ຂປລ.  ສູນສົ່ງເສີມການສຶກສາຮຽນຮ່ວມ ເຜີຍແຜ່ແຜນຍຸດທະສາດ ແລະ ແຜນປະຕິບັດງານດ້ານວຽກງານການສຶກສາຮຽນຮ່ວມ ແຕ່ນີ້ຮອດປີ 2030 ໂດຍໄດ້ຮັບການສະໜັບສະໜູນຈາກອົງ ການພັດທະນາສາກົນ ປະເທດສະຫະລັດອາເມລິກາ ແລະ ສະຫະພາບເອີລົບ ​ໃນວັນທີ 5 ສິງຫາ 2024 ພາຍໃຕ້ການເປັນປະທານຮ່ວມຂອງ ທ່ານ ສຸລິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ເອລີຊາເບັດ ແຊັມເບີ້ ວ່າການຜູ້ຕາງໜ້າອົງການພັດທະນາສາກົນ ປະເທດສະຫະລັດອາເມລິກາ ປະຈຳລາວ,ທ່ານ ນີແອວຣ ເລໂອນາດ ທີ່ປຶກສາທູດສຳນັກງານ ຜູ້ຕາງໜ້າສະຫະພາບເອີລົບປະຈຳລາວ, ມີຜູ້ຕາງໜ້າຈາກກະຊວງກ່ຽວຂ້ອງ, ສະຖາບັນ, ມະຫາວິທະຍາໄລແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ຫຸມພັນ ແກ້ວອຸ່ນຄຳ ຜູ້ອຳນວຍ ການສູນສົ່ງເສີມການສຶກສາຮຽນຮ່ວມ ໄດ້​ໃຫ້​ຮູ້​ວ່າ: ແຜນຍຸດທະສາດການສຶກສາຮຽນຮ່ວມແຕ່ນີ້ຫາປີ 2030 ສ້າງຂຶ້ນເພື່ອຈັດຕັ້ງຜັນຂະຫຍາຍ ນະໂຍບາຍແຫ່ງຊາດ ວ່າດ້ວຍການສຶກສາຮຽນຮ່ວມ ແລະ ພັດທະນາຂະແໜງການສຶກສາທິການ ແລະ ກິລາ ໃນແຕ່ລະໄລຍະ, ການບັນລຸເປົ້າໝາຍສະຫັດສະວັດ ເພື່ອການພັດທະນາແບບຍືນຍົງ (SDG4), ທັງເປັນການຮັບປະກັນສິດທິ ໃນການເຂົ້າເຖິງການສຶກສາທີ່ມີຄຸນນະພາບ, ຄວາມສະເໝີພາບ ແລະ ເທົ່າທຽມຂອງທຸກຄົນໃນສັງຄົມ, ຫລຸດຜ່ອນ ແລະ ລຶບລ່າງຄວາມຫລຸດໂຕນ ໃນການເຂົ້າເຖິງ ການສຶກສາຂອງກຸ່ມທີ່ດ້ອຍໂອກາດ ໂດຍສະເພາະເດັກຍິງ, ແມ່ຍິງ, ເຜົ່າ, ຄົນພິການ ແລະ ຜູ້ທີ່ມີຄວາມຫຍຸ້ງຍາກທາງດ້ານເສດຖະກິດ-ສັງຄົມ ເພື່ອຮັບປະກັນການສຶກສາໃຫ້ມີຄຸນນະພາບ, ເທົ່າທຽມ, ທົ່ວເຖິງ ແລະ ສົ່ງເສີມການຮຽນຮູ້ ຕະຫລອດຊີວິດສຳລັບທຸກຄົນ, ທັງເປັນການປັບປຸງ ຄຸນນະພາບ, ສະພາບແວດລ້ອມທີ່ເອື້ອອຳນວຍ ໃຫ້ແກ່ການສຶກສາຮຽນຮ່ວມ ແລະ ການມີສ່ວນຮ່ວມຂອງຜູ້ຮຽນ, ຄອບຄົວ, ໂຮງຮຽນ, ຊຸມຊົນ ແລະ ສັງຄົມ.

ແຜນຍຸດທະສາດດັ່ງກ່າວ, ແຕ່ນີ້ຮອດປີ 2030 ປະກອບມີ 7 ຍຸດທະສາດຄື: ຍົກສູງຄວາມສຳຄັນຂອງການສຶກສາຮຽນຮ່ວມ;   ປັບປຸງສິ່ງອຳນວຍຄວາມສະດວກ ແລະ ສະພາບແວດລ້ອມ ໃນສະຖານການສຶກສາທີ່ມີ ການສຶກສາຮຽນຮ່ວມທຸກຊັ້ນ, ທຸກສາຍ; ເຊື່ອມສານການສຶກສາຮຽນ ຮ່ວມເຂົ້າໃນຫລັກສູດ, ຝຶກອົບຮົມຄູ, ສ້າງຄູໃນທຸກລະບົບທຸກຊັ້ນທຸກສາຍ;  ສົ່ງເສີມການສຶກສາຂອງນັກຮຽນ-ນັກສຶກສາພິການ; ສ້າງ ແລະ ເຝິກອົບຮົມຄູອາ-ຈານ, ຜູ້ດູແລນັກຮຽນພິການ ແລະ ບຸກຄະລາກອນສະເພາະດ້ານ ສຳລັບການສຶກສາຄົນພິການ;  ສົ່ງເສີມຜູ້ຮຽນທຸກຄົນ ເຂົ້າເຖິງອາຫານ ທີ່ຖືກຫລັກໂພສະນາການ, ສຸຂະອະນາໄມ, ສຸຂາພິບານ ແລະ ສ້າງສະຖານການສຶກສາທີ່ປອດໄພ; ການຮ່ວມມືກັບຂະແໜງການທຸກພາກສ່ວນທີ່ກ່ຽວຂ້ອງ ແລະ ຄູ່ຮ່ວມພັດທະນາຕໍ່ວຽກງານການສຶກສາຮຽນຮ່ວມ ແລະ ການສຶກສາຄົນພິການ.

ຂໍ້​ມູນ: ໜພ ວຽງຈັນໃໝ່

KPL