ຂປລ
ຂປລ. ພິທີເຊັນບົດບັນທຶກຊ່ວຍຈຳ ແຮກສ່ຽວ ລະຫວ່າງ ຫ້ອງການຊາວໜຸ່ມກອງທັບ ແລະ ຄະນະບໍລິຫານງານຊາວໜຸ່ມ ກະຊວງສາທາລະນະສຸກ ຈັດຂຶ້ນໃນວັນທີ 9 ເມສາ 2024
ຂປລ. ພິທີເຊັນບົດບັນທຶກຊ່ວຍຈຳ ແຮກສ່ຽວ ລະຫວ່າງ ຫ້ອງການຊາວໜຸ່ມກອງທັບ ແລະ ຄະນະບໍລິຫານງານຊາວໜຸ່ມ ກະຊວງສາທາລະນະສຸກ ຈັດຂຶ້ນໃນວັນທີ 9 ເມສາ 2024 ໂດຍມີ ສະຫາຍ ໄພວັນ ແກ້ວປະເສີດ ຄະນະປະຈຳພັກ, ປະທານກວດກາພັກ, ຮອງລັດຖະມົນຕີ ຜູ້ຊີ້ນຳວຽກງານອົງການຈັດຕັ້ງມະຫາຊົນກະ ຊວງສາທາລະນະສຸກ, ສະຫາຍ ພົນຈັດຕະວາ ໄພວັນ ຈັນທະພົມມາ ກຳມະການຄະນະພັກ ກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ຜູ້ຊີ້ນຳວຽກງານອົງການ ພ້ອມດ້ວຍພາກສ່ວນທີ່ກ່ຽວຂ້ອງທັງຝ່າຍເຂົ້າຮ່ວມ.
ຈຸດປະສົງ ການເຊັນບົດບັນທຶກຄັ້ງນີ້, ເພື່ອຍົກສູງບົດບາດການນໍາພາ-ຊີ້ນໍາ ຂອງສອງອົງຄະນະພັກ ກະ ຊວງສາທາລະນະສຸກ ແລະ ກະຊວງປ້ອງກັນປະເທດ ດ້ວຍການຮ່ວມມືກັນສຶກສາອົບຮົມ ການເມືອງ-ແນວຄິດ, ວິຊາສະເພາະ, ທັດສະນະສຶກສາມູນເຊື້ອ ທາງປະຫວັດສາດ, ວັດທະນະທໍາ ໃຫ້ແກ່ສະມາຊິກຊາວໜຸ່ມ ຂອງ 2 ພາກສ່ວນ ໃຫ້ມີຄວາມຮັບຮູ້ເຂົ້າໃຈ ແລະ ເປັນເອກະພາບສູງ ຕໍ່ແນວທາງ, ນະໂຍບາຍ ຂອງພັກ, ກົດໝາຍ ຂອງລັດ, ລະບຽບການຕ່າງໆ ສາມາດກໍາໄດ້ລະບຽບການຕິດພັນກັບ 2 ພາກສ່ວນ ເພື່ອຈັດຕັ້ງປະຕິບັດນະໂຍບາຍ ແລະແຜນງານ ໃຫ້ສອດຄ່ອງກົມກຽວກັນ ລະຫວ່າງ 2 ພາກສ່ວນ; ມີນໍ້າໃຈຮັກຊາດ, ມີຄຸນສົມບັດສິນທໍາປະຕິວັດ, ມີຄວາມຈົງຮັກພັກດີຕໍ່ອຸດົມການຂອງພັກ, ຂອງຊາດ, ມີຈິດໃຈຟົດຟື້ນປະຕິວັດ, ມີໂລກະທັດ ແລະ ຊີວະທັດທີ່ກ້າວໜ້າ, ມີຄວາມສີວິໄລດ້ານຈິດໃຈ, ມີຄວາມສາມັກຄີເອື້ອເຟື້ອເຜື່ອແຜ່, ມີວິໄນ ແລະ ຄວາມຮັບຜິດຊອບສູງຕໍ່ວຽກງານ. ທັງນີ້, ກໍເພື່ອເສີມຂະຫຍາຍສາຍພົວພັນຮ່ວມມື ແລະ ຄວາມສາມັກຄີຮັກແພງ ຂອງຊາວໜຸ່ມ ທັງ 2 ພາກ ສ່ວນ ໃຫ້ກ້າວເຂົ້າສູ່ລວງເລິກ, ໜັກແໜ້ນ ແລະ ມີຈຸດສຸມ ຕິດພັນກັບການຈັດຕັ້ງປະຕິບັດ ຂະບວນການຮັກຊາດ ແລະ ພັດທະນາ, ຄໍາຂວັນ 5 ຮ່ວມ ແລະ ຂະບວນການ 4 ບຸກ ຂອງຊາວໜຸ່ມໃຫ້ປະກົດຜົນເປັນຈິງ ແລະ ສ້າງໂອ ກາດໃຫ້ສະມາຊິກຊາວໜຸ່ມ ຮູ້ນໍາໃຊ້ເຕັກນິກວິທະຍາສາດທີ່ທັນສະໄໝ ເຂົ້າໃນການປະຕິບັດໜ້າທີ່ວຽກງານ ແລະ ເຂົ້າເຖິງຂໍ້ມູນຂ່າວສານທີ່ມີປະໂຫຍດ ເພື່ອພັດທະນາຕົນເອງ, ຄອບຄົວ, ການຈັດຕັ້ງ ແລະ ປະເທດຊາດ.
ພ້ອມນີ້, ຍັງໄດ້ຮັບຟັງການປາຖະກະຖາຫວນຄືນມູນເຊື້ອ ວັນສ້າງຕັ້ງຄະນະຊາວໜຸ່ມປະຊາຊົນລາວ ຄົບ ຮອບ 69 ປີ (14 ເມສາ 1955 - 14 ເມສາ 2024) ຕື່ມອີກ.
ຂ່າວ: ລີຕ່າ ກັດຕິຍະວົງ
KPL