ຂປລ. ກະຊວງສຶກສາທິການ ແລະ ກິລາ (ສສກ) ຮ່ວມກັບລັດຖະບານ ອົດສະຕຣາລີ ໂດຍຜ່ານແຜນງານ ປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງ ການສຶກສາຂັ້ນພື້ນຖານ ໃນ ສປປ ລາວ (ແຜນງານບິຄວາ) ຈັດກອງປະຊຸມສະຫລຸບ ກ່ຽວກັບການທົດລອງ ສື່ການຮຽນ-ການສອນ ຝຶກເວົ້າພາສາລາວ ໃຫ້ນັກຮຽນ ຂັ້ນ ປ1 ເວົ້າພາສາອື່ນ ທີ່ບໍ່ແມ່ນພາສາລາວ ເປັນຫລັກໃນຄອບຄົວ ໃນວັນທີ 11 ກໍລະກົດ 2024 ທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ອຸທິດ ທິບມະນີ ຮອງຜູ້ອໍານວຍການ ສະຖາບັນຄົ້ນຄວ້າ ວິທະຍາສາດການສຶກສາ (ສວສ), ທ່ານ ນາງ ວາເນັດຊ້າ ເຮັກກາທີ້ ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ.

ກອງປະຊຸມຄັ້ງນີ້, ເພື່ອສະເຫລີມສະຫລອງ ຄວາມສຳເລັດຂອງກະຊວງ ສສກ ໃນການສະໜັບສະໜູນ ນັກຮຽນ ທີ່ບໍ່ເວົ້າພາສາລາວ ເປັນພາສາຫລັກໃນຄອບຄົວ ແລະ ວາງແຜນການໃນຕໍ່ໜ້າ ເພື່ອຂະຫຍາຍວຽກງານດັ່ງກ່າວ. ພ້ອມນີ້, ບັນດາພາກສ່ວນທີ່ກ່ຽວຂ້ອງ ໃນວາງແຜນຈັດຕັ້ງປະຕິບັດ ໃຫ້ບົດຮຽນຝຶກເວົ້າພາສາລາວ ຈະໄດ້ນຳເອົາບົດຮຽນດັ່ງກ່າວ ໄປຜັນຂະຫຍາຍໃນທົ່ວປະເທດ ໂດຍຈະເລີ່ມ ໃນສົກຮຽນໜ້າ ເພື່ອແນໃສ່ນັກຮຽນ ທີ່ບໍ່ໄດ້ເວົ້າພາສາລາວ ເປັນພາສາຫລັກໃນຄອບຄົວ ເພື່ອສະໜັບສະໜູນການຮຽນຮູ້ພາສາ ໃຫ້ມີປະສິດທິພາບ ສໍາລັບເດັກນ້ອຍທີ່ ບໍ່ໄດ້ເວົ້າພາສາລາວ ເປັນພາສາຫລັກໃນຄອບຄົວ ໂດຍສະເພາະ ການປັບປຸງຜົນການຮຽນຂອງເດັກຍິງ ແລະ ເດັກຊາຍ ເປັນຕົ້ນ ຜູ້ທີ່ປະສົບກັບຄວາມດ້ອຍໂອກາດ ຈະມີຜົນດີໃນໄລຍະຍາວ ແກ່ການພັດທະນາຂອງລາວ.

ທ່ານ ອຸທິດ ທິບມະນີ ກ່າວວ່າ: ໝາກຜົນທີ່ໜ້າປະທັບໃຈ ຂອງໄລຍະທົດລອງ ໄດ້ເຮັດໃຫ້ ເຫັນຢ່າງຊັດເຈນວ່າ ບົດຮຽນຝຶກເວົ້າພາສາລາວ ຄວນຈະມີຢູ່ທຸກໂຮງຮຽນ ທີ່ມີນັກຮຽນ ຕ້ອງການການຊ່ວຍເຫລືອ ດ້ານການຮຽນພາສາລາວເພີ່ມຕື່ມ ເພາະເຂົາເຈົ້າບໍ່ໄດ້ເວົ້າພາສາລາວ ເປັນພາສາຫລັກ ໃນຄອບຄົວ. ໂຄງການເວົ້າພາສາລາວ ເສີມສ້າງທັກສະພາສາລາວ ໃຫ້ນັກຮຽນ ຂັ້ນ ປ1 ເວົ້າພາສາອື່ນ ທີ່ບໍ່ແມ່ນພາສາລາວເປັນຫລັກໃນຄອບຄົວ, ເຊິ່ງ ສສກ ໄດ້ເລີ່ມການທົດລອງບົດຮຽນດັ່ງກ່າວ ໃນປີ 2019 ໂດຍໄດ້ຮັບການສະໜັບສະໜູນຈາກ ລັດຖະບານອົດສະຕຣາລີ ໂດຍຜ່ານແຜນ ງານບີຄວາ, ອີງໃສ່ຜົນສຳເລັດຂອງການທົດລອງດັ່ງກ່າວ, ບົດຮຽນຝຶກເວົ້າພາສາລາວ ໄດ້ຂະຫຍາຍອອກເປັນ 21 ເມືອງ ໃນປີ 2023-2024 ໂດຍໄດ້ຮັບການສະໜັບສະໜູນເພີ່ມເຕີມ ຈາກອົງການພັດທະນາສາກົນ ຂອງປະເທດສະຫະລັດ ອາເມລິກາ. ຜົນຂອງການທົດລອງ ໂດຍລວມແມ່ນ ໄດ້ຮັບໝາກຜົນດີຫລາຍ ເຊິ່ງໄດ້ນຳໄປສູ່ການອະນຸມັດ ໃຫ້ກາຍເປັນບົດຮຽນ ທີ່ສາມາດສອນໄດ້ສຳລັບຂັ້ນ ປ1 ໃນທົ່ວປະເທດ ທັງເປັນການຮັບປະກັນໃຫ້ຄູສອນຂັ້ນ ປ1 ທຸກຄົນ ໄດ້ຮັບການຝຶກອົບຮົມ ໃນວິທີການສິດສອນບົດຮຽນ ຝຶກເວົ້າພາສາລາວ ແລະ ມີການເຂົ້າເຖິງແຫລ່ງ ການຮຽນ-ການສອນ ດັ່ງກ່າວ.

ປະເທດລາວ ເປັນປະເທດທີ່ມີຄວາມຫລາກຫລາຍ ທາງດ້ານວັດທະນະທຳ ແລະ ພາສາຊົນເຜົ່າ, ມີຫລາຍກວ່າ 50 ພາສາເວົ້າ, ເດັກນ້ອຍຫລາຍຄົນ ເມື່ອເລີ່ມເຂົ້າຮຽນ ຍັງເວົ້າພາສາອື່ນເປັນຫລັກ ທີ່ບໍ່ແມ່ນພາສາລາວ ໂດຍສະເພາະ ໃນເຂດຊົນນະບົດ ແລະ ເຂດຫ່າງໄກສອກຫລີກ. ພາສາລາວ ແມ່ນພາສາຫລັກທີ່ໃຊ້ໃນໂຮງຮຽນ, ຖ້າເດັກນ້ອຍ ຍັງບໍ່ທັນໄດ້ພັດທະນາທັກສະພື້ນຖານພາສາລາວ ໃນຊັ້ນປະຖົມ ພວກເຂົາຍັງຈະຜະເຊີນກັບສິ່ງທ້າທາຍ ຕະຫລອດເວລາການຮຽນຂອງເຂົາເຈົ້າ. ຜົນການປະເມີນນັກຮຽນ ໃນໄລຍະຜ່ານມາ ສະແດງໃຫ້ເຫັນວ່າ ເດັກນ້ອຍຫລາຍຄົນ ຈາກຊຸມຊົນ ຊົນເຜົ່າທີ່ບໍ່ເວົ້າພາສາລາວ ເປັນພາສາຫລັກໃນຄອບຄົວ ແມ່ນມີສ່ວນຮ່ວມໜ້ອຍຫລາຍ ໃນການຮຽນ. ນອກຈາກນີ້, ການຄົ້ນຄວ້າຢ່າງຕໍ່ເນື່ອງ ສະແດງໃຫ້ເຫັນວ່າ ຄວາມສາມາດ ໃນການເວົ້າພາສາ ຕາມສື່ການຮຽນ-ການສອນ (ພາສາລາວ) ແມ່ນເງື່ອນໄຂເບື້ອງຕົ້ນທີ່ຈຳເປັນ ເພື່ອໃຫ້ເດັກນ້ອຍ ມີການພັດທະນາການ ຮູ້ໜັງສື (ການອ່ານ ແລະ ຂຽນພາສາລາວ).

KPL