*ກະຊວງສຶກສາທິການ ແລະກິລາ (ສສກ) ຮ່ວມກັບສະຖານທູດອົດສະຕຣາລີ ປະຈໍາລາວ ແລະວິທະຍາໄລຄູດົງຄໍາຊ້າງ ຈັດພິທີສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 69 ປີ (20 ກໍລະ ກົດ 1955-20 ກໍລະກົດ 2024), ພ້ອມທັງເປີດນໍາໃຊ້ເອກະສານແນະນໍາການປົກປ້ອງ ແລະ ຮັກສາຄວາມປອດໄພສໍາລັບເດັກຂອງຂະແໜງການສຶກສາ ແລະ ກິລາຢ່າງເປັນທາງການ ແລະ ຈັດຝຶກອົບຮົມຄູຝຶກໃນຫົວຂໍ້ “ການປົກປ້ອງ ແລະ ຮັກສາຄວາມປອດໄພສໍາລັບເດັກ” ໃຫ້ບັນດາຄູສອນຢູ່ວິທະຍາໄລຄູດົງຄໍາຊ້າງ ເພື່ອເປັນຄູຝຶກວຽກງານປົກປ້ອງເດັກໃນອະນາຄົດ ໂດຍການເປັນປະທານຂອງ ທ່ານ ສົມສີ ສຸດທິວົງ ຮອງຫົວໜ້າຫ້ອງການ, ຜູ້ປະຈໍາການຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ, ກະຊວງສຶກສາທິການ ແລະ ກິລາ, ທ່ານ ນາງ ວາເນັດຊ້າ ເຮັກກາທີ້ເລຂາເອກດ້ານຂະແໜງສາທາລະນະສຸກ ແລະ ຂະແໜງການສຶກສາ, ສະຖານທູດອົດສະຕຣາລີປະຈໍາລາວ.

ທ່ານ ສົມສີ ສຸດທິວົງ ໄດ້ໃຫ້ຮູ້ວ່າ: ການປົກປ້ອງ ແລະ ການຮັກສາຄວາມປອດໄພສໍາລັບເດັກ ແມ່ນວຽກງານບຸລິມະສິດຂອງລັດຖະບານແຫ່ງ ສປປ ລາວ ແລະ ລັດຖະບານອົດສະຕຣາລີ, ຄູມີບົດບາດສໍາຄັນໃນການປົກປ້ອງເດັກ ໂດຍການມີສ່ວນຮ່ວມ, ໄດ້ຮັບການສະໜັບສະໜູນ ແລະ ມີຄວາມຮູ້ກ່ຽວກັບການປົກປ້ອງເດັກ ເຊິ່ງວິທີການປະຕິບັດຂອງຄູ ສາມາດສ້າງຄວາມແຕກຕ່າງດ້ານສະພາບແວດລ້ອມທີ່ດີກວ່າເກົ່າ ເພື່ອການຮຽນຮູ້ທີ່ປອດໄພ. ສໍາລັບເອກະສານແນະນໍາກ່ຽວກັບການປົກປ້ອງ ແລະ ຮັກສາຄວາມປອດໄພສໍາລັບເດັກ ສະບັບນີ້, ສ້າງຂຶ້ນ ເພື່ອສະໜັບສະໜູນຄູໃຫ້ເຂົ້າໃຈຢ່າງເລິກເຊິ່ງ ກ່ຽວກັບການປົກປ້ອງເດັກ ແລະ ໃຫ້ເຂົ້າເຖິງຂໍ້ມູນກ່ຽວກັບການໃຫ້ຄໍາປຶກສາ ແລະ ລະບົບການລາຍງານ. ຄູບໍ່ພຽງແຕ່ຖ່າຍທອດຄວາມຮູ້ໃຫ້ນັກຮຽນເທົ່ານັ້ນ ແຕ່ຍັງສ້າງພື້ນທີ່ປອດໄພໃຫ້ເດັກນ້ອຍໄດ້ຮຽນຮູ້ ແລະ ຈະເລີນເຕີບໂຕທາງກາຍ ແລະ ຈິດໃຈອີກດ້ວຍ ເມື່ອນັກຮຽນຮູ້ສຶກປອດໄພ, ເຂົາເຈົ້າຈະຮຽນຮູ້ໄດ້ດີຢູ່ໂຮງຮຽນ.

ທ່ານ ນາງ ວາເນັດຊ້າ ເຮັກກາທີ້ ໄດ້ກ່າວວ່າ: ລັດຖະບານອົດສະຕຣາລີ ມີຄວາມພູມໃຈທີ່ໄດ້ຮ່ວມມືກັບກະຊວງສຶກສາທິການ ແລະ ກິລາໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງການສຶກສາຂັ້ນພື້ນຖານໃນ ສປປ ລາວ (ແຜນງານບີຄວາ) ໃນການພັດທະນາ ແລະ ເຜີຍແຜ່ເອກະສານແນະນໍາສໍາລັບການປົກປ້ອງ ແລະ ຮັກສາຄວາມປອດໄພ ສໍາລັບເດັກຢ່າງເປັນທາງການ ສະບັບນີ້ຂອງຂະແໜງການສຶກສາ ແລະກິລາ ໃນການເສີມສ້າງຂີດຄວາມສາມາດໃນຫົວຂໍ້ທີ່ສໍາຄັນນີ້. ຄູ່ມືດັ່ງກ່າວ ໄດ້ອະທິບາຍເຖິງການປະຕິບັດຕົວຈິງທີ່ທຸກຄົນຄວນປະຕິບັດເມື່ອໄດ້ເຮັດວຽກຕິດພັນກັນເດັກ, ການປົກປ້ອງ ແລະ ຮັກສາຄວາມປອດໄພສໍາລັບເດັກ ແມ່ນຄວາມຮັບຜິດຊອບຂອງທຸກຄົນ ແລະ ຂໍໃຫ້ທຸກຄົນເປັນແບບຢ່າງ ແລະ ເຮັດວຽກຮ່ວມກັນ ເພື່ອຮັບປະກັນສະພາບແວດລ້ອມການຮຽນຮູ້ທີ່ປອດໄພສໍາລັບລູກຫລານຂອງພວກເຮົາ.

ໂດຍ: ກິດຕາ

KPL