ຂປລ. ຕະຫລອດໄລຍະ 69 ປີຜ່ານມາ, ຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ (ຊປປລ) ແຕ່ສູນກາງຮອດທ້ອງຖິ່ນ ໄດ້ສຸມໃສ່ສ້າງຄວາມເຂັ້ມແຂງ ໃຫ້ແກ່ພະນັກງານຊາວໜຸ່ມ ເຮັດໃຫ້ການຈັດຕັ້ງປະຕິບັດວຽກງານຊາວໜຸ່ມທົ່ວປະເທດ ມີຜົນສຳເລັດໃນຫລາຍດ້ານ ເປັນຕົ້ນ ວຽກງານຂະບວນການຊາວໜຸ່ມທົ່ວປະເທດ ໄດ້ປຸກລະດົມສັງຄົມ ເຂົ້າຮ່ວມຂະບວນການຈັດຕັ້ງຢ່າງຟົດຟື້ນ ແລະ ກວ້າງຂວາງ ນັບແຕ່ສູນກາງຮອດທ້ອງຖິ່ນ ໂດຍສະເພາະ ຂະບວນການຊ່ວຍເຫລືອສັງຄົມ ທີ່ໄດ້ຮັບຜົນກະທົບຈາກໄພພິບັດທາງທໍາມະຊາດ, ໄດ້ມອບວັດຖຸອຸປະກອນ, ເຄື່ອງອຸປະໂພກ-ບໍລິໂພກ, ຂະບວນການບໍລິຈາກເລືອດ, ສ້ອມແປງຂົວ, ສ້ອມແປງທາງ, ສ້າງເຮືອນໃຫ້ຄອບຄົວທີ່ທຸກຍາກຂາດ ເຂີນ, ມອບທຶນປະກອບອາຊີບໃຫ້ຊາວໜຸ່ມ ແລະ ອື່ນໆ.

ທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ​ໄດ້​ໃຫ້​ຮູ້ ​ໃນ​ໂອກາດ​ຖະ​ແຫ​ລ່ງຂ່າວ​ ຕໍ່​ສື່​ມວນ​ຊົນໃນວັນທີ 10 ເມສາ 2024 ນີ້ວ່າ: ຜ່ານການເຄື່ອນ ໄຫວຈັດຕັ້ງປະຕິບັດວຽກງານຊາວໜຸ່ມ ໃນໄລຍະຜ່ານມາເຫັນວ່າ ຄະນະນໍາຊາວໜຸ່ມ ແລະ ສະມາຊິກຊາວໜຸ່ມຢູ່ຂັ້ນສູນກາງ ແລະ ທ້ອງຖິ່ນ ຫລາຍສະຫາຍມີຄວາມເຕີບໃຫຍ່ເຂັ້ມແຂງ ແລະ ໄດ້ຮັບຄວາມ ໄວ້ເນື້ອເຊື້ອໃຈຈາກຄະນະພັກຂອງຕົນ ແລະ ໄດ້ມອບໝາຍໜ້າທີ່ໃໝ່ ທີ່ສູງຂຶ້ນກວ່າເກົ່າ, ມີຫລາຍສະຫາຍ ໄດ້ຮັບການຍົກລະດັບຄວາມຮູ້, ຄວາມສາມາດ ວຽກງານວິຊາສະເພາະດ້ານຕ່າງໆ ຢູ່ພາຍໃນ ແລະ ຕ່າງປະເທດ. ພ້ອມນີ້, ຊາວໜຸ່ມໄດ້ເອົາໃຈໃສ່ຕໍ່ວຽກງານ ກໍ່ສ້າງຮາກຖານການເມືອງ ຕາມທິດນໍາ 3 ສ້າງຂອງພັກ ໂດຍສຸມໃສ່ 4 ເນື້ອໃນ 4 ຄາດໝາຍ ແນໃສ່ປັບປຸງການຈັດຕັ້ງຊາວໜຸ່ມ ຢູ່ຂັ້ນຮາກຖານໃຫ້ມີຄວາມເຂັ້ມແຂງ. ປັດຈຸບັນ, ທົ່ວປະເທດ ມີຊາວໜຸ່ມໃນເກນອາຍຸ 15-35 ປີ ທັງໝົດ 1.573.738 ຄົນ, ຍິງ 757.658 ຄົນ, ເປັນສະມາຊິກຊາວໜຸ່ມ 635.664 ຄົນ, ຍິງ 271.636 ຄົນ, ມີໜ່ວຍຊາວໜຸ່ມຈໍານວນ 26.362 ໜ່ວຍ ແລະ ມີ 1.313 ຮາກຖານ, ມີເຍົາວະຊົນໃນເກນອາຍຸ 9-14 ປີ 559.316 ຄົນ, ຍິງ 281.005 ຄົນ. ໃນນັ້ນ, ເປັນເຍົາວະຊົນທັນວາ 385.912 ຄົນ, ຍິງ 205.921 ຄົນ, ມີອະນຸຊົນ ໃນເກນອາຍຸ 6-8 ປີ 301.299 ຄົນ, ຍິງ 151.474 ຄົນ. ໃນນັ້ນ, ເປັນອະນຸຊົນທັນວາ 149.135 ຄົນ, ຍິງ 76.756 ຄົນ.

ທ່ານ ມອນໄຊ ລາວມົວຊົ່ງ ຍັງໃຫ້ຮູ້ອີກວ່າ: ວັນສ້າງຕັ້ງ ຄະນະຊາວໜຸ່ມ ປະຊາຊົນ ປະຕິວັດລາວ ເປັນວັນສຳຄັນຍິ່ງໃຫຍ່, ເປັນວັນເຕົ້າໂຮມຄວາມສາມັກຄີ ຊາວໜຸ່ມລາວບັນດາເຜົ່າ, ເປັນວັນແຫ່ງການສຶກສາຮ່ຳຮຽນ ແລະ ສືບທອດມູນເຊື້ອຊາວໜຸ່ມຮຸ້ນກ່ອນ, ເພື່ອເຮັດໃຫ້ພາລະບົດບາດ ຂອງອົງການຈັດຕັ້ງຊາວໜຸ່ມປະຊາຊົນ ປະຕິວັດລາວກວ້າງຂວາງສູງສົ່ງ ແລະ ໜັກແໜ້ນເຂັ້ມແຂງຂຶ້ນເລື້ອຍໆ, ສືບຕໍ່ສ້າງຜົນງານຂ່ຳນັບຮັບຕ້ອນວັນສຳຄັນຕ່າງໆ ຂອງພັກຂອງຊາດ ຂອງຄະນະຊາວໜຸ່ມປະຊາຊົນປະ ຕິວັດລາວ ເປັນຕົ້ນ ແມ່ນສ້າງຂະບວນການຂ່ຳນັບຮັບຕ້ອນ ກອງປະຊຸມໃຫຍ່ຂອງຜູ້ແທນຊາວໜຸ່ມປະ ຊາຊົນປະຕິວັດລາວ. ໃນຕໍ່ໜ້ານີ້, ຊາວໜຸ່ມຈົ່ງນຳໜ້າ, ປະຈັນບານ ເຂົ້າໃນໜ້າທີ່ການງານໃຫ້ສົມກັບ ປະທານໄກສອນ ພົມວິຫານ ຂະໝານນາມໄວ້ວ່າ: “ຊາວໜຸ່ມຈົ່ງກາຍເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊ ແຫ່ງຍຸກສະໄໝພວກເຮົາ”.

ຂ່າວ: ທະນູທອງ

ພາບ: ສັນທະນາ

KPL