* ສປປ ລາວ ແມ່ນຫນຶ່ງໃນບັນດາ 10 ປະເທດສະມາຊິກອາຊຽນ ທີ່ມີທຸລະກິດຂົນສົ່ງສິນຄ້າທັງພາຍໃນ ແລະ ຕ່າງປະເທດຂະຫຍາຍຕົວເພີ່ມຂຶ້ນຢ່າງວ່ອງໄວ ພາຍຫລັງ ສປປ ລາວ ແລະ ສປ ຈີນ ເປີດໃຫ້ບໍລິການເສັ້ນທາງລົດໄຟລາວ-ຈີນ ນັບແຕ່ທ້າຍປີ 2021  ເຊິ່ງເຮັດໃຫ້ລະບົບຂົນສົ່ງທາງບົກເຊື່ອມຈອດກັນຢ່າງເປັນລະບົບ.

   ດັ່ງຮູ້ນໍາກັນ, ຫລາຍຊຸມປີຜ່ານມານ້ີ ມີບໍລິສັດຂົນສົ່ງຂອງຕ່າງປະເທດໄດ້ນໍາເອົາລົດບັນທຸກສິນຄ້າ ແລະ ຜູ້ໂດຍສານ(ແທັກຊີ) ມາແລ່ນ ໃນລາວເພີ່ມຂຶ້ນແບບກ້າວກະໂດດ ໂດຍສ່ວນໃຫຍ່ຂົນສົ່ງສິນຈາກລາວໄປຕ່າງປະເທດ,ຈາກອາຊຽນເຂົ້າໄປຈີນ ແລະ ຈາກຈີນໄປອາຊຽນ.ອີງຕາມການລາຍງານຂອງ ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງກະຊວງໂຍທາທິການ ແລະ ຂົນສົ່ງ (ຍທຂ) ກ່າວວ່າ: ການຈັດຕັ້ງປະຕິບັດການຄຸ້ມຄອງການຂົນສົ່ງທາງບົກລະຫວ່າງປະເທດຕ່ໍກອງປະຊຸມ ຍທຂ ທົ່ວປະເທດ ປະຈຳປີ 2023 ເມື່ອບໍ່ດົນມານີ້ວ່າ: ສຳລັບວິສາຫະກິດຂົນສົ່ງໂດຍສານ ທີ່ເຂົ້າຮ່ວມການແລ່ນລົດລະຫວ່າງປະເທດມີ  49 ຫົວໜ່ວຍ,  ມີພາຫະນະການຂົນສົ່ງໂດຍສານທັງໝົດ 320 ຄັນ,  ມີວິສາຫະກິດຂົນສົ່ງສິນຄ້າທີ່ດຳເນີນການຂົນສົ່ງລະຫວ່າງ ປະເທດມີ 80 ຫົວໜ່ວຍ, ມີພາຫະນະການຂົນສົ່ງສິນຄ້າທັງໝົດ 1.827 ຄັນ, ແຕ່ລະປີບໍລິມາດຂົນສົ່ງໂດຍ ສານເພີ່ມຂຶ້ນສະເລ່ຍ 9% ແລະ ບໍລິມາດຈໍລະຈອນສິນຄ້າ 9%. ສ່ວນ ທ່າບົກຫ້ວຍຊາຍ ແຂວງບໍ່ແກ້ວ, ຫລວງພະບາງ ແລະ ອຸດົມໄຊ ກຳລັງສຶກສາ ແລະ ຍັງໄດ້ຄົ້ນຄວ້າການສຶກສາຄວາມເປັນໄປໄດ້ການສ້າງລະບົບຄ່ຽນຖ່າຍສິນຄ້າຢູ່ດ່ານສາກົນນາເພົ້າແຂວງຄໍາມ່ວນ.

   ຢ່າງໃດກໍຕາມ, ໃນການຄຸ້ມຄອງວຽກງານຂົນສົ່ງລະຫວ່າງປະເທດ ກໍຍັງມີຂໍ້ຫຍຸ້ງຍາກຫລາຍປະການທີ່ຕ້ອງໄດ້ຮັບການປັບປຸງແກ້ໄຂໃນຕໍ່ໜ້າ. ທ່ານ ບຸນຕາ ອ່ອນນາວົງ   ກ່າວ ຕື່ມວ່າ: ລັດຖະບານລາວ ຍາມໃດກໍໄດ້ຖືສຳຄັນວຽກງານການຂົນສົ່ງ ທາງບົກລະຫວ່າງປະເທດເພື່ອເສີມຂະຫຍາຍສ້າງໃຫ້ເປັນຂະແໜງການນໍາໜ້າໃນການສ້າງລາຍຮັບ ແຫ່ງຊາດທັງເປັນປັດໄຈໃນການຂັບເຄື່ອນການພັດທະນາເສດຖະກິດແຫ່ງຊາດ ໃຫ້ຂະຫຍາຍຕົວຢ່າງຕໍ່ເນື່ອງ.  ໃນໄລຍະຜ່ານມາ, ການຈັດຕັ້ງປະຕິບັດວຽກງານດັ່ງກ່າວໂດຍສຸມໃສ່ 2 ໜ້າທ່ີຕົ້ນຕໍ ເປັນຕົ້ນສ້າງໂຄງລ່າງພື້ນ ຖານເພື່ອອໍານວຍຄວາມສະດວກໃຫ້ແກ່ການຂົນສົ່ງພາຍໃນ, ການເຊື່ອມຕໍ່ກັບບັນດາປະເທດອ້ອມຂ້າງ; ອັນເປັນເງື່ອນໄຂອໍານວຍຄວາມສະດວກໃຫ້ແກ່ການຈັດຕ້ັງປະຕິບັດການຂົນສ່ົງໂດຍສານ ແລະ ສິນຄ້າຜ່ານແດນທາງບົກລະຫວ່າງປະເທດ.ເຖິງແນວໃດກໍດີການພັດທະ"ນາພື້ນຖານໂຄງລ່າງທີ່ດີມີຄຸນນະພາບນັ້ນແມ່ນໜຶ່ງໃນຫລາຍບູລິມະສິດສໍາຄັນຂອງພັກ-ລັດຖະບານລາວ ເພື່ອສົ່ງເສີມ ແລະ ຍົກລະດັບການເຊື່ອມໂຍງເຊື່ອມຈອດກັນກັບພາກພື້ນ-ສາກົນ ເຊິ່ງຈະເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ, ເອື້ອອໍານວຍການຂົນສົ່ງສິນຄ້າ, ການບໍລິການ ແລະ ການແກ້ໄຂຄວາມທຸກຍາກຂອງປະເທດຢ່າງໜັກແໜ້ນ.

ໂດຍ: ເກີດຂວັນໃຈ ມາລີຈັນສີ

KPL