*ສປປ ລາວ ເປັນປະເທດໜຶ່ງໃນບັນດາ 10 ປະເທດສະມາຊິກອາຊຽນ ທີ່ມີປະຊາກອນເຂົ້າເຖິງລະບົບອິນເຕີເນັດ ຫລື ເຄື່ອຂ່າຍໂທລະຄົມມະນາຄົມ ຫລາຍເຖິງ 5 ລ້ານກວ່າຄົນ ທັງໆທີ່ປະຊາກອນມີພຽງ 7 ລ້ານກວ່າຄົນຂະນະທີ່ຊາວລາວ ຈໍານວນຫລວງຫລາຍຫັນມາຄ້າຂາຍຜ່ານທາງອອນລາຍເພີ່ມຂຶ້ນເຊັ່ນກັນ. ຫລ້າສຸດໃນວັນທີ 23 ກໍລະກົດ 2024 ກົມເຕັກໂນໂລຊີດິຈີຕອນ, ກະຊວງເຕັກໂນໂລຊີ ແລະ ການສື່ສານ ແລະ ບໍລິສັດໄຊຍະສິດໄອທີ ທີ່ປຶກສາຈໍາກັດຜູ້ດຽວເຊັນສັນຍາຮ່ວມມືວ່າດ້ວຍການພັດທະນາລະບົບອອກອະນຸຍາດ ແບບອອນລາຍຂອງຂະແໜງການເຕັກໂນໂລຊີ ແລະ ການສື່ສານໄດ້ຈັດຂຶ້ນໃນທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງ ເຕັກໂນໂລຊີ ແລະ ການສື່ສານ.

    ທ່ານ ອາລຸນຍະເດດ ສະຣິດທິລາດ ຜູ້ອຳນວຍການບໍລິສັດ ໄຊຍະສິດ ໄອທີທີ່ປຶກສາ ຈໍາກັດ ຜູ້ດຽວ ລາຍງານວ່າ: ການປະຕິຮູບລະບົບບໍລິການທັນສະໄໝ ແລະ ກ້າວສູ່ດິຈີຕອນເປັນວຽກບູລິມະສິດຂອງ ກະຊວງເຕັກໂນໂລຊີ ແລະ ການສື່ ສານ ໂດຍໄດ້ມີວິໄສທັດ ຮອດປີ 2030 ແລະ ຍຸດທະສາດພັດທະນາ ຮອດປີ 2025. ຕິດພັນກັບການປະຕິຮູບດັ່ງກ່າວ, ການຄຸ້ມຄອງການຈັດເກັບລາຍຮັບເຂົ້າງົບປະມານ ແຫ່ງລັດໃຫ້ຖືກຕ້ອງ, ຄົບຖ້ວນ, ໂປ່ງໃສ ແລະ ສາມາດກວດສອບໄດ້ ຖືເປັນວຽກງານຫລັກທີ່ທາງພັກ ແລະ ລັດຖະບານຂອງເຮົາໃຫ້ຄວາມສໍາຄັນເວົ້າລວມ, ເວົ້າສະເພາະແມ່ນ ວຽກງານການອອກອະນຸຍາດ ຂອງຂະແໜງການເຕັກໂນໂລຊີ ແລະ ການສື່ສານ.

    ໄລຍະຜ່ານມາເຫັນວ່າຍັງບໍ່ມີລະບົບ ທີ່ໃຫ້ບໍລິການການອອກອະນຸຍາດທີ່ທັນສະໄໝ ແລະ ສາມາດຄຸ້ມຄອງການຈັດເກັບລາຍຮັບຄ່າທໍານຽມ ແລະ ຄ່າບໍລິການໄດ້ຢ່າງມີປະສິດທິພາບ ແລະ ປະສິດທິຜົນ, ລະບົບທີ່ໄດ້ນໍາໃຊ້ໄລຍະຜ່ານມາບໍ່ມີການເຊື່ອມຈອດກັນ ກັບລະບົບຊໍາລະສະສາງ (FinLINK) ຂອງກະຊວງການເງິນ, ຂາດເຄື່ອງມື ຫລື ລະບົບໃນການຕິດຕາມກວດກາ ແລະ ບັນຫາອື່ນໆ. ສະນັ້ນ, ເພື່ອເຮັດໃຫ້ວຽກງານດັ່ງກ່າວມີທ່າຫັນປ່ຽນໃໝ່ທີ່ດີຂຶ້ນ ແລະ ເປັນການເພີ່ມຖານລາຍຮັບ, ສ້າງຄວາມເຂັ້ມແຂງທາງດ້ານການຈັດເກັບຄ່າທໍານຽມ ແລະ ຄ່າບໍລິການ, ບໍລິສັດໄຊຍະສິດ ໄອທີທີ່ປຶກສາ ຈໍາກັດຜູ້ດຽວ ຂອງພວກເຮົາຈ່ຶງສະເໜີຂໍເຂ້ົາມາມີສ່ວນຮ່ວມໃນການສ້າງ ແລະ ປັບປຸງລະບົບທັນສະໄໝ ເພື່ອເຮັດໃຫ້ມີຄວາມສະດວກ, ສອດຄ່ອງກັບໜ້າວຽກຕົວຈິງ, ຮັບປະກັນຄວາມໂປ່ງໃສ, ສາມາດຈັດເກັບລາຍຮັບຄ່າທໍານຽມທາງເຂົ້າງົບປະມານແຫ່ງລັດ ໃຫ້ໄດ້ທັນຕາມກໍານົດເວລາ, ສິ່ງສໍາຄັນແມ່ນອັດຊ່ອງຫວ່າງການຮົ່ວໄຫລ ແລະ ປາກົດການຫຍໍ້ທ້ໍໃນຂະແໜງການເຕັກໂນໂລຊີ ແລະ ການສື່ສານ.

    ການຈັດຕັ້ງປະຕິບັດໂຄງການຮ່ວມມືໃນຄັ້ງນີ້, ໄດ້ແບ່ງອອກເປັນ 2 ໄລຍະຄື: ໄລຍະທໍາອິດ ແມ່ນຈະສຸມໃສ່ການພັດທະນາລະບົບຄຸ້ມຄອງການອອກອະນຸຍາດດໍາເນີນທຸລະກິດດ້ານເຕັກໂນໂລຊີດິຈີຕອນ ທີ່ທັນສະໄໝ ຫລື ເອີ້ນວ່າລະບົບ E-Filing, ຊຶ່ງປະກອບມີທັງໝົດ 3 ໂມດູນ ທີ່ຕ້ອງໄດ້ພັດທະນາ ເປັນລະບົບຄົບຊຸດ ແລະ ມີການເຊື່ອມຕໍ່ກັບລະບົບ TaxRIS ຂອງກົມສ່ວຍສາອາກອນ, ກະຊວງການເງິນ ເພື່ອລວມສູນຖານຂໍ້ມູນ ແລະ ລະບົບຄຸ້ມຄອງຕິດຕາມການຈັດເກັບລາຍຮັບຄ່າທໍານຽມ-ຄ່າບໍລິການ ຂອງຂະແໜງການເງິນພາກລັດໃນຮູບ ແບບ Real-Time, ພ້ອມທັງໃຫ້ສາມາດຊໍາລະຜ່ານລະບົບທະນາຄານ ໂດຍນຳໃຊ້ລະບົບ E-Wallet ແລະ ລະບົບ Blockchain ຂອງກະຊວງເຕັກໂນໂລຊີ ແລະ ການສື່ ສານ, ນຳໃຊ້ລະບົບລາຍເຊັນດິຈີຕອນ ຫລື ລະບົບ E-Sign ໃນການຢັ້ງຢືນເຊັນເອກະສານທາງເອເລັກໂຕນິກ. ສຳລັບລະບົບຄັງເງິນແມ່ນເປີດກວ້າງໃຫ້ທຸກທະນາຄານ ແລະ ລະບົບ E-Wallet ທີ່ມີຄວາມພ້ອມສາມາດເຊື່ອມຕໍ່ເຂົ້າສູ່ລະບົບໄດ້, ໂດຍ 3 ໂມດູນຫລັກປະກອບມີ: 1) ໂມດູນຄຸ້ມຄອງການສ່ົງໃບຄໍາຮ້ອງເພື່ອຂໍອອກອະນຸຍາດ ສໍາລັບຜູ້ປະກອບການ; 2) ໂມດູນຄຸ້ມຄອງການອອກອະນຸຍາດ ສໍາລັບພາກລັດ; ແລະ 3) ໂມດູນຄຸ້ມຄອງການຈັດເກັບຄ່າທໍານຽມ ແລະ ຄ່າບໍລິການ.

    ສ່ວນໄລຍະທີ 2 ແມ່ນຈະສືບຕໍ່ດໍາເນີນການສຶກສາຄົ້ນຄວ້າ ແລະ ພັດທະນາລະບົບອອກອະນຸຍາດແບບອອນລາຍ ໃຫ້ແກ່ບັນດາກົມກອງພາຍໃນກະຊວງເຕັກໂນໂລຊີ ແລະ ການສື່ສານໃຫ້ສາມາດນໍາໃຊ້ໄດ້ໃນຂອບເຂດທົ່ວປະເທດ (ຂັ້ນ ສູນກາງ ແລະ ຂັ້ນທ້ອງຖິ່ນ).

ໂດຍ: ເກີດຂວັນໃຈ ມາລີຈັນສີ

KPL