ຂປລ
ຫລວງພະບາງ ເມືອງແຫ່ງມົນສະເໜ່, ມີວັດທະນະທຳສວຍງາມ ທີ່ບັນດານັກທ່ອງທ່ຽວທັງພາຍໃນ ແລະ ຕ່າງປະເທດຍົກໃຫ້ເປັນຈຸດໝາຍປາຍທາງການທ່ອງທ່ຽວ, ເມືອງຫລວງພະບາງ ເມືອງແຫ່ງມໍລະດົກໂລກ ທີ່ເຕັມໄປດ້ວຍສະຖານທີ່ແຫລງທ່ອງທ່ຽວທາງທຳມະ ຊາດ, ປະຫວັດສາດ ແລະ ວັດທະນະທຳ.
*ຫລວງພະບາງ ເມືອງແຫ່ງມົນສະເໜ່, ມີວັດທະນະທຳສວຍງາມ ທີ່ບັນດານັກທ່ອງທ່ຽວທັງພາຍໃນ ແລະ ຕ່າງປະເທດ ຍົກໃຫ້ເປັນຈຸດໝາຍປາຍທາງການທ່ອງທ່ຽວ, ເມືອງຫລວງພະບາງ ເມືອງແຫ່ງມໍລະດົກໂລກ ທີ່ເຕັມໄປດ້ວຍສະຖານທີ່ແຫລງທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ ເປັນຕົ້ນຕາດກວາງຊີ, ວັດຊຽງທອງ, ພູສີ, ວັດວາອາຮາມ, ຫໍພິພິທະພັນ, ຖໍ້າຕິ່ງ, ຕາດຮ້ອຍຄົວ ແລະ ອື່ນໆ. ນອກຈາກນີ້, ຍັງມີກິດຈະກຳຕ່າງໆ ທີ່ເປັນເອກະລັກສະເພາະຂອງຊາວຫລວງພະບາງ ເຊັ່ນ: ການໃສ່ບາດ, ການນຸ່ງເຄື່ອງແບບບູຮານ, ອາຫານການກິນ, ວິຖີຊີວິດຂອງປະຊາຊົນທ້ອງຖິ່ນ. ປັດຈຸບັນ, ແຂວງຫລວງພະບາງ ມີແຫລ່ງທ່ອງທ່ຽວຍອດນິຍົມຫລາຍແຫ່ງ ທີ່ນັກທ່ອງທ່ຽວທົ່ວທຸກມຸມໂລກ ຖືເປັນຈຸດໝາຍປາຍທາງຂອງການທ່ອງທ່ຽວ, ທົ່ວແຂວງມີແຫລ່ງທ່ອງທ່ຽວຫລາຍກວ່າ 200 ແຫ່ງ. ໃນນັ້ນ, ແຫລ່ງທ່ອງທ່ຽວທຳມະຊາດຫລາຍກວ່າ 100 ແຫ່ງ, ວັດທະນະທຳຫລາຍ ກວ່າ 70 ແຫ່ງ ແລະ ແຫລ່ງທ່ອງທ່ຽວທາງປະຫວັດສາດຫລາຍກວ່າ 30 ແຫ່ງ. ໃນປີ 2023 ມີນັກທ່ອງທ່ຽວເຂົ້າມາທ່ຽວຊົມຫລວງພະບາງ ທັງໝົດ 1.029.698 ເທື່ອຄົນ, ຖ້າທຽບໃສ່ປີຜ່ານມາເພີ່ມຂຶ້ນ 491.979 ເທື່ອຄົນ.
ໃນນີ້, ມີນັກທ່ອງທ່ຽວພາຍໃນ 265.102 ເທື່ອຄົນ ທຽບໃສ່ປີທີ່ຜ່ານມາຫລຸດລົງ 15.721 ເທື່ອຄົນ ແລະ ນັກທ່ອງທ່ຽວສາກົນ 764.596 ເທື່ອຄົນ, ເພີ່ມຂຶ້ນ 507.700 ເທື່ອຄົນ; ສະເລ່ຍຄ່າໃຊ້ຈ່າຍຂອງນັກທ່ອງທ່ຽວ ໄດ້ທັງໝົດ 559 ລ້ານກວ່າໂດລາສະຫະລັດ, ທຽບໃສ່ປີທີ່ຜ່ານມາເພີ່ມຂຶ້ນ 340 ລ້ານກວ່າໂດລາສະຫະລັດ. ຄາດໝາຍປີ 2024 ຈະດຶງດູດນັກທ່ອງທ່ຽວເຂົ້າມາທ່ອງທ່ຽວຫລວງພະບາງຄາດໄວ້ມີ 2 ລະດັບ ຄື: ລະດັບກາງ 1,1 ລ້ານກວ່າເທື່ອຄົນ ແລະ ລະດັບສູງ 1,7 ລ້ານກວ່າເທື່ອຄົນ. ໃນນັ້ນ, ນັກທ່ອງທ່ຽວພາຍໃນ 182.560 ເທື່ອຄົນ (ລະດັບກາງ) ແລະ 373.259 ເທື່ອ ຄົນ (ລະດັບສູງ), ນັກທ່ອງທ່ຽວຕ່າງປະເທດ 942.573 ເທຶ່ອຄົນ (ລະດັບ ກາງ) ແລະ 1,4 ລ້ານກວ່ເທື່ອຄົນ (ລະດັບສູງ). ສ່ວນລາຍຮັບຄາດໄວ້ມີ 2 ລະດັບ ຄື: ລະດັບກາງ 645 ລ້ານ ກວ່າໂດລາສະຫະລັດ ແລະ ລະດັບສູງເກືອບ 1 ຕື້ໂດລາສະຫະລັດ.
ເພື່ອຮອງຮັບໃຫ້ແກ່ນັກທ່ອງທ່ຽວ, ຄະນະນຳແຂວງຫລວງພະບາງ ກໍໄດ້ເອົາໃຈໃສ່ປັບປຸງໂຄ່ງລ່າງພື້ນຖານຂະໜາດນ້ອຍ, ການສ້າງຂີດຄວາມສາມາດໃນຂະແໜງການທ່ອງທ່ຽວ, ການສ້າງຈິດສໍານຶກ, ການເຜີຍແຜ່ລະບຽບການ ແລະ ນິຕິກໍາ, ການຈັດລະດັບມາດຕະຖານ ຂອງ ສປປ ລາວ ແລະ ມາດຕະຖານອາຊຽນເຊິ່ງທົ່ວແຂວງມີບໍລິສັດທ່ອງທ່ຽວ 106 ບໍລິສັດ, ມີໂຮງແຮມ-ຣີສອດ 100 ແຫ່ງ, ມີຫ້ອງນອນ 2.732 ຫ້ອງ, ຕຽງນອນ 5.579 ຕຽງ, ເຮືອນພັກ 416 ຫລັງ, ຮ້ານອາຫານ 384 ຮ້ານ, ຮ້ານບັນເທີງ ແລະ ຄາຣາໂອເກະ 45 ຮ້ານ, ຮ້ານນວດ- ສະປາ 41 ຮ້ານ ແລະ ພະນັກງານນຳທ່ຽວ 768 ຄົນ, ຍິງ 162 ຄົນ. ໃນປີທ່ອງທ່ຽວ 2024 ນີ້, ຫລວງພະບາງກະກຽມຈັດກິດຈະກໍາຕ່າງໆເປັນຕົ້ນບຸນໄຫລເຮືອໄຟ, ງານງາມແທ້ໂອ້ຫລວງພະບາງ ຄັ້ງທີ 2 ທີ່ສະທ້ອນໃຫ້ເຫັນຄວາມເປັນຫລວງພະບາງ, ເທສະການອາຫານພື້ນເມືອງ, ງານວາງສະແດງສິນຄ້າຫັດຖະກຳ, ສາທິດກິດຈະກຳທີ່ຕິດພັນກັບວິຖີຊີວິດທີ່ເປັນເອກະລັກຂອງແຂວງ, ງານປະກວດດົນຕີພື້ນເມືອງ, ກິດຈະກຳຂີ່ລົດຖີບເພື່ອອະນຸລັກວັດທະນະທໍາ, ບຸນຊ່ວງເຮືອ. ນອກຈາກນີ້, ຍັງມີຕະຫລາດນັດລາດຊ່າງຄ້ອງ, ການຈັດທັດສະນະສຶກສາຢ້ຽມຢາມ ແລະ ແລກປ່ຽນບົດຮຽນຮ່ວມກັບປະເທດເພື່ອນບ້ານ ແລະ ການສະແດງສິລະປະວັນນະຄະດີ ເພື່ອໂຄສະນາແລກປ່ຽນທາງດ້ານວັດທະນະທໍາທັງພາຍໃນ ແລະ ຕ່າງປະເທດ ແລະ ອີກຫລາຍກິດຈະກໍາ. ນອກຈາກນີ້, ຢູ່ບັນດາເມືອງຍັງໄດ້ມີກິດຈະກຳຕ່າງໆ ເຊັ່ນ: ການທ່ອງທ່ຽວທາງດ້ານກະສິກຳ ແລະ ທຳມະຊາດທີ່ເມືອງພູຄູນ; ບຸນປະເພນີກິນຈຽງຂອງເຜົ່າມົ້ງ ແລະ ບຸນປົດປີຂອງເຜົ່າກຶມມຸນະຄອນຫລວງພະບາງ; ບຸນປະເພນີຂອງເຜົ່າລື້ ເມືອງ ປາກອູ; ງານວາງສະແດງເຄື່ອງຫັດຖະກຳ ເຄື່ອງປັ້ນດິນເຜົາທີ່ບ້ານຈ່ານ ເໜືອ ເມືອງຈອມເພັດ; ບຸນອອກພັນສາຊ່ວງເຮືອ ເມືອງຊຽງເງິນ, ບຸນບັ້ງໄຟທີ່ເມືອງນານ ແລະ ອື່ນໆ.
ຂ່າວ: ກິດຕາ
KPL
