*ໃນວັນທີ 13 ກໍລະກົດ ຜ່ານມາເຫັນວ່າ: ຫລາຍທ້ອງຖິ່ນທາງພາກ ລັດ ແລະ ເອກະຊົນໃນຂອບເຂດທົ່ວປະເທດໄດ້ພ້ອມກັນສ້າງຂະບວນການປ່ອຍປາ ແລະ ສັດນໍ້າ ເພື່ອສະເຫລີມສະຫລອງວັນດັ່ງກ່າວຢ່າງຟົດຟື້ນ ແລະ ກໍຫວັງວ່າໄດ້ບັນລຸຕາມຄາດໝາຍທີ່ວາງໄວ້ ໂດຍສະເພາະແມ່ນສູ້ຊົນປ່ອຍປາໃຫ້ໄດ້ 64 ບ້ານ ໂຕທີ່ກະຊວງກະສິກຳ ແລະ ປ່າໄມ້ວາງໄວ້. ຢ່າງໃດກໍຕາມພາຍຫລັງປ່ອຍປາ ແລະ ສັດນ້ຳສູ່ທຳມະຊາດແລ້ວ ຕ້ອງໄດ້ພ້ອມກັນປົກປັກຮັກສາສັດທີ່ປ່ອຍນັ້ນໃຫ້ມີການຂະຫຍາຍຕົວ ແລະ ເຕີບໃຫຍ່ເພື່ອເພ່ີມຄວາມອຸດົມທາງທຳມະຊາດເທື່ອລະກ້າວ.

      ດັ່ງພວກເຮົາຮູ້ນຳກັນແລ້ວວ່າ 13 ກໍລະກົດ ເປັນວັນປ່ອຍປາ ແລະ ສັດນໍ້າແຫ່ງຊາດຊຶ່ງໃນແຕ່ລະປີ ການຈັດຕັ້ງແຕ່ລະຂັ້ນທັງສູນກາງ ແລະ ທ້ອງຖິ່ນລວມທັງພໍ່ແມ່ປະຊາຊົນ ໄດ້ຈັດພິທີປ່ອຍປາລົງສູ່ແຫລ່ງນໍ້າທຳມະຊາດ ແລະ ເຂດພື້ນທີ່ຂອງຕົນ ຢ່າງເປັນຂະບວນຟົດຟື້ນໄປ ພ້ອມໆກັບການຍົກສູງຄວາມຮັບຜິດຊອບຂອງສັງຄົມທີ່ໄດ້ເອົາໃຈໃສ່ຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ແບບຍືນຍົງ. ສຳລັບປີ 2024 ນີ້, ລັດຖະບານກໍຄືຂະແໜງການກະສິກຳ ແລະ ປ່າໄມ້ ກໍໄດ້ວາງແຜນສູ້ຊົນໃນການປ່ອຍປາ ແລະ ສັດນໍ້າ ໃຫ້ໄດ້ທັງໝົດ 64 ລ້ານໂຕ. ແນວໃດກໍດີເພື່ອບັນລຸຕົວເລກດັ່ງກ່າວຕິດພັນກັບການສົ່ງເສີມການລ້ຽງ, ຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປາ ແລະ ສັດນໍ້າ ໃຫ້ມີການຂະຫຍາຍຕົວຕາມທິດສີຂຽວ ແລະ ຍືນຍົງນັ້ນ.

     ນອກຈາກ ນີ້ພວກເຮົາທຸກຊັ້ນຄົນຕ້ອງເປັນເຈ້ົາການປົກປັກຮັກສາ ໂດຍສະເພາະຫ້າມນໍາໃຊ້ທາດເບື່ອ, ລະເບີດ, ອາວຸດ, ເຄື່ອງໄຟຟ້າເພື່ອຫາ  ຫລື ຈັບສັດນໍ້າແບບດັບສູນ, ເຄື່ອງມືຫາສັດນໍ້າ ທີ່ມີຄວາມສ່ຽງເຮັດໃຫ້ສັດນໍ້າສູນພັນເປັນຕົ້ນແມ່ນອວນ, ຫລີ່, ມອງຕາຖີ, ໂຕ່ງ, ລອບຂະໜາດໃຫຍ່ ແລະ ອື່ນໆ; ຫ້າມຫາສັດນໍ້າ ຈາກແຫລ່ງນໍ້າທໍາມະຊາດດ້ວຍການຕັນຫ້ວຍ, ໂສກ, ປຸງ, ຄອງນໍ້າ, ຂຸດໜອງ ຫລື ດູດໜອງທຳມະຊາດ ທີ່ມີນໍ້າຕະຫລອດປີ; ຮັບເອົາ, ຊື້- ຂາຍ, ຄອບຄອງ ຫລື ຂົນສົ່ງສັດນໍ້າ ບັນຊີ 1 ໂດຍບໍ່ໄດ້ຮັບອະນຸຍາດ; ສ້າງສິ່ງກີດຂວາງທາງເດີນຂອງສັດນໍ້າ ໂດຍບໍ່ໄດ້ຮັບອະນຸຍາດ; ລ້ຽງ ຫລື ປ່ອຍສັດນໍ້າຕ່າງຖິ່ນທ່ີມີຄວາມສ່ຽງທໍາລາຍສັດນໍ້າພື້ນເມືອງ ແລະ ລະບົບນິເວດປູກພືດນ້ໍາທີ່ຈະເປັນ ການທໍາລາຍລະບົບນິເວດ ຫລື ແຫລ່ງລ້ຽງສັດໂດຍບໍ່ໄດ້ຮັບອະນຸຍາດ; ບຸກລຸກວັງສະຫງວນ ຫລື ເຂດອະນຸລັກພັນສັດນໍ້າ, ເຂດປາອໍ, ແຫລ່ງສັດນໍ້າວາງໄຂ່, ເຂດຈະເລີນເຕີບໂຕຂອງລູກສັດນໍ້າໄວອ່ອນ; ຫາສັດນໍ້າໃນລະດູວາງໄຂ່; ບໍລິໂພກ, ຊື້-ຂາຍສັດນໍ້າທີ່ຕາຍໂດຍບໍ່ຮູ້ສາເຫດ, ເປັນພະຍາດ ຫລື ປົນເປື້ອນສານເຄມີຕົກຄ້າງ; ມີພຶດຕິກຳອື່ນໆ ທີ່ເປັນການລະເມີດກົດໝາຍ. ແລະ ອື່ນໆ.

  ໂດຍ: ເຂົ້າຈານນໍ້າ

KPL