ຂປລ. ວັນ​ທີ 9 ​ເມສາ 2024 ຜ່ານ​ມາ, ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ​ໄດ້​ກ່າວ​ຄຳ​ອວຍພອນເນື່ອງໃນໂອກາດສົ່ງທ້າຍປີເກົ່າ ພສ 2566, ຕ້ອນຮັບປີໃໝ່ ພສ 2567 ​ເຖິງ​ພີ່ນ້ອງ​ຊາວ​ລາວ​ຢູ່​ພາຍ​ໃນ ​ແລະ ດຳລົງ​ຊີວິດ​ຢູ່​ຈ່າງ​ປະ​ເທດ ​ເຊິ່ງມີ​ເນື້ອ​ໃນ​ດັ່ງ​ນີ້:  

ພີ່ນ້ອງຮ່ວມຊາດ, ເພື່ອນມິດສະຫາຍ ທີ່ນັບຖື ແລະ ຮັກແພງທັງຫລາຍ !

ປີເຖາະ ພສ 2566 ທີ່ກໍາລັງຜ່ານພົ້ນໄປນີ້, ກໍເປັນອີກປີໜຶ່ງທີ່ປວງຊົນລາວທັງຊາດ ໄດ້ປະສົບກັບຄວາມຫຍຸ້ງຍາກດ້ວຍຜົນກະທົບ ຈາກສະພາບການທັງນອກຕົວ ແລະ ໃນຕົວ, ເຮັດໃຫ້ຊີວິດການເປັນຢູ່ທາງດ້ານຕ່າງໆ ຂອງປະຊາຊົນເຮົາພົບຄວາມຫຍຸ້ງຍາກ ຝືດເຄືອງຕະຫລອດປີຜ່ານມາ. ແຕ່ເຖິງຢ່າງໃດກໍຕາມ, ດ້ວຍຄວາມເປັນເຈົ້າປະເທດ, ຄວາມບາກບັ່ນພະຍາຍາມ ແລະ ຄວາມສາມັກຄີເປັນປຶກແຜ່ນ ຂອງປວງຊົນລາວທຸກຄົນ ທີ່ໄດ້ເຂົ້າຮ່ວມຢ່າງຕັ້ງໜ້າ ໃນການປະຕິບັດແນວທາງນະໂຍບາຍ ແລະ ບັນດາມາດຕະການທີ່ພັກ ແລະ ລັດຖະບານ ວາງອອກນັ້ນ ດ້ວຍຄວາມບຸກບື່ນສູງ. ດັ່ງນັ້ນ, ປີ ຜ່ານມາ ພວກເຮົາສາມາດສື່ບຕໍ່ຮັກສາໄດ້ ສະຖຽນລະພາບດ້ານການເມືອງ, ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ການປະຕິບັດແຜນພັດທະນາ ເສດຖະກິດ-ສັງຄົມ ມີຜົນສໍາເລັດທີ່ເປັນພື້ນຖານ, ເສດຖະກິດສືບຕໍ່ຂະຫຍາຍຕົວໃນຈັງຫວະດີຂຶ້ນ, ການລົງທຶນ ແລະ ການທ່ອງທ່ຽວ ໄດ້ມີການຟື້ນຕົວ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນຕາມລໍາດັບ ເຊິ່່ງສ້າງໄດ້ພື້ນ ຖານ ແລະ ທ່ວງທ່າອັນດີໃຫ້ແກ່ການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ ໃນທ້າຍສະໄໝ ມີຜົນສໍາເລັດບົນຈິດໃຈຍາກສ້າງຄວາມເປັນເຈົ້າ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະ ກ້າວໄປສູ່ໄລຍະໃໝ່ ຂອງການປະຕິບັດແນວທາງປ່ຽນແປງໃໝ່ຂອງພັກ ດ້ວຍຄວາມເປັນເຈົ້າ.

ຂ້າພະເຈົ້າຂໍຖື ໂອກາດນີ້ ຍ້ອງຍໍຊົມເຊີຍ ແລະ ສະແດງຄວາມຮູ້ບຸນຄຸນຕໍ່ພະນັກງານ, ທະ ຫານ, ຕໍາຫລວດ, ນັກທຸລະກິດ, ຜູ້ປະກອບການ ແລະ ປະຊາຊົນລາວ ທຸກທົ່ວໜ້າທີ່ໄດ້ປະກອບສ່ວນ ເຂົ້າໃນການແກ້ໄຂບັນຫາຄວາມຫຍຸ້ງຍາກ ແລະ ອຸປະສັກຕ່າງໆ ໃນຕະຫລອດປີທີ່ຜ່ານມາ, ພ້ອມກັນນັ້ນ ຂໍແດງຄວາມຂອບໃຈ ຢ່າງຈິງໃຈຕໍ່ການສະໜັບສະໜູນຊ່ວຍເຫລືອອັນລໍໍ້າຄ່າ ຂອງປະເທດເພື່ອນມິດ ແລະ ອົງການຈັດຕັ້ງສາກົນ ທີ່ມີຕໍ່ສາທາລະນະລັດ ປະຊາທິປະໄຕ ປະຊາຊົນລາວ ມານະໂອກາດນີ້ດ້ວຍ.

 ບັນດາທ່ານ, ບັນດາສະຫາຍ, ພີ່ນ້ອງຮ່ວມຊາດ ທີ່ຮັກແພງ! ພວກເຮົາກໍາລັງກ້າວເຂົ້າສູ່ປີມະໂລງ ພສ 2567 ເຊິ່ງເປັນອີກປີ ໜຶ່ງທີ່ຍັງຕ້ອງຜະເຊີນກັບສິ່ງທ້າທາຍ ທົດສອບຫລາຍດ້ານຕໍ່ໄປອີກ, ແຕ່ພວກເຮົາກໍສາມາດ​ເບິ່ງເຫັນກາລະໂອກາດ ແລະ ຄວາມຫວັງຂອງອະນາຄົດ ດ້ວຍການ​ເບິ່ງໂລກໃນແງ່ດີໄດ້.  ຂ້າພະເຈົ້າຂໍຮຽກຮ້ອງ ມາຍັງທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວ ທັງຊາດ ຈົ່ງສືບຕໍ່ເສີມຂະຫຍາຍມູນເຊື້ອ ຄວາມສາມັກຄີເປັນປຶກແຜ່ນ, ຍົກສູງສະຕິຊາດ, ເຊີດຊູຄວາມເປັນເຈົ້າ, ປະກອບສ່ວນເຫື່ອແຮງ, ສະຕິປັນຍາ, ປະຕິບັດພັນທະ-ໜ້າທີ່ ຂອງຕົນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ສືບຕໍ່ໝັ້ນຄົງເຂັ້ມແຂງ. ປີນີ້ ສປປ ລາວ ພວກເຮົາໄດ້ຮັບກຽດເຮັດໜ້າທີ່ເປັນປະທານໝູນວຽນອາຊຽນ ແລະ ທັງເປັນປີທ່ອງທ່ຽວລາວ, ຂໍໃຫ້ທຸກພາກສ່ວນ ໃນສັງຄົມຈົ່ງພ້ອມກັນເປັນເຈົ້າພາບທີ່ດີ, ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ, ຮັກສາຄວາມສະອາດຈົບງາມ, ອໍານວຍຄວາມສະດວກ ແລະ ສ້າງຄວາມປະທັບໃຈໃນການຕ້ອນຮັບ ແຂກບ້ານ-ແຂກເມືອງ ທີ່ຈະມາເຂົ້າຮ່ວມກອງປະຊຸມ, ມາທ່ອງທ່ຽວ, ມາລົງທຶນ ແລະ ມາຢ້ຽມຢາມຢູ່ປະເທດຂອງພວກເຮົາ. ເນື່ອງໃນໂອກາດ ອັນເປັນສີຣິມຸງຄຸນຕ້ອນຮັບປີໃໝ່ລາວ ພສ 2567 ນີ້, ຂ້າພະເຈົ້າ ຂໍສົ່ງຄໍາອວຍພອນໄຊອັນປະເສີດ ມາຍັງພີ່ນ້ອງຮ່ວມຊາດ, ຕະຫລອດເຖິງພີ່ນ້ອງຄົນເຊື້ອຊາດລາວ ທີ່ອາໄສຢູ່ຕ່າງປະເທດ ກໍຄື ຊາວຕ່າງປະເທດທີ່ກໍາລັງດໍາລົງຊີວິດ ແລະ ປະຕິ ບັດໜ້າທີ່ີຢູ່ ສປປ ລາວ ຈົ່ງມີຄວາມຢູ່ເຢັນເປັນສຸກ, ປາສະຈາກໂລກໄພໄຂ້ເຈັບ ແລະ ຈົ່ງພ້ອມກັນສະຫລອງປີໃໝ່ລາວ ດ້ວຍຄວາມເບີກບານມ່ວນຊື່ນ, ມີໂຊກມີໄຊ ແລະ ສະຫງົບປອດໄພທຸກປະການເທີ້ນ.

ສະບາຍດີປີໃໝ່

ພາບ: ຂັນ​ໄຊ

KPL