ຂປລ. ກອງປະຊຸມສະຫລຸບຖອດຖອນບົດຮຽນ ການຈັດຕັ້ງປະຕິບັດ ວຽກງານພະລາທິການ ແລະ ການເງິນທົ່ວກອງທັບ ປະຈໍາປີ 2024 ແລະ ທິດທາງແຜນການ ປະຈໍາປີ 2025 ໄດ້ປິດລົງ ໃນວັນທີ 4 ກຸມພາ 2025 ໂດຍການເປັນປະທານຂອງ ສະຫາຍ ພົນໂທ ວົງຄໍາ ພົມມະກອນ ຮອງລັດຖະມົນຕີ ກະຊວງປ້ອງກັນປະເທດ, ມີຄະນະນໍາກະຊວງປ້ອງກັນປະເທດ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ສະຫາຍ ພົນໂທ ວົງຄໍາ ພົມມະກອນ ໄດ້ມີຄຳເຫັນວ່າ: ກອງປະຊຸມຄັ້ງນີ້, ຜູ້ເຂົ້າຮ່ວມ ໄດ້ພ້ອມກັນສັງເກດ-ຕີລາຄາຄືນ ການຈັດຕັ້ງປະຕິບັດວຽກງານ ພະລາທິການທົ່ວກອງທັບໃນປີຜ່ານມາ, ສາມາດຍົກໃຫ້ເຫັນວຽກງານທີ່ພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກ ແລະ ມີບາງຄໍາເຫັນສະເໜີ ແລກປ່ຽນຈໍານວນໜຶ່ງ ເພື່ອພ້ອມກັນປັບປຸງແກ້ໄຂ. ພ້ອມນັ້ນ, ໄດ້ຄົ້ນຄ້ວາ ແລະ ເປັນເອກະພາບຕໍ່ທິດທາງແຜນ ການວຽກງານພະລາທິການ ປະຈຳປີ 2025 ເຊິ່ງປີຜ່ານມາ, ຄະນະນໍາກະຊວງປ້ອງກັນ ປະເທດໄດ້ຊີ້ ນໍາ-ຕິດຕາມຢ່າງຈົດຈໍ່ ຕໍ່ໝາກຜົນແຫ່ງການຈັດຕັ້ງປະຕິບັດ, ຄາດໝາຍສູ້ຊົນ ຂອງບັນດາກົມກອງ-ທ້ອງຖິ່ນໃນທົ່ວປະເທດ, ເຖິງວ່າສະພາບແວດລ້ອມ, ເສດຖະກິດ-ການເງິນຂອງຊາດ ພົບຄວາມຫຍຸ້ງ ຍາກ, ສິ່ງທົດສອບທ້າທາຍກໍຕາມ, ແຕ່ຍ້ອນແນວທາງນະໂຍບາຍ ອັນຖືກຕ້ອງຂອງພັກ-ລັດ, ຍ້ອນຄວາມຮັບຜິດຊອບອັນສູງສົ່ງໃນການຊີ້ນໍາ-ນໍາພາ ຂອງຄະນະກົມໃຫຍ່ພະລາທິການ, ຄະນະພັກ-ຄະ ນະບັນຊາຂອງບັນດາກົມກອງ ກຳລັງຫລວງ-ທ້ອງຖິ່ນ ໂດຍສະເພາະ ພະນັກງານ-ນັກຮົບ ເຫລົ່າຮົບພະ ລາທິການທົ່ວກອງທັບ ຍາດໄດ້ຜົນງານຫລາຍດ້ານ. ສິ່ງສໍາຄັນ ແມ່ນພວກເຮົາຮັບປະກັນ ໃຫ້ປະເທດຊາດມີຄວາມສະຫງົບ ປອດໄພ, ສ້າງເງື່ອນໄຂໃນການດໍາເນີນ ກອງປະຊຸມອາຊຽນ ແລະ ການພັດທະນາປະເທດຊາດ.

ພ້ອມນີ້, ສະຫາຍຮອງລັດຖະມົນຕີກະຊວງປ້ອງກັນປະເທດ ຍັງໄດ້ເນັ້ນໜັກວຽກງານທີ່ຈະສຸມ ໃສ່ຈັດຕັ້ງປະຕິບັດ ໃນປີ 2025 ເປັນຕົ້ນ ຕ້ອງຮັກສາຄວາມສາມັກຄີເປັນເອກະພາບ, ປະຕິບັດແບບ ແຜນວີທີເຮັດວຽກຕາມຫລັກການລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດ ຊອບຢ່າງຈະແຈ້ງ; ພ້ອມກັນຮໍ່າຮຽນນໍາວຽກຕົວຈິງ, ຮຽນນໍາໝູ່ຄະນະ, ຮຽນນໍາມະຫາຊົນ, ຈິງໃຈຕຳນິສົ່ງຂ່າວ ຊ່ວຍເຫລືອ, ຖອດຖອນບົດຮຽນເຊິ່ງກັນ ແລະ ກັນ, ຕ້ານທັດສະນະແນວຄິດໃນຕົວ, ໂຍນຄວາມຜິດໃຫ້ຄົນອື່ນ; ຄະນະພັກ-ຄະນະບັນຊາແຕ່ລະຂັ້ນ ຕ້ອງຕັ້ງໜ້າເປັນເຈົ້າການນໍາພາ-ຊີ້ນໍາ ການຄຸ້ມຄອງ, ປົກປັກຮັກສາ ແລະ ນໍາໃຊ້ພາຫະນະ, ວັດຖຸ, ເງິນຄໍາ, ເຄື່ອງນຸ່ງຫົ່ມ ຕາມລະບອບ ອັດຕາທີ່ຂັ້ນເທິງກຳນົດ, ຄຸ້ມຄອງ-ນໍາໃຊ້ຕົວເລກງົບປະມານ ທີ່ໄດ້ແບ່ງປັນໃຫ້ແໜ້ນໜາ ຮັດກຸມ, ນໍາໃຊ້ ຖືກຮ່ວງ, ຖືກເປົ້າໝາຍ ແລະ ຖືເອົາການປະຢັດເປັນສໍາຄັນ, ເອົາໃຈໃສ່ ຊຸກຍູ້ຂະບວນການຜະລິດ ແກ້ໄຂຊີວິດການເປັນຢູ່ ຂອງກົມກອງ ໃຫ້ເປັນຂະບວນຟົດຟື້ນ ແລະ ແຂງແຮງ. ໃນນັ້ນ, ສຸມໃສ່ການປູກ-ການລ້ຽງຕາມລະດູການ, ຕາມຈຸດພິເສດພູມສັນຖານ, ສະພາບດີນຟ້າອາກາດຂອງທ້ອງຖິ່ນ, ຜະລິດໃຫ້ກາຍເປັນສີນຄ້າ ເພື່ອສ້າງແຫລ່ງລາຍຮັບ, ເປັນທ່າແຮງ ສະໜອງພະລາທິການກັບທີ່ ເພື່ອ ແກ້ໄຂຊີວິດປະຈຳວັນ ແລະ ມີສ່ວນແຮ່ສໍາຮອງໄວ້ໃນກົມກອງ; ເອົາໃຈໃສ່ປັບປຸງ ກໍ່ສ້າງພະນັກ ງານວິຊາສະເພາະພະລາທິການ, ທາງດ້ານຈຳນວນ ແລະ ຄຸນນະພາບ ເປັນຕົ້ນ ການສຶກສາອົບຮົມທາງດ້ານທັດສະນະການເມືອງ, ທັດສະນະຮັບໃຊ້, ຄຸນສົມບັດ, ຄວາມຮູ້, ຄວາມສາມາດ, ຄວາມຊື່ສັດບໍລິ ສຸດ, ຄວາມໂປ່ງໃສ, ຄວາມຮັບຜິດຊອບ ແລະ ແບບແຜນວິທີເຮັດວຽກ; ສ້າງໃຫ້ໄດ້ພະນັກງານສາມຮຸ່ນ ເພື່ອສືບທອດປ່ຽນແທນຢ່າງຕໍ່ເນື່ອງ, ນໍາໃຊ້ພະນັກງານວິຊາການໃຫ້ຖືກຕ້ອງ ຕາມຄວາມຮູ້ຄວາມສາມາດ ແລະ ຖືກຕາມຂະແໜງວິຊາສະເພາະທີໄດ້ຮຽນມາເພື່ອ ຮັບປະກັນໃຫ້ແກ່ການປະຕິບັດໜ້າທີ່ ຮັບປະກັນການລ້ຽງດູທັບ, ສ້າງປະຖົມປັດໄຈໃຫ້ ແກ່ການປັບປຸງກໍ່ສ້າງເຫລົ່າຮົບ ພະລາທິການກ້າວຂຶ້ນສູ່ ແບບແຜນ ທັນສະໄໝ.

ຂ່າວ-ພາບ: ຄຳອ້າຍ ທອງວັນ

KPL