ຂປລ
ຂປລ. ໃນວັນທີ 24 ກໍລະກົດ 2024 ຜ່ານມານີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ດາໂຕະ ເອີລິວານ ເປຮິນ ຢູສອບ ລັດຖະມົນຕີການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ໃນໂອກາດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມປິ່ນອ້ອມ ທີ່ໄດ້ຈັດຂຶ້ນຢູ່ ນະຄອນຫລວງວຽງຈັນ ໃນລະຫວ່າງວັນທີ 21-27 ກໍລະກົດ 2024
![](https://kpl.gov.la/Media/Upload/News/Thumb/2024/07/26/4.jpg)
ຂປລ. ໃນວັນທີ 24 ກໍລະກົດ 2024 ຜ່ານມານີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ດາໂຕະ ເອີລິວານ ເປຮິນ ຢູສອບ ລັດຖະມົນຕີການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ໃນໂອກາດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມປິ່ນອ້ອມ ທີ່ໄດ້ຈັດຂຶ້ນຢູ່ ນະຄອນຫລວງວຽງຈັນ ໃນລະຫວ່າງວັນທີ 21-27 ກໍລະກົດ 2024 ເພື່ອປຶກສາຫາລື ແລະ ສືບຕໍ່ຊຸກຍູ້ການພົວພັນຮ່ວມມື ໃນຂອບສອງຝ່າຍ ແລະ ຫລາຍຝ່າຍ ແນໃສ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ ແລະ ບຣູໄນ ດາຣູຊາລາມ ໃຫ້ມີບາດກ້າວຂະຫາຍຕົວຍິ່ງຂຶ້ນ.
![](https://kpl.gov.la/Media/Upload/News/Thumb/2024/07/26/6.jpg)
ການພົບປະຄັ້ງນີ້, ສອງຝ່າຍ ໄດ້ຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມືຕະຫລອດໄລຍະ 30 ປີ ທີ່ຜ່ານມາ ທີ່ສືບຕໍ່ຂະຫຍາຍຕົວໃນຫລາຍຂົງເຂດວຽກງານ ການພັດທະນາ ໂດຍສະເພາະການຍົກລະດັບການຮ່ວມມື ລະຫວ່າງ ສປປ ລາວ ແລະ ບຣູໄນ ດາຣູຊາລາມ ຂຶ້ນເປັນຄູ່ຮ່ວມຍຸດທະສາດ ໃນໂອກາດທີ່ ສົມເດັດ ຊຸນຕານ ເດີນທາງມາຢ້ຽມຢາມທາງລັດຖະກິດ ທີ່ ສປປ ລາວ ໃນປີ 2023 ຜ່ານມາ.
ພ້ອມກັນນັ້ນ, ສອງຝ່າຍ ຍັງໄດ້ປຶກສາຫາລືກັນ ແລະ ທົບທວນຄືນ ຜົນຂອງການຜັນຂະຫຍາຍບົດບັນທຶກຄວາມເຂົ້າໃຈ ວ່າດ້ວຍການຮ່ວມມືທາງດ້ານກະສິກໍາ ທີ່ສອງລັດຖະບານ ໄດ້ລົງນາມຮ່ວມກັນ ໃນປີ 2022 ເຊິ່ງປັດຈຸບັນ ຝ່າຍບຣູໄນ ກຳລັງພິຈາລະນາ ແລະ ຄົ້ນຄ້ວາໃນດ້ານຕ່າງໆ ເພື່ອກ້າວໄປສູ່ການນຳເຂົ້າສິນຄ້າກະສິກຳ ຈາກ ສປປ ລາວ ໂດຍສະເພາະສິນຄ້າປະເພດເຂົ້າສານ ໃນອະນາຄົດອັນໃກ້ນີ້. ພ້ອມນີ້, ສອງຝ່າຍຍັງໄດ້ປຶກສາຫາລື ແລະ ແລກປ່ຽນທັດສະນະ ກ່ຽວກັບບັນຫາພາກພື້ນ ແລະ ສາກົນອື່ນໆ ອີກດ້ວຍ.
KPL