ຜົ້ງສາລີຈະດຶງດູດນັກທ່ອງທ່ຽວ ໃຫ້ໄດ້ 1 ແສນກວ່າຄົນ ພາຍໃນ ປີ 2024

26/03/2024 05:37
Email Print 2101
ຂປລ ແຂວງຜົ້ງສາລີ ເປັນແຂວງເໜືອສຸດຂອງ ສປປ ລາວ, ມີຊາຍ ແດນຕິດກັບ ສສ ຫວຽດ ແລະ ສປ ຈີນ ເຊິ່ງເປັນແຂວງທີ່ມີຄວາມບົ່ມ ຊ້ອນດ້ານການຜະລິດກະສິກໍາ ເປັນ ສິນຄ້າ ແລະ ການທ່ອງທ່ຽວໄປ ຄວບຄູ່ກັນ.

*ແຂວງຜົ້ງສາລີ ເປັນແຂວງເໜືອສຸດຂອງ ສປປ ລາວ, ມີຊາຍ ແດນຕິດກັບ ສສ ຫວຽດ ແລະ ສປ ຈີນ ເຊິ່ງເປັນແຂວງທີ່ມີຄວາມບົ່ມຊ້ອນດ້ານການຜະລິດກະສິກໍາເປັນສິນຄ້າ ແລະ ການທ່ອງທ່ຽວໄປຄວບຄູ່ກັນ. ຫວ່າງບໍ່ດົນມານີ້, ຕາມການລາຍງານຂອງພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວຂອງແຂວງຜົ້ງສາລີວ່າ: ໃນ ປີ 2023, ມີນັກທ່ອງທ່ຽວເຂົ້າມາທ່ຽວຊົມແຂວງຜົ້ງສາລີ 143.000 ກວ່າຄົນ ໃນນີ້, ມີນັກທ່ອງທ່ຽວພາຍໃນ 66.800 ກວ່າຄົນ ແລະ ນັກທ່ອງທ່ຽວຕ່າງປະເທດ 76.500 ກວ່າຄົນ, ລາຍຮັບຈາກນັກທ່ອງທ່ຽວ 15.389.990 ໂດລາສະຫະລັດທຽບໃສ່ແຜນການປະຕິບັດໄດ້ 68,26% ທຽບໃສ່ 1 ປີຜ່ານມາເພີ່ມຂຶ້ນ 359,26% ໃນນີ້, ນັກທ່ອງທ່ຽວທ່ີເຂ້ົາມາຜ່ານດ່ານສາກົນລານຕຸ້ຍມີ 15.678 ເທື່ອຄົນ; ນັກທ່ອງທ່ຽວທີ່ເຂົ້າມາຜ່ານດ່ານສາກົນປາງຫົກມີ 34.530 ເທື່ອຄົນ.

     ໃນທົ່ວແຂວງມີໂຮງແຮມ 10 ແຫ່ງ ທຽບໃສ່ປີຜ່ານມາເພີ່ມຂຶ້ນ 1 ແຫ່ງ; ເຮືອນພັກ 60 ແຫ່ງ ທຽບໃສ່ປີຜ່ານມາເພີ່ມຂຶ້ນ 4 ແຫ່ງ; ພັດທະຄານມີ 3 ແຫ່ງທຽບໃສປີຜ່ານມາຫລຸດລົງ 2 ແຫ່ງ; ຮ້ານອາຫານມີ 62 ຮ້ານ ທຽບໃສ່ປີຜ່ານມາເພີ່ມຂຶ້ນ 1 ຮ້ານ, ຮ້ານກິນດື່ມ 64 ຮ້ານ ທຽບໃສ່ປີຜ່ານມາເພີ່ມຂຶ້ນ 8 ຮ້ານ ແລະ ຮ້ານບັນເທີງ 3 ຮ້ານ. ສຳລັບທິດທາງຄາດໝາຍປີ 2024, ຈະດຶງດູດນັກທ່ອງທ່ຽວເຂົ້າມາທ່ຽວພາຍໃນແຂວງໃຫ້ໄດ້ 128.775 ເທື່ອຄົນ, ສ້າງລາຍຮັບໃຫ້ໄດ້ 17.242.190 ໂດລາສະຫະລັດ.ໃນປີທ່ອງທ່ຽວ 2024 ນີ້, ແຜນການແມ່ນຈະຈັດຂຶ້ນໃນເດືອນ ພະຈິກ 2024, ເຊິ່ງຈະມີຫລາຍກິດຈະກໍາທີ່ຈະຈັດຂຶ້ນໃນເທສະການອາຫານເຜົ່າ ແລະ ດື່ມນ້ໍາຊາເປັນຕົ້ນ ແມ່ນກິດຈະກຳປະກວດອາຫານເຜົ່າ, ປະກວດການຊົງຊາ, ການປະກວດນາງງາມຊົນເຜົ່າ, ການວາງສະແດງອາຫານຂອງບັນດາເຜົ່າ, ວາງສະແດງສິນຄ້າຜະລິດຕະພັນຊາ ແລະ ສິນຄ້າໂອດ໋ອບຂອງແຂວງ, ການສະແດງສີລະປະວັນນະຄະດ ແລະ ອື່ນໆ.

ໂດຍ: ເກີດຂວັນໃຈ ມາລີຈັນສີ

KPL

ຂ່າວອື່ນໆ

ads
ads

Top