ຂປລ. ໃນໂອກາດເຄື່ອນໄຫວຊຸກຍູ້ ວຽກງານໄອຍະການປະຊາຊົນ ຢູ່ 3 ແຂວງຄື: ແຂວງໄຊສົມບູນ, ແຂວງຊຽງຂວາງ ແລະ ແຂວງຫົວພັນ ລະຫວ່າງວັນທີ 12-17 ພຶດສະພາ 2024 ນີ້, ທ່ານ ບຸນທັນ ບຸນທະວິໄລ ຮອງຫົວໜ້າອົງການ ໄອຍະການປະຊາຊົນສູງສຸດ (ອອປສ) ໄດ້ມີຄຳເຫັນໂອ້ລົມພະນັກງານຫລັກແຫລ່ງ ທົ່ວອົງການ ໄອຍະການປະຊາຊົນ ແຂວງໄຊສົມບູນ ໂດຍທ່ານໄດ້ເນັ້ນໃຫ້ຄະນະນໍາ ອົງການໄອຍະການປະຊາຊົນແຂວງ ຕ້ອງຖືສໍາຄັນວຽກງານສຶກສາອົບຮົມ ການເມືອງແນວຄິດ ພະນັກງານຢ່າງເລິກເຊິ່ງ, ເປັນປົກກະຕິຕໍ່ເນື່ອງ, ມີຄວາມອຸ່ນ ອຽນທຸ່ນທ່ຽງ, ຮ່ວມແຮງຮ່ວມໃຈກັນສ້າງຜົນງານ; ສືບຕໍ່ວຽກງານຄຸ້ມຄອງ-ນໍາພາພະນັກງານ ໂດຍຕິດພັນ ກັບການຊັບຊ້ອນ, ບັນຈຸ, ໂຍກຍ້າຍ, ແຕ່ງຕັ້ງ ເຊິ່ງແມ່ນອົງການໄອຍະການສູງສຸດ ເປັນຜູ້ຈັດຕັ້ງປະຕິບັດ; ສ້າງກົນໄກ ປະສານງານກັບພາກສ່ວນກ່ຽວຂ້ອງ ໂດຍມີການປະຊຸມສ່ອງແສງລາຍງານ, ສືບຕໍ່ແກ້ໄຂບັນຫາຄໍາຮ້ອງຟ້ອງ ຕິດພັນ ກັບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ສືບຕໍ່ເຮັດໜ້າທີ່ວຽກງານກວດກາທົ່ວໄປ ພ້ອມທັງສ້າງຄວາມເຂັ້ມ ແຂງໃຫ້ແກ່ພະນັກງານ.

ໃນໂອກາດນີ້, ທ່ານ ຄໍາເພັດ ດວງມາລາ ຫົວໜ້າອົງການໄອຍະການປະຊາຊົນ ແຂວງໄຊສົມບູນ ໄດ້ໃຫ້ຮູ້ວ່າ: ໃນໜຶ່ງປີຜ່ານມາ, ອົງການໄອຍະການປະຊາຊົນ ແຂວງໄຊສົມບູນ ໄດ້ຮັບສໍານວນຄະດີຢາເສບຕິດ ທັງໜົດ 39 ເລື່ອງ, ແກ້ໄຂໄດ້ 39 ເລື່ອງເທົ່າກັບ 100%, ໄດ້ເຂົ້າຮ່ວມຖະແຫລງຄະດີຢາເສບຕິດທີ່ປະຊຸມສານ 24 ເລື່ອງ, ສານຕັດສິນເອົາຕາມຄໍາຖະແຫລງ 23 ເລື່ອງ, ໄດ້ສະເໜີຄັດຄານຄໍາຕັດສິນຂອງສານ 1 ເລື່ອງ; ຄະດີອາຍາມີທັງໜົດ 257 ເລື່ອງ, ຄ້າງມາ 202 ເລື່ອງ, ຄະດີເຂົ້າໃໜ່ 55 ເລື່ອງ, ແກ້ໄຂໄດ້ 14 ເລື່ອງ, ພວມຈັດຕັ້ງປະຕິບັດ 243 ເລື່ອງ, ຄະດີບໍ່ສາມາດຈັດຕັ້ງປະຕິບັດໄດ້ 13 ເລື່ອງ; ສໍາລັບຄະດີແພ່ງລວມທັງໜົດ 40 ເລື່ອງ, ຄ້າງມາ 28 ເລື່ອງ, ເຂົ້າໃໜ່ 6 ເລື່່ອງ, ປະຕິບັດສໍາເລັດ 6 ເລື່ອງ, ພວມຈັດຕັ້ງປະຕິບັດ 36 ເລື່ອງ. ພ້ອມນີ້, ອົງການໄອຍະການປະຊາ ຊົນແຂວງໄຊສົມບູນ ແລະ ເຂດ ຍັງໄດ້ເອົາໃຈໃສ່ປະສານສົມທົບກັບ ເຈົ້າໜ້າທີ່ໆກ່ຽວຂ້ອງ ເພື່ອກວດກາການນໍາໃຊ້ ວິທີການສືບສວນ-ສອບສວນ ແລະ ການນໍາໃຊ້ມາດຕະການສະກັດກັ້ນ ເປັຍຕົ້ນ ໄດ້ອອກຄໍາແນະນໍາ 74 ສະບັບ, ຄໍາສັ່ງກັກຂັງພາງ 123 ສະບັບ, ຄໍາສັ່ງຕໍ່ການກັກຂັງພາງ 157 ສະບັບ, ຄໍາສັ່ງຈັບຕົວ 22 ສະບັບ, ຄໍາສັ່ງປ່ອຍຕົວ ພາງ 7 ສະບັບ, ຄໍາສັ່ງຊັດມ້ຽນຄະດີ 2 ສະບັບ, ຄໍາສັ່ງກວດຄົ້ນເຄຫາສະຖານ 23 ສະບັບ, ໜາຍຮຽກ 10 ສະບັບ ແລະ ໄດ້ເປີດກອງປະຊຸມຮ່ວມ ເພື່ອປຶກສາຫາລືການແກ້ໄຂຄະດີໄດ້ 14 ຄັ້ງ.

ໃນໂອກາດດຽວກັນ, ທ່ານ ບຸນທ່ຽງ ວິໄລວົງ ຮັກສາການຫົວໜ້າຫ້ອງການ ອົງການໄອຍະການປະຊາຊົນສູງສຸດ ກໍໄດ້ມອບຄອມພິວເຕີ ຈໍານວນ 2 ຊຸດ ໃຫ້ແກ່ອົງການໄອຍະການປະຊາຊົນ ແຂວງໄຊສົມບູນ ເພື່ອນໍາໃຊ້ເຂົ້າໃນວຽກງານ ໃຫ້ມີຄວາມສະດວກ ແລະ ວ່ອງໄວ ຂຶ້ນກວ່າເກົ່າ.

ຂ່າວ: ວົງເດືອນ

KPL