ຂປລ. ກະຊວງພາຍໃນ ແລະ ຫ້ອງວ່າການສໍານັກງານນາຍົກລັດຖະມົນຕີ ຈັດກອງປະຊຸມວຽກງານ ການປົກຄອງທ້ອງຖິ່ນ ທົ່ວປະເທດ ຄັ້ງທີ I ໄລຍະ ປີ 2021-2023 ແລະ ທິດທາງ, ແຜນວຽກຈຸດສຸມຮອດປີ 2025 ໃນວັນທີ 12 ກໍລະກົດ 2024 ພາຍໃຕ້ການເປັນປະທານຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດການປົກຄອງ ແລະ ວັດທະນະທໍາ-ສັງຄົມ, ມີບັນດາທ່ານລັດຖະມົນຕີ-ຮອງລັດຖະມົນຕີ, ເລຂາທິການສະພາແຫ່ງຊາດ, ເຈົ້າແຂວງ-ຮອງເຈົ້າແຂວງ, ຮອງເຈົ້າຄອງນະຄອນຫລວງວຽງຈັນ ແລະ ພາກສ່ວນ ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ໄດ້ສະຫລຸບຕີລາຄາຄືນການຈັດຕັ້ງ ປະຕິບັດວຽກງານຂອງອົງການປົກຄອງທ້ອງຖິ່ນ ໃນໄລຍະທີ່ຜ່ານມາ ໂດຍສະເພາະ ການຈັດຕັ້ງຜັນຂະຫຍາຍແນວທາງຂອງພັກ ແລະ ນະໂຍບາຍຂອງລັດ ສູ່ວຽກງານຕົວຈິງ ຢູ່ບັນດາຮາກຖານທ້ອງຖິ່ນ ໂດຍສຸມໃສ່ຊອກໃຫ້ເຫັນດ້ານດີ ທີ່ຈະຕ້ອງໄດ້ສືບຕໍ່ຮັກສາ ແລະ ເສີມຂະຫຍາຍໃຫ້ກວ້າງອອກ, ດ້ານອ່ອນ-ຂໍ້ຄົງຄ້າງ ທີ່ຈະຕ້ອງໄດ້ສຸມໃສ່ແກ້ໄຂ ຢ່າງຈິງຈັງ.​ ພ້ອມນັ້ນ, ກໍເພື່ອວາງທິດທາງແຜນ ການໃຫ້ແກ່ ການພັດທະນາການປົກຄອງທ້ອງຖິ່ນ ໃນຊຸມປີຕໍ່ໜ້າ ໂດຍສະເພາະ ການປະຕິບັດບັນດາຄາດໝາຍໃຫຍ່ ທີ່ສູນກາງພັກໄດ້ກໍານົດໄວ້ ໃນມະຕິຂອງຄະນະບໍລິຫານງານສູນກາງພັກ ວ່າດ້ວຍສືບຕໍ່ຍູ້ແຮງການຜັນຂະຫຍາຍ ແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ເຂັ້ມແຂງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ ໃຫ້ເປັນຮູບປະທໍາ, ທັງເປັນການປະກອບສ່ວນ ເຂົ້າໃນການປັບປຸງລັດຖະທໍາມະນູນ ແຫ່ງ ສປປ ລາວ ໃຫ້ສອດ ຄ່ອງ ແລະ ຄົບຖ້ວນສົມບູນກວ່າເກົ່າ.

ກອງປະຊຸມ ໄດ້ຮັບຟັງລາຍງານ ແລະ ການສະເໜີບັນດາເນື້ອໃນສຳຄັນ ຈາກຜູ້ຕາງໜ້າຂະແໜງການ ຂັ້ນສູນກາງ ແລະ ທ້ອງຖິ່ນ ຈຳນວນໜຶ່ງ ເປັນຕົ້ນ ບົດສະຫລຸບວຽກງານ ການປົກຄອງທ້ອງຖິ່ນ ທົ່ວປະເທດ ຄັ້ງທີ I ໄລຍະ ປີ 2021-2023 ແລະ ທິດທາງ, ແຜນວຽກຈຸດສຸມຮອດ ປີ 2025; ການຄຸ້ມຄອງບໍລິຫານລັດ ຕິດພັນການພັດທະນານະຄອນຫລວງວຽງຈັນ ໃນໄລຍະໃໝ່ ຕາມມະຕິ 107/ກມສພ, ລົງວັນທີ 30 ເມສາ 2020; ບົດຮຽນ ແລະ ຜົນການຈັດຕັ້ງປະຕິ ບັດດຳລັດ 414/ລບ, ລົງວັນທີ 10 ທັນວາ 2019 ແລະ ວຽກງານເຂດແດນເຊື່ອມຕໍ່ ຂອງແຂວງໄຊສົມບູນ; ການກະກຽມການສ້າງຕັ້ງຕາແສງ ຂອງແຂວງສະຫວັນນະເຂດ; ການຈັດຕັ້ງປະຕິບັດແຜນພັດທະ ນາ ເສດຖະກິດ-ສັງຄົມ ຂອງແຂວງສາລະວັນ; ການຄຸ້ມຄອງບໍລິຫານລັດ ຂອງອົງການປົກຄອງ ແຂວງຫລວງພະບາງ ຕາມພາລະບົດບາດທີ່ກໍານົດໄວ້ໃນກົດໝາຍ; ການຄຸ້ມຄອງ ແລະ ປະສານງານ ໃນເຂດເສດຖະກິດພິເສດສາມ ຫລ່ຽມຄໍາ; ການປັບປຸງກົງຈັກການຈັດຕັ້ງ ແລະ ກໍານົດຕໍາແໜ່ງງານ ຂອງແຂວງໄຊຍະບູລີ; ພາລະບົດບາດຂອງອົງ ການປົກຄອງ ພາຍຫລັງສ້າງຕັ້ງເປັນນະຄອນປາກເຊ; ການກະກຽມການສ້າງຕັ້ງເທສະບານ ເມືອງທ່າແຂກ; ການຈັດສັນງົບປະມານ ຕິດພັນກັບການແບ່ງຂັ້ນຄຸ້ມຄອງ ຂອງຂະແໜງການເງິນ; ການແບ່ງຂັ້ນຄຸ້ມຄອງ ທີ່ຕິດພັນກັບຂະແໜງໂຍທາທິການ ແລະ ຂົນສົ່ງ ແລະ ຂະແໜງແຜນການ ແລະ ການລົງທຶນ; ການກຳນົດຊື່ເອີ້ນອົງການປົກຄອງທ້ອງຖິ່ນ ແລະ ຊື່ເອີ້ນຫົວໜ້າອົງການ ປົກຄອງ ທ້ອງຖິ່ນແຕ່ລະຂັ້ນ ຕາມທິດນຳທີ່ກຳນົດໃນມະຕິ ສະບັບເລກທີ 05/ຄບສພ, ລົງວັນທີ 05 ກັນຍາ 2023. ນອກຈາກນີ້, ບັນດາຜູ້ເຂົ້າຮ່ວມກອງປະຊຸມ ຍັງໄດ້ປະກອບຄໍາເຫັນ ຕໍ່ບັນດາເນື້ອໃນຫົວຂໍ້ ທີ່ໄດ້ນໍາມາສະເໜີໃນກອງປະຊຸມຄັ້ງນີ້ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ເອົາຈິງເອົາຈັງ, ຊອກເຫັນບັນຫາ ແລະ ເຮັດໃຫ້ບັນຫາຕ່າງໆທີ່ຕັ້ງຂຶ້ນມານັ້ນ ໄດ້ຮັບການຄົ້ນຄວ້າຢ່າງເລິກເຊິ່ງ, ລະອຽດຖີ່ຖ້ວນ ແລະ ມີທາງອອກທີ່ເປັນຮູບປະທຳຕົວຈິງ ເພື່ອສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານໃນວຽກງານການປົກຄອງທ້ອງຖິ່ນ ຕາມທິດທາງ ທີ່ກອງປະຊຸມໃຫຍ່ ຂອງພັກວາງອອກ. 

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ, ຕີລາຄາສູງ ຕໍ່ເນື້ອໃນ ແລະ ພາກສ່ວນຮັບຜິດຊອບ ໃນການກະກຽມ ແລະ ເຂົ້າຮ່ວມກອງປະຊຸມ. ໃນຕໍ່ໜ້າ ເພື່ອສືບຕໍ່ປັບປຸງອົງການປົກຄອງທ້ອງຖິ່ນ ໃຫ້ມີຄວາມເຂັ້ມແຂງໜັກແໜ້ນ, ສອດຄ່ອງ  ເໝາະສົມ ແລະ ສາມາດເຄື່ອນໄຫວປະຕິບັດໜ້າທີ່ຢ່າງມີປະສິດທິພາບ; ຮັບປະກັນໃຫ້ການຄຸ້ມຄອງລັດ, ຄຸ້ມຄອງ ແລະ ພັດທະນາເສດຖະກິດ-ສັງຄົມ ດຳເນີນໄປບົນພື້ນ ຖານລັດຖະທໍາມະນູນ, ກົດໝາຍ ແລະ ລະບຽບການ ກໍຄື ກົດໝາຍວ່າດ້ວຍການປົກຄອງທ້ອງຖິ່ນ ເຮັດໃຫ້ທ້ອງ ຖິ່ນ ສາມາດປະຕິບັດພາລະບົດບາດ ຄຸ້ມຄອງບໍລິຫານລັດ ແລະ ແກ້ໄຂວຽກງານໃນເຂດແຄວ້ນທ້ອງຖິ່ນຕົນຢ່າງມີປະສິດທິພາບ, ມີການພັດທະນາຢ່າງຮອບດ້ານ, ມີຄວາມສະຫງົບປອດໄພ, ຊິວິດການເປັນຢູ່ຂອງປະຊາຊົນໄດ້ຮັບການປົວແປງດີຂຶ້ນເປັນກ້າວໆ, ທ່ານຮອງນາຍົກລັດຖະມົນຕີ ໄດ້ເນັ້ນໜັກໃຫ້ເອົາໃຈໃສ່ ວຽກງານບາງດ້ານ ເປັນຕົ້ນ  ການປັບປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງ ລະບົບບໍລິຫານລັດໃນໄລຍະໃໝ່ ຕ້ອງໄດ້ສືບຕໍ່ປັບ ປຸງແກ້ໄຂ ໂດຍສະເພາະ ດ້ານວິທີການ ແລະ ມາດຕະການຈັດຕັ້ງປະຕິບັດ ມອບໃຫ້ບັນດາກະຊວງ, ອົງການຂັ້ນສູນກາງ ສົມທົບກັບຂະແໜງການຂອງຕົນ ຢູ່ຂັ້ນທ້ອງຖິ່ນ ກວດກາຄືນການແບ່ງງານ, ແບ່ງຄວາມຮັບຜິດຊອບ ແລະ ກວດກາຄືນບັນດານິຕິກໍາອັນໃດ ທີ່ບໍ່ສອດຄ່ອງໃນເງື່ອນໄຂປັດຈຸບັນ ແລະ ອັນໃດບໍ່ທັນມີ ກໍ່ຕ້ອງໄດ້ຄົ້ນຄວ້າສ້າງຂຶ້ນຕື່ມ ເພື່ອເຮັດໃຫ້ການຄຸ້ມຄອງບໍລິຫານ, ການພັດທະນາປະເທດ ດໍາເນີນໄປດ້ວຍດີ, ທົ່ວເຖິງ ແລະ ຖືກຕ້ອງ; ການສ້າງຕັ້ງເທສະບານ ຕ້ອງໄດ້ພ້ອມກັນຈັດຕັ້ງປະຕິບັດ, ບໍ່ໃຫ້ລັ່ງເລ, ສົງໃສ ແລະ ຕັ້ງບັນຫາຂຶ້ນອີກ. ພ້ອມກັນນີ້ ເພື່ອຮັບປະກັນໃຫ້ເທດສະບານ ສາມາດເຄື່ອນໄຫວວຽກງານບໍລິຫານ ແລະ ບໍລິການຕົວເມືອງ ໄດ້ຢ່າງເປັນລະບົບຄົບຊຸດ, ມີປະສິດທິພາບ, ປະສິດທິຜົນ ມີຄວາມຈໍາເປັນຕ້ອງໄດ້ມີນິຕິກໍາຮອງຮັບ ໂດຍສະເພາະ ແມ່ນວຽກງານການເງິນຂອງເທດສະບານ ເຊິ່ງກະຊວງການເງິນ ຈະຕ້ອງໄດ້ຮີບຮ້ອນຄົ້ນຄວ້າພິຈາລະນາ ເພື່ອໃຫ້ເທສະບານ ແລະ ນະ ຄອນ ມີຄວາມສະດວກ, ຄ່ອງຕົວໃນການນໍາໃຊ້ງົບປະມານ ເພື່ອຊຸກຍູ້ຄວາມເປັນເຈົ້າການ ໃນການຄຸ້ມຄອງ ແລະ ຈັດຕັ້ງປະຕິບັດ ນໍາໃຊ້ງົບປະມານຢູ່ເທດສະບານ, ນະຄອນ ໃຫ້ແຕກຕ່າງຈາກເມືອງທົ່ວໄປ ແລະ ຮັບປະກັນສະ ຖຽນລະພາບ ດ້ານການສະໜອງງົບປະມານ ໃນທົ່ວປະເທດ; ໃຫ້ກະຊວງພາຍໃນ ສົມກັບພາກສ່ວນກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ ຮີບຮ້ອນຄົ້ນຄວ້າສ້າງນິຕິກໍາ ເພື່ອກະກຽມໃຫ້ແກ່ການສ້າງຕັ້ງຕາແສງ ໃຫ້ມີຄວາມສອດ ຄ່ອງ ແລະ ເໝາະສົມ ເປັນຕົ້ນ ດ້ານກົງຈັກການຈັດຕັ້ງ, ຂອບເຂດສິດ ແລະ ໜ້າທີ່ໃນການບໍລິຫານລັດ, ການສ້າງຕັ້ງຕາແສງ ຕ້ອງເຮັດຢ່າງມີຈຸດສຸມ, ມີແຜນການລະອຽດ, ຈາກນັ້ນ ຈຶ່ງສະຫລຸບຖອດຖອນບົດຮຽນ ແລະ ຂະຫຍາຍໄປທົ່ວປະເທດ; ການປົກຄອງໃນເຂດທີ່ເປັນຕົວເມືອງ ແລະ ເຂດຊົນນະບົດ ແມ່ນມີຄວາມແຕກຕ່າງກັນ ໂດຍສະເພາະ ດ້ານພາລະບົດບາດ ແລະ ໜ້າທີ່ ເຊິ່ງມີຄວາມຈໍາເປັນຢ່າງຍິ່ງ ຕ້ອງມີກົນໄກຄຸ້ມຄອງບໍລິຫານ ແລະ ມີຮູບແບບການປົກຄອງສະເພາະ ທີ່ແທດເໝາະ. ​ສະນັ້ນ, ບັນດາກະຊວງ, ອົງການທີ່ກ່ຽວຂ້ອງຂັ້ນສູນກາງ ຕ້ອງໄດ້ເອົາໃຈໃສ່ຄົ້ນຄວ້າຢ່າງລະອຽດຖີ່ຖ້ວນ ເພື່ອແນໃສ່ສ້າງໃຫ້ເຂດດັ່ງກ່າວ ກາຍເປັນຫົວຈັກ ແກ່ດຶງການພັດທະນາຂອງເຂດແຄວ້ນ ແລະ ຂອງປະເທດ ບົນພື້ນຖານຮັບປະກັນໄດ້ຄວາມສະອາດຈົບງາມ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ.

ຂ່າວ: ກົມປະຊາສໍາພັນ ຫສນຍ

ພາບ: ຂັນໄຊ

KPL