ຂປລ
ຂປລ. ຕະຫລອດໄລຍະຜ່ານມາ, ພາລະກໍາປະຫວັດສາດ ຂອງຊົນຊັ້ນກໍາມະກອນສາກົນ ໄດ້ຊີ້ໃຫ້ພວກເຮົາເຫັນຢ່າງຈະແຈ້ງວ່າ: ຊົນຊັ້ນກໍາມະກອນ ແມ່ນຊົນຊັ້ນທີ່ນໍາໜ້າຂອງຍຸກສະໄໝ ຕິດພັນກັບພື້ນຖານການຜະລິດ, ມີລະບຽບວິໄນ, ເປັນຜູ້ມີຫົວຄິດປະດິດສ້າງ, ມີຄວາມສາມາດພຽງພໍ ທີ່ຈະລຶບລ້າງລະບອບ ການພົວພັນສັງຄົມແບບກົດຂີ່ ແລະ ສ້າງສັງຄົມໃໝ່ທີ່ກ້າວໜ້າ ສີວິໄລ ແລະ ຍຸຕິທໍາ ພາຍໃຕ້ການນໍາພາ ຂອງ ພັກຄອມມູນິດ.
ຂປລ. ຕະຫລອດໄລຍະຜ່ານມາ, ພາລະກໍາປະຫວັດສາດ ຂອງຊົນຊັ້ນກໍາມະກອນສາກົນ ໄດ້ຊີ້ໃຫ້ພວກເຮົາເຫັນຢ່າງຈະແຈ້ງວ່າ: ຊົນຊັ້ນກໍາມະກອນ ແມ່ນຊົນຊັ້ນທີ່ນໍາໜ້າຂອງຍຸກສະໄໝ ຕິດພັນກັບພື້ນຖານການຜະລິດ, ມີລະບຽບວິໄນ, ເປັນຜູ້ມີຫົວຄິດປະດິດສ້າງ, ມີຄວາມສາມາດພຽງພໍ ທີ່ຈະລຶບລ້າງລະບອບ ການພົວພັນສັງຄົມແບບກົດຂີ່ ແລະ ສ້າງສັງຄົມໃໝ່ທີ່ກ້າວໜ້າ ສີວິໄລ ແລະ ຍຸຕິທໍາ ພາຍໃຕ້ການນໍາພາ ຂອງ ພັກຄອມມູນິດ.
ທ່ານ ມາກ-ອັງແກນ ໄດ້ຢັ້ງຢືນວ່າ: ລັກສະນະອັນດີເລີດ ຂອງຊົນຊັ້ນກໍາມະກອນ ແມ່ນຊົນຊັ້ນທີ່ມີນໍ້າໃຈກ້າຫານຕໍ່ສູ້, ມີລະບຽບວິໄນເຂັ້ມງວດ, ມີສະຕິຕໍ່ການຈັດຕັ້ງ, ມີຄວາມານະອົດທົນສູງ ຢ່າງເດັດຂາດ ມີມານະຈິດປະຕິວັດສູງສົ່ງສຸດກົກສຸດປາຍ; ເປັນຜູ້ທີ່ມີຄວາມດຸໝັ່ນຄົ້ນຄວ້າຮໍ່າຮຽນ ເອົາຄວາມຮູ້ວິທະຍາສາດ-ເຕັກນິກ ນັບມື້ນັບສູງຂຶ້ນ ຈຶ່ງເປັນຊົນຊັ້ນທີ່ກ້າວໜ້າກວ່າໝູ່, ມີຄວາມສາມັກຄີເລິກ ເຊິ່ງກວ້າງຂວາງ ແລະ ສາມັກຄີສາກົນອັນຜ່ອງໃສ, ມີວິໄສທັດກວ້າງຂວາງ ໃນການຕີລາຄາບັນຫາ, ສັງລວມພຶດຕິກໍາຕົວຈິງ ໄດ້ກາຍເປັນທິດສະດີຊີ້ນໍາ. ສະນັ້ນ, ຊົນຊັ້ນກໍາມະກອນ ຢາກເຮັດລ້ອນພາລະກໍາ ປະຫວັດສາດປົດປ່ອຍຕົນເອງໄດ້ ຕ້ອງໄດ້ຮັບການນໍາພາ-ຊີ້ນໍາຢ່າງ ວິທະຍາສາດຈາກພັກການເມືອງ ຂອງຕົນ ທີ່ຖືລັດທິມາກ-ເລນິນ ເປັນທິດຊີ້ນໍາ.
ສຳລັບ ປະເທດລາວເຮົາ ພວກລ່າເມືອງຂຶ້ນແບບເກົ່າເຂົ້າມາຢຶດຄອງ ແຕ່ປີ 1893-1954 ພວກເຂົາໄດ້ເກັບເກນເອົາຊາວໄຮ່ນາໄປຂຸດຄົ້ນເອົາແຮ່ກົ່ວ ຢູ່ບໍ່ໂພນຕິ້ວ ແລະ ບໍ່ແໜ່ງ ຢູ່ແຂວງຄຳມ່ວນ ໄປເປັນກູລີເຮັດທາງ. ຈາກນັ້ນ, ເກີດມີກໍາມະກອນລະດູການ ດ້ວຍການນໍາໃຊ້ແຮງງານ ນັບມື້ນັບຫລາຍຂຶ້ນ ແລະ ໄດ້ກາຍເປັນກໍາມະກອນອາຊີບ, ຕໍ່ມາພວກເຂົາໄດ້ສ້າງໂຮງເລື່ອຍໄມ້, ໂຮງສີເຂົ້າ, ໂຮງງານໄຟຟ້າ ຈຳນວນໜຶ່ງ. ຈາກນັ້ນ, ກໍາມະກອນລາວ ກໍໄດ້ເພີ່ມຂຶ້ນເລື້ອຍໆ. ພາຍໃຕ້ການປົກຄອງຂອງພວກລ່າເມືອງຂຶ້ນແບບເກົ່າ ກຳມະກອນລາວ ຖືກກົດຂີ່ຂູດຮີດຢ່າງໜັກໜ່ວງ ທາງດ້ານເສດຖະກິດ, ວັດທະນະທໍາສັງຄົມ ພວກເຂົາບັງຄັບໃຫ້ກໍາມະກອນ ອອກແຮງງານ 14-16 ຊົ່ວໂມງ, ອອກແຮງງານຫລາຍໄດ້ຄ່າຕອບແທນໜ້ອຍ, ຖືກຕັດເງິນເດືອນ, ຖືກໄລ່ອອກຈາກວຽກໂດຍບໍ່ມີເຫດຜົນ, ຂາດສິດເສລີພາບ ທາງດ້ານການເມືອງ ແລະ ກົດໝາຍ, ບໍ່ໄດ້ຮັບການເບິ່ງແຍງ ທາງດ້ານສະຫວັດດີການຕ່າງໆ. ຈາກສະພາບການທີ່ກ່າວມານັ້ນ, ຊົນຊັ້ນກໍາມະກອນ ກໍຄື ຜູ້ອອກແຮງງານລາວບັນດາເຜົ່າ ກໍໄດ້ລຸກຂຶ້ນຕໍ່ສູ້ຢ່າງ ອົງອາດກ້າຫານ ໂດຍເລີ່ມຈາກການຕໍ່ສູ້ທີ່ມີລັກສະນະເກີດເອງ ໄດ້ກາຍເປັນຂະບວນການອັນກວ້າງຂວາງ ນໍາພາໂດຍບັນພະບູລຸດຜູ້ຮັກຊາດ ແຕ່ເໜືອເຖິງໃຕ້, ຕໍ່ສູ້ຕ້ານພວກລ່າເມືອງຂຶ້ນຢ່າງດຸເດືອດ ແຕ່ຂະບວນການຕໍ່ສູ້ໄລຍະນັ້ນ ບໍ່ໄດ້ຮັບໄຊຊະນະຍ້ອນບໍ່ມີພັກນໍາພາ.
ປີ 1930 ພັກຄອມມູນິດອິນດູຈີນ ໄດ້ຮັບການສ້າງຕັ້ງຂຶ້ນ ໂດຍແມ່ນປະທານ ໂຮ່ຈີ່ມິນ, ພັກໄດ້ ວາງແນວທາງອັນຖືກຕ້ອງ ເພື່ອນໍາພາຂະບວນການຕໍ່ສູ້ປົດປ່ອຍຊາດ ຕ້ານພວກລ່າເມືອງຂຶ້ນ, ພາຍ ຫລັງມີພັກນຳພາ ຂະບວນການຕໍ່ສູ້ຂອງປະຊາຊົນ, ຊົນຊັ້ນກໍາມະກອນ, ຜູ້ອອກແຮງງານ 3 ຊາດອິນດູ ຈີນ ໄດ້ມີຄຸນນະພາບໃໝ່ ສາມາດຍາດໄດ້ໄຊຊະນະເປັນກ້າວໆມາ. ຜົນງານອັນພົ້ນເດັ່ນໃນໄລຍະນັ້ນ ແມ່ນຂະບວນການລຸກຮືຂຶ້ນ ຢຶດອຳນາດການປົກຄອງ ໃນທົ່ວປະເທດ, ໄດ້ມີຂະບວນການກຳມະກອນໄຟຟ້າລາວ ເປີດສາກນຳໜ້າພາທາງ ໃຫ້ຂະບວນການກຳມະກອນ ຢູ່ແຫ່ງອື່ນໆ ລຸກຂຶ້ນຕໍ່ສູ້ ພ້ອມກັບການຕໍ່ສູ້ຂອງປະຊາຊົນລາວ ບັນດາເຜົ່າໃນທົ່ວປະເທດ, ພາຍໃຕ້ການນຳພາອັນສະຫລາດສ່ອງໃສ ຂອງພັກປະຊາຊົນລາວ, ສາມາດໂຄ້ນລົ້ມລັດທິລ່າເມືອງຂຶ້ນແບບເກົ່າ ແລະ ແບບໃໝ່ໄດ້ຢ່າງສິ້ນເຊີງ, ສ້າງຕັ້ງລະບອບ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ2 ທັນວາປີ 1975 ຊຶ່ງເປັນບາດລ້ຽວປະຫວັດສາດ ອັນສຳຄັນຂອງຊາດລາວເຮົາ.
KPL