ຂປລ
ຂປລ. ແຫລ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ເມືອງທຸລະຄົມ ແຂວງວຽງຈັນ ວາງແຜນສູ້ຊົນຜະລິດເຂົ້ານາປີ ໃນປີ 2024 ນີ້ໃຫ້ໄດ້ 9.165 ເຮັກຕາ ຕິດພັນກັບການຊຸກຍູ້ປະຊາຊົນປູກພືດລະດູຝົນ
ຂປລ. ແຫລ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ເມືອງທຸລະຄົມ ແຂວງວຽງຈັນ ວາງແຜນສູ້ຊົນຜະລິດເຂົ້ານາປີ ໃນປີ 2024 ນີ້ໃຫ້ໄດ້ 9.165 ເຮັກຕາ ຕິດພັນກັບການຊຸກຍູ້ປະຊາຊົນປູກພືດລະດູຝົນ ແລະ ຄາດຄະເນຜົນຜະລິດໃຫ້ໄດ້ 42.159 ໂຕນ ໂດຍນໍາໃຊ້ແນວພັນປັບປຸງ 100%, ເຊັ່ນ: ທ່າດອກຄຳ 8, ທ່າດອກຄຳ 11 ແລະ ເຊບັ້ງໄຟ 4.
ອີງຕາມການລາຍງານຂອງ ທ່ານ ຄໍາສອນ ກຸນນະວົງ ຮັກສາການ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງທຸລະຄົມ ຕໍ່ນັກຂ່າວເມືອງ ເມື່ອບໍ່ດົນມານີ້ວ່າ: ເພື່ອຜັນຂະຫຍາຍ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ 2020-2024 ຂອງເມືອງທຸລະຄົມ ແຂວງວຽງຈັນ ວາງອອກ ກໍຄືທິດທາງວຽກງານຈຸດສຸມ ຂອງຫ້ອງການກະສິກໍາ ແລະ ປ່າໄມ້ເມືອງ ກໍານົດໄວ້, ດັ່ງນັ້ນ ຄະນະນໍາຂອງຫ້ອງການດັ່ງກ່າວ ໄດ້ເອົາໃຈໃສ່ເຄື່ອນໄຫວວຽກງານຕາມຂອບເຂດສິດ, ໜ້າທີ່ ແລະ ພາລະບົດບາດຂອງຕົນ ໂດຍມີການຫ້າງຫາກະກຽມ ແລະ ສ້າງເອກະພາບແຕ່ຫົວທີ ໃນການນໍາເອົາແຜນການທີ່ວາງໄວ້ລົງໄປຈັດຕັ້ງປະຕິບັດ ເພື່ອປະກອບສ່ວນຮອງຮັບການຜະລິດເຂົ້າ ສໍາລັບບໍລິໂພກ ແລະ ຂາຍເປັນສິນຄ້າ. ພ້ອມນີ້, ໄດ້ສົມທົບກັບກຸ່ມບ້ານ, ອົງການປົກຄອງບ້ານ, ສະມາຊິກກຸ່ມການຜະລິດ, ປະຊາຊົນ ກໍຄືກະສິກອນຢູ່ບັນດາບ້ານ ກະກຽມຄວາມພ້ອມເຂົ້າສູ່ການຜະລິດເຂົ້ານາປີ ຕິດພັນກັບການປູກພືດລະດູຝົນ ເປັນຕົ້ນ ກະກຽມແນວພັນ, ພາຫະນະການຜະລິດ, ກໍາລັງແຮງງານການຜະລິດ, ຝຸ່ນຄອກ, ອຸປະກອນຮັບໃຊ້, ຊຸກຍູ້ສ້ອມແປງ, ປັບປຸງລະບົບຊົນລະປະທານ, ອອກແຮງງານລວມລວງຄອງ, ອະນາໄມແລວນໍ້າ ແລະ ປັດໄຈພື້ນຖານສໍາຄັນອື່ນໆ.
ປັດຈຸບັນການຈັດຕັ້ງປະຕິບັດແຜນການຜະລິດນາປີທີ່ວາງໄວ້ ຫລາຍບ້ານມີຄວາມຄືບໜ້າໃນລະດັບທີ່ດີ ຊຶ່ງສໍາເລັດແລ້ວປະມານ 80% ໃນນີ້, ນາຫວ່ານ-ນາຢອດ ປະຕິບັດໄດ້ 7.324 ເຮັກຕາ ແລະ ນາດຳ ປະຕິບັດໄດ້ 1.464 ເຮັກຕາ, ເຊິ່ງການຜະລິດຂອງປະຊາຊົນ ສ່ວນຫລາຍນຳໃຊ້ແຮງງານໃນການປັກດໍາດ້ວຍຄົນ ແລະ ກົນຈັກ. ສຳລັບການປູກພືດໃນລະດູຝົນ ຫ້ອງການກະສິກໍາ ແລະ ປ່າໄມ້ ເມືອງທຸລະຄົມ ວາງແຜນການໃນ 6 ເດືອນຕົ້ນປີໃຫ້ໄດ້ 5.054 ເຮັກຕາ, ຄາດຄະເນຜົນຜະລິດ 48.112 ໂຕນ, ເດັ່ນກວ່າໝູ່ແມ່ນ ການປູກມັນຕົ້ນ, ກ້ວຍ, ສາລີຫວານ, ສາລີແຂງ, ພືດພັນຕ່າງໆຢູ່ເຂດລ້ອງງື່ມ ແລະ ເຂດສະຖານີຊົນລະກະເສດນໍ້າມັງ 03.
ຂ່າວ: ບ່າວຫາດໄຊ
KPL
