ຂປລ
ຂປລ. ພິທີມອບ-ຮັບ ໜ້າທີ່ລັດຖະມົນຕີກະຊວງກະສິກໍາ ແລະ ປ່າໄມ້ ລະຫວ່າງ ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ (ຜູ້ເກົ່າ) ແລະ ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ (ຜູ້ໃໝ່) ຈັດຂຶ້ນວັນທີ 6 ພຶດສະພາ 2024
ຂປລ. ພິທີມອບ-ຮັບ ໜ້າທີ່ລັດຖະມົນຕີກະຊວງກະສິກໍາ ແລະ ປ່າໄມ້ ລະຫວ່າງ ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ (ຜູ້ເກົ່າ) ແລະ ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ (ຜູ້ໃໝ່) ຈັດຂຶ້ນວັນທີ 6 ພຶດສະພາ 2024 ໃຫ້ກຽດເປັນປະ ທານຂອງ ສະຫາຍ ຄໍາພັນ ພົມມະທັດ ກໍາມະການກົມການເມືອງ, ເລຂາທິການສູນກາງພັກ, ປະທານກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ພ້ອມດ້ວຍ ພະນັກງານຫລັກແຫລ່ງເຂົ້າຮ່ວມ.
ໂອກາດນີ້, ທ່ານ ເພັດ ພົມພິພັກ ໄດ້ຜ່ານບົດສະຫລຸບວຽກງານໄລຍະຜ່ານມາ ໂດຍໄດ້ນຳພາ-ຊີ້ນຳການຈັດຕັ້ງເຊື່ອມຊຶມແນວທາງ, ມະຕິ, ຄໍາສັ່ງ, ເອກະສານທີ່ສໍາຄັນຕ່າງໆ ຂອງພັກ-ຂອງຊາດ ໃຫ້ສະມາຊິກພັກ, ພະນັກ ງານ-ລັດຖະກອນ ຢ່າງທົ່ວເຖິງ; ຫັນເອົາມະຕິ ກອງປະຊຸມໃຫຍ່ ຄັ້ງທີ XI ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IX ມາເປັນແຜນງານຂອງຂະແໜງການ ປະກອບມີ 4 ແຜນງານຄື: ແຜນງານຜະລິດສະບຽງອາຫານ ແລະ ໂພຊະນາການ, ແຜນງານຜະລິດກະສິກໍາເປັນສິນຄ້າ, ແຜນງານຄຸ້ມຄອງ ປ່າໄມ້ແບບຍືນຍົງ ແລະ ແຜນງານພັດທະນາຊົນນະບົດ ແລະ ແກ້ໄຂຄວາມທຸກຍາກ. ນັບແຕ່ປີ 2021 ມາຮອດປັດຈຸບັນ ໄດ້ມີຜົນງານທີ່ພົ້ນເດັ່ນຄື: ຂະແໜງກະສິກຳ ແລະ ປ່າໄມ້ ມີການຂະຫຍາຍຕົວເພີ່ມຂຶ້ນ ໃນແຕ່ລະປີຈາກ 1,2% ໃນປີ 2020 ມາເປັນ 2,5% ໃນປີ 2021 ແລະ 2,3% ໃນປີ 2022 (ຫລຸດລົງເນື່ອງຈາກສະພາບໂຄວິດ-19) ແລະ 3,4% ໃນປີ 2023 ລື່ນຄາດ ໝາຍທີ່ສະພາຮັບຮອງ 2,5%, ກວມເອົາ 21,4% ຂອງ GDP ໃນປີ 2023; ສຳເລັດການສ້າງ ນະ ໂຍບາຍແຫ່ງຊາດ ວ່າດ້ວຍການສົ່ງເສີມ ການປູກພືດ ແລະ ນະໂຍບາຍແຫ່ງຊາດ ວ່າດ້ວຍການສົ່ງເສີມການລ້ຽງສັດ ແລະ ສັດນໍ້າ; ໄດ້ເຕົ້າໂຮມຄືນ ບັນດາໂຮງງານປຸງແຕ່ງກະສິກຳ ແລະ ປ່າໄມ້ ທີ່ໄດ້ມອບໂອນມາຈາກ ກະຊວງອຸດສາຫະກຳ ແລະ ການຄ້າ, ພ້ອມທັງໄດ້ມີການປັບປຸງ ລະບົບການຜະລິດ ຂອງໂຮງງານ; ໄດ້ພະຍາຍາມສຸມໃສ່ ການເຈລະຈາດ້ານສຸຂານາໄມ ພືດ ແລະ ສັດ (SPS) ເພື່ອເປີດຕະ ຫລາດກັບປະເທດຄູ່ຄ້າ ເຊິ່ງຈຳນວນລາຍການສິນຄ້າ ໄດ້ເພີ່ມຂຶ້ນຈາກ 38 ລາຍການ ໃນປີ 2020 ມາເປັນ 64 ລາຍການ ໃນປີ 2024 (ເພີ່ມຂຶ້ນໃໝ່ 26 ລາຍການ) ແລະ ວຽກງານອື່ນໆ ລວມທັງ ວຽກງານຈຸດສຸມໃນຕໍ່ໜ້າ ຕື່ກອີກ.
ໃນໂອກາດດຽວກັນ, ສະຫາຍ ຄໍາພັນ ພົມມະທັດ ໄດ້ສະແດງຄວາມຊົມເຊີຍຕໍ່ຜົນງານ ແລະ ຜົນສໍາເລັດຫລາຍດ້ານ ໃນການຈັດຕັ້ງປະຕິບັດວຽກງານ ຂອງຂະແໜງກະສິກໍາ ແລະ ປ່າໄມ້ ໃນໄລຍະຜ່ານມາ. ພ້ອມທັງສະເໜີໃຫ້ຄະນພັກກະຊວງ ສືບຕໍ່ຮັກສາມູນເຊື້ອ ສາມັກຄີ ຕິດພັນກັບການພັດທະນາ ວຽກງານການກະສິກໍາ, ປ່າໄມ້ ແລະ ພັດທະນາຊົນນະບົດ ໃຫ້ມີບາດກ້າວໃໝ່; ເອົາໃຈໃສ່ວຽກງານ ການດໍາເນີນກວດກາ ການຈັດຕັ້ງຈັດຕັ້ງປະຕິບັດ, ຍົກສູງດ້ານສະມັດຕະພາບການຜະລິດ, ດ້ານແນວພັນ ແລະ ເຕັກນິກວິຊາການ ເພື່ອເຮັດໃຫ້ວຽກງານກະສິກໍາ ໄດ້ຮັບການຂະຫຍາຍຕົວເປັນກ້າວໆ.
ຂ່າວ: ສອນເພັດ
KPL