ຂປລ
ຂປລ. ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ໃນໂອກາດ ເຄື່ອນໄຫວພົບປະໂອ້ລົມ ພະນັກງານຫລັກແຫລ່ງນຳພາ-ຄຸ້ມຄອງ ເມືອງວຽງທອງ ໃນວັນທີ 12 ມິຖຸນາ 2024 ນີ້, ທ່ານ ບົວສອນ ບຸບຜາວັນ ອາດີດນາຍົກລັດຖະມົນຕີ ໄດ້ໃຫ້ທິດຊີ້ນໍາຫລາຍວຽກຈຸດສຸມ ເພື່ອເປັນບ່ອນອີງໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ຂອງເມືອງໃຫ້ໄດ້ຮັບຜົນດີ
ຂປລ. ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ໃນໂອກາດ ເຄື່ອນໄຫວພົບປະໂອ້ລົມ ພະນັກງານຫລັກແຫລ່ງນຳພາ-ຄຸ້ມຄອງ ເມືອງວຽງທອງ ໃນວັນທີ 12 ມິຖຸນາ 2024 ນີ້, ທ່ານ ບົວສອນ ບຸບຜາວັນ ອາດີດນາຍົກລັດຖະມົນຕີ ໄດ້ໃຫ້ທິດຊີ້ນໍາຫລາຍວຽກຈຸດສຸມ ເພື່ອເປັນບ່ອນອີງໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ຂອງເມືອງໃຫ້ໄດ້ຮັບຜົນດີ ເປັນຕົ້ນ ຂຸດຄົ້ນທ່າແຮງຊັບພະຍາກອນ ທີ່ບົ່ມຊ້ອນຂອງເມືອງ, ເປີດກວ້າງການລົງທຶນ ດ້ານອຸດສາຫະກໍາ ແລະ ການບໍລິການ, ການທ່ອງທ່ຽວພາຍໃນ ແລະ ຕ່າງປະເທດ, ຫັນເອົາການຜະລິດກະສິກຳ-ອຸດສາຫະກຳເປັນສິນ ຄ້າດ້ວຍການຍົກສູງປະສິດທິພາບ ນຳໃຊ້ດ້ານເຕັກນິກ-ວິທະຍາສາດ, ພັດທະນາພື້ນຖານໂຄງລ່າງ ດ້ວຍ ແຫລ່ງທຶນງົບປະມານແຫ່ງລັດ, ສິນເຊື່ອທະນາຄານ, ທຶນຂອງປະຊາຊົນ, ສ້າງຕັ້ງ-ຄຸ້ມຄອງກອງທຶນບ້ານ, ການຊ່ວຍເຫລືອຈາກການຊ່ວຍເຫລືອ ເພື່ນການພັດທະນາ(ODA) ແລະ ການລົງທຶນຈາກຕ່າງປະເທດ. ຄຽງຄູ່ກັນັ້ນ, ຈະຕ້ອງໄດ້ປັບປຸງກົງຈັກການເມືອງ, ການຈັດຕັ້ງໃຫ້ມີຄວາມເຂັ້ມແຂງ ສາມາດຕອບສະໜອງ ໄດ້ຕາມແນວ ທາງຂອງພັກ.
ໂອກາດນີ້, ທ່ານ ຄຳມອນ ໄຊພູມມີ ເຈົ້າເມືອງວຽງທອງ ໄດ້ລາຍງານກ່ຽວກັບສະພາບ ເສດຖະກິດ-ສັງຄົມເມືອງໄລຍະຜ່ານມາ, ເມືອງວຽງທອງ ປະກອບ ມີ 6 ກຸ່ມບ້ານພັດທະນາ, ມີ 34 ບ້ານ, ມີ 7.103 ຄົວເຮືອນ, ມີພົນລະເມືອງທັງໝົດ 39.131 ຄົນ, ຍິງ 18.186 ຄົນ, ຄຸ້ມຄອງການລົງທຶນຂອງລັດ, ພາກເອກະຊົນທັງພາຍໃນ ແລະ ຕ່າງປະເທດ, ເສດຖະກິດຂະຫຍາຍຕົວສະເລ່ຍ 9,56% ຕໍ່ປີ, ທຽບໃສ່ແຜນ 5 ປີ ແມ່ນ 5,85%,. ໄລຍະ 5 ເດືອນຕົ້ນປີ 2024 ເກັບລາຍຮັບໄດ້ 4,1 ຕື້ກວ່າກີບ ເທົາກັບ 75,97%, ລາຍຮັບສະເລ່ຍຕໍ່ຫົວຄົນເທົ່າກັບ 19 ລ້ານກວ່າກີບ/ຄົນ ຫລື ເທົ່າກັບ 967,86 ໂດລາສະຫະລັດ, ສ້າງບ້ານ ສາທາລະນະສຸກແບບຢ່າງໄດ້ 34 ບ້ານ ເທົ່າກັບ 100%, ສ້າງບ້ານວັດທະນະທໍາໄດ້ 97% (ຍັງ 1 ບ້ານ), ດໍາເນີນກອງປະຊຸມໃຫຍ່ໜ່ວຍພັກ ສໍາເລັດ 85 ຮາກຖານພັກ, ຍັງບໍ່ທັນສໍາເລັດ 10 ຮາກຖານພັກ, ມີ 3 ຄະນະພັກຮາກຖານ ແລະ 7 ໜ່ວຍພັກ. ປັດຈຸບັນ, ມີບ້ານພົ້ນທຸກແລ້ວ25 ບ້ານ ເທົ່າກັບ 73,5%, ບ້ານທຸກຍາກ 9 ບ້ານ ເທົ່າກັບ 26,5%, ມີຄອບຄົວພົ້ນທຸກກວມເອົາ 92,2%(ຍັງທຸກຍາກ 417 ຄອບຄົວ), ບ້ານພົ້ນທຸກກວມເອົາ 73,52% (ຍັງ 9 ບ້ານ) ຍັງເປັນເມືອງທຸກຍາກ ປະເມີນຕາມດໍາລັດ 348.
ໂອກາດດຽວກັນນີ້, ທ່ານ ບົວສອນ ບຸຜາວັນ ຍັງໄດ້ມອບຄອມພິວເຕີໂນດບຸກ ຈຳນວນ 5 ເຄື່ອງ,ເຄື່ອງນຸງຫົ່ມ 2 ເປົາ ແລະ ອຸປະກອນກິລາ-ອຸປະກອນການສຶກສາ ມອບໃຫ້ເມືອງວຽງທອງ ຕື່ມອີກ.
ຂ່າວ-ພາບ: ສາຍສະໝອນ
KPL
