ຂປລ. ໃນໂອກາດດັ່ງກ່າວ, ສອງຝ່າຍໄດ້ລົງເລິກປຶກສາຫາລືແລກປ່ຽນຄໍາຄິດເຫັນ ເພື່ອແນໃສ່ການຈັດຕັ້ງຜັນຂະຫຍາຍຜົນການຢ້ຽມຢາມລັດຖະກິດ ທີ່ ສປ ຈີນ ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໃນຕົ້ນເດືອນມິຖຸນາ 2026 ທີ່ຜ່ານມາ ໂດຍສະເພາະແມ່ນການຈັດຕັ້ງປະຕິບັດການຕົກລົງເປັນເອກະພາບຂອງການນໍາຂັ້ນສູງສຸດຂອງສອງປະເທດ ວ່າດ້ວຍການຍົກລະດັບການກໍ່ສ້າງຄູ່ຮ່ວມຊາຕາກຳ ລາວ-ຈີນ ທີ່ເຂັ້ມແຂງໜຽວແໜ້ນໃນທຸກສະພາບການຂອງຍຸກໃໝ່ໃຫ້ເປັນຮູບປະທໍາ. ນອກຈາກນີ້, ຝ່າຍລາວຍັງໄດ້ຕີລາຄາສູງຕໍ່ການເປັນເຈົ້າພາບ ຈັດງານວາງສະແດງສິນຄ້າອາຊຽນ-ຈີນ ຄັ້ງທີ 23 ລວມທັງການພັດທະນາເສດຖະກິດ-ສັງຄົມ ຂອງເຂດກວາງຊີໃນຖານະເປັນປະຕູສູ່ປະເທດອາຊຽນ ແລະ ຍຶດໝັ້ນສືບຕໍ່ສະໜັບສະໜູນຫລັກການຈີນດຽວ ແລະ ບັນດາ 4 ຂໍ້ລິເລີ່ມທີ່ສະເໜີໂດຍ ສະຫາຍ ຈີນ ແລະ ຍິນດີສືບຕໍ່ຮັດແໜ້ນການປະສານສົມທົບໃນເວທີພາກພື້ນ ແລະ ສາກົນ.

    ສອງຝ່າຍໄດ້ເອກະພາບກັນສືບຕໍ່ຊຸກຍູ້ບັນດາພາກສ່ວນກ່ຽວຂ້ອງຂອງສອງຝ່າຍ ໃນການຈັດຕັ້ງປະຕິບັດບັນດາທິດທາງ, ແຜນການການຮ່ວມມືທີ່ການນໍາສູງສຸດໄດ້ຕົກລົງເປັນເອກະພາບກັນ ໂດຍສະເພາະແມ່ນໂຄງການຮ່ວມມືຂະໜາດໃຫຍ່ ທີ່ເປັນລັກສະນະຍຸດທະສາດ ເຊັ່ນ: ການເຊື່ອມໂຍງ-ເຊື່ອມຈອດ, ການພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ ສປປ ລາວ, ການຮ່ວມມືດ້ານສາທາລະນະສຸກ, ການສຶກສາ, ດ້ານວັດທະນະທໍາ-ສັງຄົມ ແລະ ເຫັນດີສືບຕໍ່ເພີ່ມທະວີການຮ່ວມມືໃນດ້ານຕ່າງໆ ໃຫ້ແຕກດອກອອກຜົນຂຶ້ນເລື້ອຍໆ ໂດຍສະເພາະການຮ່ວມມືເພື່ອພັດທະນາໂຄງການທີ່ປິ່ນອ້ອມທາງລົດໄຟ ລາວ-ຈີນ ໃຫ້ມີບາດກ້າວຂະຫຍາຍຕົວດ້ວຍຄຸນນະພາບໃໝ່ ເພື່ອຮັບປະກັນຜົນປະໂຫຍດໃຫ້ແກ່ສອງປະເທດຢ່າງແທ້ຈິງ. ພ້ອມກັນນີ້, ສອງຝ່າຍ ເຫັນວ່າ ປີ 2026 ແມ່ນປີຄົບຮອບການສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ ແລະ ເປັນປີມິດຕະພາບລາວ-ຈີນ, ສອງຝ່າຍຈະສືບຕໍ່ຊຸກຍູ້ແລກປ່ຽນການໄປມາຫາສູ່ ແລະ ຢ້ຽມຢາມເຊິ່ງກັນ ແລະ ກັນ ຂອງການນຳຂັ້ນສູນກາງ ແລະ ຂັ້ນທ້ອງຖິ່ນໃຫ້ຫລາຍຂຶ້ນກວ່າເກົ່າ; ຍິນດີສືບຕໍ່ຊີ້ນໍາພາກສ່ວນທີ່ກ່ຽວຂ້ອງຂອງສອງຝ່າຍ ເພີ່ມເສີມຂະຫຍາຍສາຍພົວພັນມິດຕະພາບອັນເປັນມູນເຊ້ືອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ກໍຄື ການຮ່ວມມືແບບຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານຕາມທິດ 4 ດີ ແລະ ການສ້າງຄູ່ຮ່ວມຊາຕາກຳ ລາວ-ຈີນ, ລາວ- ຈີນ ທີ່ເຂັ້ມແຂງໜຽວແໜ້ນ ໃນທຸກສະພາບການຂອງຍຸກໃໝ່ ໃຫ້ນັບມື້ນັບເຂ້ົາສູ່ລວງເລິກ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ໃນຕໍ່ໜ້າ.

KPL