ຂປລ. ສູນກາງແນວລາວສ້າງຊາດ ລົງຊຸກຍູ້ວຽກງານໂຄສະນາ ການໃຫ້ວັກຊີນກັນພະຍາດໂຄວິດ-19 ແລະ ວັກຊີນກັນພະຍາດຕາມລະດູການແກ່ຊຸມຊົນ ລວມທັງການປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍຢູ​ເມືອ​ສາມັກຄີ​ໄຊ ​ແຂວງ​ອັດ​ຕະປື ​ໃນ​ວັນ​ທີ 29 ​ເມສາ 2024 ໂດຍປະຕິບັດຕາມແຜນການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ອົງການອຸຍ​ນີເຊບ ປະຈຳ ສປປ ລາວ ກໍຄື ການຮ່ວມລະຫວ່າງ ສູນກາງແນວລາວສ້າງຊາດ ແລະ ກະຊວງສາທາລະນະສຸກ ​ໂດຍໄດ້ເປີດກອງປະຊຸມ ປຶກສາຫາລື ສະພາບວຽກງານສັກຢາກັນພະຍາດ, ການໃຫ້ວັກຊີນກັນພະຍາດໂຄວິດ-19 ແລະ ວັກຊີນກັນພະຍາດຕາມລະດູການ.

ເຂົ້າຮ່ວມກອງປະຊຸມປຶກສາຫາລືຄັ້ງ​ນີ້, ມີ ທ່ານ ວັນດີ ຈັນສົມບັດ ຫົວໜ້າກົມຊັ້ນຄົນ ສູນກາງແນວລາວສ້າງຊາດ, ທ່ານ ຕະບອງເພັດ ພຸດທະວົງ ຊ່ຽວຊານວຽກງານໂຄສະນາ ແລະ ສື່ສານມວນຊົນ ອົງການອຸຍນີເຊບ ປະຈໍາ ສປປ ລາວ, ມີ​ທ່ານຮອງປະທານແນວລາວສ້າງຊາດ ແຂວງອັດຕະປື, ພະແນກສາທາລະນະສຸກແຂວງ ແລະ ຫ້ອງການສາທາລະນະສຸກເມືອງ, ສະຫະພັນແມ່ນຍິງແຂວງ ແລະ ພະແນກການກ່ຽວຂ້ອງອື່ນໆ. ພ້ອມ​ນີ້, ຍັງ​ມີບັນດາກຸ່ມບ້ານ, ແນວໂຮມບ້ານ ​ແລະ ອົງການປົກຄອງບ້ານ ເຂົ້າຮ່ວມ ເພື່ອນໍາເອົາໄປໂຄສະນາໃຫ້ປະຊາຊົນ ໃຫ້ຄວາມຮູ້ ແລະ ເຂົ້າໃຈ ແລະ ໃຫ້ຄວາມສຳ ຄັນຕໍ່ບັນຫາສຸຂະພາບ, ເປັນເຈົ້າການປຸກລະດົມລູກຫລານຂອງຕົນ ມາຮັບວັກຊີນກັນພະຍາດໃຫ້ຄົບຕາມເຂັມທີ່ແພດໝໍກຳນົດ.

​ໂອກາດ​ນີ້, ທ່ານ ວັນດີ ຈັນສົມບັດ ໄດ້ກ່າວເຖິງພາລະບົດບາດ ຂອງແນວລາວສ້າງຊາດ ວ່າ: ແນວລາວສ້າງຊາດ ແມ່ນອົງການຈັດຕັ້ງສຳພັນທາງການເມືອງຂອງທົ່ວສັງຄົມ, ແນວລາວສ້າງຊາດເປັນພາກສ່ວນໜຶ່ງ ໃນລະບົບການເມືອງ ໂດຍແມ່ນພັກ ປະຊາຊົນ ປະຕິວັດລາວເປັນແກນນຳ, ແນວລາວສ້າງຊາດ ມີພາລະບົດສຳຄັນຕົ້ນຕໍ ຄື: ເປັນຫລັກແຫລ່ງເຕົ້າໂຮມຄວາມສາມັກຄີປອງດອງ, ຄວາມເປັນປຶກແຜ່ນຂອງປະຊາຊົນບັນດາເຜົ່າ, ສາສະໜາ, ຊັ້ນຄົນ, ເພດ-ໄວ ລວມທັງຄົນເຊື້ອຊາດລາວ ທີ່ດຳລົງຊີວິດຢູ່ຕ່າງປະເທດ, ສຶກສາອົບຮົມ, ປຸກລະດົມຂົນຂວາຍ ແລະ ເສີມຂະຫຍາຍສິດເປັນເຈົ້າຂອງປະຊາຊົນ, ປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນ, ຕິດຕາມ ແລະ ໃຫ້ຄຳປຶກສາ, ສະເໜີແນະຕໍ່ການຈັດຕັ້ງການເມືອງສັງຄົມ, ບຸກຄົນ ແລະ ນິຕິບຸກຄົນ, ການເຄື່ອນໄຫວຂອງອົງການ. ພ້ອມ​ນີ້, ທ່ານຍັງໄດ້ເນັ້ນເຖິງຄວາມສໍາຄັນ ຂອງວຽກງານສັກຢາກັນພະຍາດ ແລະ ບົດບາດຂອງແນວລາວສ້າງຊາດ ໃນການປຸກລະດົມປະຊາຊົນບັນດາເຜົ່າ ໃຫ້ເອົາລູກຫລານມາຮັບວັກຊີນ ກັນພະຍາດ ຕາມລະດູການ ລວມທັງພະຍາດ ໂຄວິດ-19 ພິເສດແມ່ນສຸມໃສ່ລະດົມຜູ້ປົກຄອງ ນຳເອົາລູກຫລານຂອງຕົນທີ່ມີອາຍຸຕຳກວ່າ 5 ປີລົງມາ ມາຮັບວັກຊີນກັນພະຍາດໝາກແດງໃຫຍ່ ແລະ ໝາກແດງນ້ອຍ ເຊິ່ງຈະເລີ່ມສັກໃນລະຫວ່າງ ວັນທີ 20-31/5/2024 ໃນຂອບເຂດທົ່ວປະເທດ.

ພ້ອມ​ນີ້, ຜູ້ຕາງໜ້າ ພະແນກສາທາລະນະສຸກແຂວງ ກໍໄດ້ລາຍງານສະພາບການ ໃຫ້ວັກຊີນກັນພະຍາດພາຍໃນເມືອງ ແລະ ແຂວງອັດຕະປື, ພ້ອມນັ້ນກໍຍັງຈະໄດ້ແລກປ່ຽນ ຄຳເຫັນກ່ຽວກັບຂໍ້ສະ ດວກ, ຂໍ້ຫຍຸ້ງຍາກໃນການໃຫ້ບໍລິການສັກວັກຊີນ ກັນພະຍາດໃນໄລຍະຜ່ານມາ. ຈາກ​ນັ້ນ, ບັນດາຜູ້ຕາງໜ້າພະແນກການກ່ຽວຂ້ອງ ກໍໄດ້ປະກອບຄໍາຄິດຄໍາເຫັນ ໃນການແກ້ໄຂບັນຫາອົດຕາການສັກຢາ ໃຫ້ໄດ້ຕາມມາດຕາຖານ ທີ່ລັດຖະບານກຳນົດ.

​ໂອກາດ​ດຽວ​ກັນ, ຜູ້ຕາງໜ້າສູນກາງ ແນວລາວສ້າງຊາດສູນກາງ, ອົງການອຸຍນີເຊບ, ພະແນກສາທາລະນະສຸກ ກໍໄດ້ລົົງພົບປະໂອ້ລົມກັບປະຊາຊົນ ບ້ານລະຫາງ ເມືອງສາມັກຄີໄຊ ແຂວງອັດຕະປື ເພື່ອປຸກລະດົມວຽກງານການ ໃຫ້ວັກຊີນກັນພະຍາດ ໂຄວິດ-19 ແລະ ວັກຊິນກັນພະຍາດຕາມລະດູການ, ລວມທັງການໂຄສະນາການສັກວັກຊິນປ້ອງກັນ ພະຍາດໝາກແດງໃຫຍ່ ແລະ ໝາກແດງນ້ອຍ.

ພາຍຫລັງສຳເລັດ, ການລົງຊຸກຍູ້ວຽກໂຄສະນາ ຢູ່ແຂວງອັດຕະປືແລ້ວ, ສູນກາງແນວລາວສ້າງຊາດ, ອົງການອຸນີເຊບ ແລະ ພາກສ່ວນກ່ຽວຂ້ອງ ຈະໄດ້ສືບຕໍ່ດໍາເນີນ ຢູ່ເມືອງກະລຶມ ແລະ ເມືອງດາກຈຶງ ແຂວງເຊກອງ ຕື່ມ​ອີກ.

KPL