລະ ມີຄວາມສູງປະມານ 70 ແມັດ, ຕົກລົງມາຈາກພູທີ່ເປັນໜ້າຜາ ເຊິ່ງບອກໄດ້ເລີຍວ່າ ສວຍງາມທີ່ສຸດໆ ໃນເມືອງບໍ່ແຕນກໍວ່າໄດ້. ຖ້າທ່ານໃດຕ້ອງການຢາກໄປສໍາຜັດ, ສະຖານທີ່ນ້ຳຕົກຕາດສະແນນດັ່ງກ່າວສາມາດເດີນທາງດ້ວຍລົດໄດ້ຢ່າງສະດວກສະບາຍ ແລະ ມຸ່ງໜ້າອອກຈາກຕົວເມືອງບໍ່ແຕນ, ໄປທາງບ້ານນໍ້າພຸປະມານ 7 ກິໂລແມັດ ແລ້ວເດີນທາງຕໍ່ໄປທີ່ ບ້ານນໍ້າດັ້ນ ປະມານ 5 ກິໂລແມັດ ລວມໄລຍະທາງແລ້ວ ນ້ຳຕົກຕາດດັ່ງກ່າວ ຫ່າງຈາກເທສະບານເມືອງບໍ່ແຕນ ປະມານ 20 ກິໂລແມັດ. 

ນໍ້າຕົກຕາດລວມມີ 7 ຊັ້ນ ຕັ້ງຢູ່ໃນເຂດປ່າໄມ້ໃຫຍ່ຂຽວງາມ ແລະ ມີເຂດປ່າໄມ້ທໍາມະຊາດທີ່ກວ້າງໃຫຍ່ ເຊິ່ງເຂດດັ່ງກ່າວ ໄດ້ຮັບການພັດທະນາ ແລະ ບຸກເບີກການກໍ່ສ້າງໃນປີ 2022 ແລະ ເປີດໃຫ້ບໍລິການໃນປີ 2024 ນີ້ ໂຄງການພັດທະນາແຫລ່ງທ່ອງທ່ຽວແຫ່ງນີ້ ມີເນື້ອທີ່ຈະຕ້ອງໄດ້ສະຫງວນເປັນປ່າຕົ້ນນ້ຳທັງໝົດ 1.200 ເຮັກຕາ ແລະ ເນື້ອທີ່ພັດທະນາໃນເບື້ອງຕົ້ນ 15 ເຮັກຕາ, ມີອາຍຸສໍາປະທານ 50 ປີ ໃນມູນຄ່າລົງທຶນທັງໝົດ 50 ຕື້ກີບ ໂດຍແມ່ນການລົງທຶນຂອງນັກທຸລະກິດລາວ.

ໂດຍ: ເກີດຂວັນໃຈ ມາລີຈັນສີ

KPL