ຂປລ
ທຸກສິ່ງທຸກຢ່າງ ໂດຍປະຊາຊົນ ແລະ ເພື່ອປະຊາຊົນ, ເປັນຜູ້ແທນຂອງປະຊາຊົນຕ້ອງຊ່ວຍເຫລືອປະຊາຊົນທີ່ເຂົາເຈົ້າຂາດເຂີນ, ສະເໜີບັນຫາຕ່າງໆ ຕ້ອງເອົາໃຈໃສ່ແກ້ໄຂ.
*ທຸກສິ່ງທຸກຢ່າງ ໂດຍປະຊາຊົນ ແລະ ເພື່ອປະຊາຊົນ, ເປັນຜູ້ແທນຂອງປະຊາຊົນຕ້ອງຊ່ວຍເຫລືອປະຊາຊົນທີ່ເຂົາເຈົ້າຂາດເຂີນ, ສະເໜີບັນຫາຕ່າງໆຕ້ອງເອົາໃຈໃສ່ແກ້ໄຂ. ເຖິງແກ້ໄຂບໍ່ໄດ້ທຸກດ້ານ ຫລື 100%, ແຕ່ກໍໃຫ້ໄດ້ຈັກເຄິ່ງໜຶ່ງຂອງບັນຫາທີ່ປະຊາຊົນສະເໜີ. ຢ່າງໃດກໍດີຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 7 ແຂວງໄຊຍະບູລີ ເຊິ່ງຍາມໃດກໍເປັນຫ່ວງຕໍ່ການດຳລົງຊີວິດຂອງປະຊາຊົນເຂດຕົນ ໂດຍໄດ້ຕັ້ງໜ້າລະດົມທຶນຮ່ອນພັດທະນາພື້ນຖານໂຄງລ່າງທີ່ຕິດພັນກັບການດຳລົງຊີວິດປະຈຳວັນ. ພົ້ນເດັ່ນເມ່ືອທ້າຍປີຜ່ານມານີ້ ສາມາດລະທຶນຊ່ວຍສ້າງລະບົບນ້ຳລິນໃຫ້ປະຊາຊົນບ້ານປາກລອງ ເມືອງໄຊ ສະຖານ ເຮັດໃຫ້ບ້ານດັ່ງກ່າວມີການພັດທະນາໄປອີກບາດກ້າວໜຶ່ງ ທັງຫລຸດຜ່ອນການແບກຫາບນ້ຳຄືເມື່ອກ່ອນໂດຍສິ້ນເຊີງ.
ທ່ານ ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ, ສະມາຊິກສະພາແຫ່ງຊາດເຂດ ເລືອກຕັ້ງທີ 7 ແຂວງໄຊຍະບູລີ ໃຫ້ສຳພາດໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ 9 ວ່າ: ໃນໄລຍະຜ່ານມາຄະນະ ສສຊ ເຂດເລືອກຕັ້ງຕົນ ໄດ້ເອົາໃຈໃສ່ເຄື່ອນໄຫວພົບປະປະຊາຊົນ ແລະ ຜ່ານການເຄື່ອນໄຫວດັ່ງກ່າວ ກໍມີຫລາຍໆບັນຫາທີ່ຕິດພັນກັບການດຳລົງຊີວິດຂອງປະຊາຊົາບັນດາເຜົ່າ. ໜຶ່ງໃນຫລາຍຂໍ້ສະເໜີນັ້ນ ຫລັກໆອັນໜຶ່ງກໍແມ່ນລະບົບນ້ຳລິນ, ນ້ຳສະອາດເຊິ່ງມີຫລາຍບ້ານຍັງບ່ໍທັນມີລະບົບນ້ຳລິນ ເພື່ອຊົມໃຊ້ໃນການດຳລົງຊີວິດປະຈຳວັນ.
ຍ້ອນເຫັນໄດ້ຄວາມຈຳເປັນຕໍ່ການດຳລົງຊີວິດປະຈຳວັນຂອງປະຊາຊົນ, ຄະນະ ສສຊ ຕົນກໍບໍ່ໄດ້ປະລະລະເລີຍ ໂດຍໄດ້ຍາດແຍ່ງເອົາທຶນຮອນສຸມໃສ່ກໍ່ສ້າງລະບົນ້ຳລິນໃຫ້ແກ່ເຂົາເຈົ້າ. ເວົ້າລວມ, ເວົ້າສະເພາະບ້ານປາກລອງ ເມືອງ ໄຊສະຖານ ເຊິ່ງເປັນບ້ານໜຶ່ງທີ່ມີຄວາມຫຍຸ້ງຍາກທາງດ້ານນ້ຳຊົມໃຊ້ຫລາຍກວ່າໝູ່ ໂດຍກ່ອນຈະໄດ້ນ້ຳຄຸໜຶ່ງໃຊ້ກໍຕ້ອງໃຊ້ເວລາໄປແບກຫາບຈາກຫ້ວຍຮ່ອງ ແລະ ໄກ ເຊິ່ງການດຳລົງຊີວິດດັ່ງກ່າວ ໄດ້ສ້າງຄວາມລຳບາກໃຫ້ແກ່ປະຊາຊົນບ້ານນີ້ບໍ່ໜ້ອຍ. ແນວໃດກໍດີຄວາມລຳບາກດັ່ງກ່າວ ກໍໄດ້ຮັບການແກ້ໄຂໂດຍສິ້ນເຊີງແລ້ວຫລັງຄະນະ ສສຊ ໄດ້ລະດົມທຶນກໍ່ສ້າງລະບົບນ້ຳມີໄລຍະຄວາມຍາວປະມານ 7 ກິໂລແມັດ ເຂົ້າມາຫາບ້ານປາກລອງ ກໍເຮັດໃຫ້ປະຊາຊົນມີນ້ຳຊົມໃຊ້ຢ່າງສະດວກສະບາຍ ແລະ ຫລຸດຜ່ອນການແບກຫາບຄືເມື່ອກ່ອນທັງປະກອບສ່ວນເຂົ້າໃນການແກ້ໄຂຄວາມທຸກຍາກປັບປຸງຊີວິດການ ເປັນຢູ່ດີຂຶ້ນ ແລະ ຊົມໃຊ້ນ້ຳສະອາດຢ່າງທົ່ວເຖິງກັນແລ້ວ.
ແນວໃດກໍຕາມນອກຈາກທີ່ກ່າວມານັ້ນແລ້ວ, ຄະນະ ສສຊ ເຂດເລືອກຕັ້ງທີ 7 ແຂວງໄຊຍະບູລີ ຍັງເອົາໄດ້ເອົາໃຈໃສ່ຕິດຕາມກວດກາວຽກງານຕ່າງໆ ໂດຍສະເພາະໄດ້ສົ່ງເສີມທຸກພາກສ່ວນທັງພາກລັດ- ເອກະຊົນລວມເຖິງປະຊາຊົນພ້ອມກັນຈັດຕັ້ງປະຕິບັດ ສອງວາລະແຫ່ງຊາດຢ່າງເປັນຂະບວນຟົດຟື້ນ. ໃນ ນັ້ນ, ສະເພາະວາລະແຫ່ງຊາດວ່າດ້ວຍການຕ້ານຢາເສບຕິດ ກໍໄດ້ເນັ້ນໜັກທັງລະດົມໃຫ້ປະຊາຊົນເອົາໃຈໃສ່ສຶກສາອົບຮົມລູກຫລານບໍ່ໃຫ້ໄປຫຍຸ້ງກ່ຽວສິ່ງເສບຕິດອັນຈະພາໃຫ້ເກີດປະກົດການຫຍໍ້ທໍ້, ສ້າງຄວາມວຸ້ນວາຍໃນສັງຄົມທີ່ແກ້ໄຂບໍ່ມີມື້ສິ້ນສຸດຈັກເທື່ອ. ດັ່ງນັ້ນ, ຮຽກຮ້ອງໃຫ້ຈົ່ງເອົາໃຈໃສ່ທຳການຜະລິດກະສິ ກຳໃຫ້ຫລາຍ ກາຍເປັນສິນຄ້າທີ່ຖືກຕ້ອງຕາມແນວທາງຂອງລັດຖະບານວາງອອກ ແລະ ນຳລາຍຮັບມາປັບປຸງຊີວິດການເປັນຢູ່ດ້ວຍຄວາມປອດໃສຂາວສະອາດ. ທ່ານ ລີເບີ ລີບົວປາວ ກ່າວ.
ໂດຍ: ຢ່າຕົ່ງ
KPL
