ຂປລ. ພິທີສະເຫລີມສະຫລອງອາທິດສາກົນ ການລ້ຽງລູກດ້ວຍນໍ້ານົມແມ່ ແລະ ວັນໂພຊະນາການ ຈັດຂຶ້ນໃນວັນທີ 6 ສິງຫາ 2024 ທີ່ມະຫາວິທະຍາໄລ ວິທະຍາສາດສຸຂະພາບ (ເຂດດົງໂພສີ) ນະຄອນຫລວງວຽງຈັນ ໂດຍການເປັນປະທານຂອງ ທ່ານ ສະໜອງ ທອງຊະນະ ຮອງລັດຖະມົນຕີ ກະຊວງສາທາລະນະສຸກ, ມີບັນດາຜູ້ຕາງໜ້າສະຫະພາບເອີຣົບ ປະຈຳ ລາວ, ຜູ້ຕາງໜ້າອົງການອຸຍນີເຊັບ ປະຈຳ ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ສະໜອງ ທອງຊະນະ ​ໄດ້​ມີ​ຄຳ​ເຫັນວ່າ: ພິທີສະເຫລີມສະຫລອງອາທິດສາກົນ ການລ້ຽງລູກດ້ວຍນໍ້ານົມແມ່ ແລະ ວັນໂພຊະນາການ ເປັນງານທີ່ມີຄວາມໝາຍອັນຍິ່ງໃຫຍ່ ແລະ ເລິກເຊິ່ງ ໃນການສົ່ງເສີມສຸຂະພາບ ແລະ ໂພຊະນາການຂອງແມ່ ແລະ ເດັກ ເຊິ່ງໄດ້ຈັດຂຶ້ນໃນທຸກໆປີ ໃນໄລຍະວັນທີ 1-7 ສິງຫາ ບັນດາປະເທດຕ່າງໆໃນທົ່ວໂລກ ໄດ້ພ້ອມກັນສະເຫລີມສະຫລອງ ອາທິດສາກົນການລ້ຽງລູກດ້ວຍນໍ້ານົມແມ່ ດ້ວຍການຈັດງານ ແລະ ສ້າງຂະບວນການຕ່າງໆ ໃນຫລາຍຮູບແບບ. ສຳລັບ ປີ 2024 ນີ້, ອົງກອນພັນທະມິດສາກົນ ການລ້ຽງລູກດ້ວຍນໍ້ານົມແມ່ ໄດ້ເນັ້ນໜັກໃສ່ຫົວຂໍ້ “ການປິດຊ່ອງວ່າງ, ສະໜັບສະໜູນການລ້ຽງລູກດ້ວຍນໍ້ານົມແມ່ ເພື່ອທຸກຄົນ” ເຊິ່ງໝາຍເຖິງການປິດຊ່ອງວ່າງຂໍ້ຫຍຸ້ງຍາກ ໃນການລ້ຽງລູກດ້ວຍນໍ້ານົມແມ່, ສ້າງຄວາມສະເໝີພາບໃນສັງຄົມ, ທຸກໆຄົນສາມາດເຂົ້າເຖິງ ການສະໜັບສະໜູນ  ການລ້ຽງລູກດ້ວຍນໍ້ານົມແມ່ ໂດຍສະເພາະ ແມ່ທີ່ມີຄວາມສ່ຽງຈະຕ້ອງໄດ້ຮັບ  ການຊ່ວຍເຫລືອເພີ່ມເຕີມ ຕ້ອງຮັບປະກັນວ່າບໍ່ໃຫ້ມີໃຜຖືກຖິ້ມໄວ້ເບື້ອງຫລັງ ເພື່ອຫລຸດຄວາມບໍ່ເທົ່າທຽມ ແລະ ສາມາດຜ່ານຜ່າຂໍ້ຫຍຸ້ງຍາກຕ່າງໆໄດ້ ແລະ ຕ້ອງການໃຫ້ສັງຄົມຮັບຮູ້ຄວາມສໍາຄັນ ແລະ ຄວາມຕ້ອງການໃຫ້ ການສະໜັບສະໜູນ ຂອງບັນດາແມ່ຍິງ ທີ່ກຳລັງລ້ຽງລູກດ້ວຍນໍ້ານົມແມ່.

ທ່ານ ສະໜອງ ທອງຊະນະ ຍັງ​ໄດ້ກ່າວຕື່ມວ່າ: ວັນໂພຊະນາການແຫ່ງຊາດ ເປັນອີກວັນໜຶ່ງທີ່ມີຄວາມໝາຍຢ່າງກວ້າງຂວາງ, ໃນແຜນການພັດທະນາ ເສດຖະກິດ-ສັງຄົມແຫ່ງຊາດ ໂພຊະນາການແມ່ນມີບົດບາດສໍາຄັນຫລາຍ ເນື່ອງຈາກວ່າຕົວຊີ້ວັດ ດ້ານໂພຊະນາການ ເປັນສິ່ງທີ່ບົ່ງບອກ ສະຖານະພາບ ຂອງການພັດທະນາເສດຖະກິດ-ສັງຄົມ ຂອງຊາດ. ໃນວັນທີ 31 ກໍລະກົດ 2013 ໄດ້ມີການແຕ່ງຕັ້ງຄະນະກຳມະການແຫ່ງຊາດ ດ້ານໂພຊະນາການຂຶ້ນເປັນຄັ້ງທໍາອິດ ທີ່ມີຫລາຍກະຊວງ ເຊັ່ນ: ກະຊວງສາທາລະນາສຸກ, ກະຊວງສຶກສາທິການ ແລະ ກິລາ, ກະຊວງກະສິກຳ ແລະ ປ່າໄມ້, ກະຊວງແຜນການ ແລະ ການລົງທຶນ ແລະ ກະຊວງອື່ນໆ ໂດຍມີເປົ້າໝາຍເພື່ອແກ້ໄຂ ບັນຫາໂພຊະນາການທີ່ຖືເອົາ 22 ມາດຕະການໂພຊະນາການ ເປັນບຸລິມະສິດ ທີ່ສໍາຄັນໃນການວາງແຜນ ແລະ ຈັດຕັ້ງປະຕິ ບັດໃນການຕອບໂຕ້ ກັບສະພາບການຂາດສານອາຫານໃນ ສປປ ລາວ. ສະນັ້ນ, ເພື່ອສືບຕໍ່ສົ່ງເສີມໃຫ້ເຫັນໄດ້ ຄວາມສໍາຄັນອັນເປັນບຸລິມະສິດ ແກ່ວຽກງານໂພຊະນາການ ໃຫ້ເປັນຮູບປະທໍາຢ່າງແທ້ຈິງການ ນໍາຈຶ່ງໄດ້ກຳນົດເອົາ ວັນທີ 31 ກໍລະກົດ ຂອງທຸກປີ ເປັນວັນໂພຊະນາການແຫ່ງຊາດ ແລະ ຈັດການສະເຫລີມສະຫລອງ ຢ່າງເປັນທາງການ ເພື່ອຍົກສູງຈິດສໍານຶກວຽກງານໂພຊະນາການໃຫ້ກວ້າງຂວາງຕໍ່ໆໄປ.

ຂ່າວ-ພາບ: ໜັງສືພິມ​ປະຊາຊົນ

KPL