ຂປລ. ໃນວັນທີ 29 ກຸມພາ 2024, ຫ້ອງວ່າການສູນກາງພັກ ນະຄອນຫລວງວຽງຈັນຈັດ ພິທີປິດຊຸດອົບຮົມຜູ້ບໍລິຫານລະດັບກາງ ໃຫ້ພະນັກງານ-ລັດຖະກອນ ທີ່ມີຕໍາແໜງບໍລິຫານຂັ້ນພະແນກ ພາຍໃນຫ້ອງວ່າການສູນກາງພັກ ພາຍຫລັງດຳເນີນມາແຕ່ ວັນທີ 5-29 ກຸມພາ 2024 ໂດຍການເຂົ້າຮ່ວມຂອງ ທ່ານ ນາງ ຈັນທາ ອ່ອນວຽງໄຊ ຫົວໜ້າສະຖາບັນຄົ້ນຄວ້າ ວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນ, ທ່ານ ຄໍາພາ ພິມມະສອນ ຮອງຫົວໜ້າຫ້ອງວ່າການສູນກາງພັກ, ມີສຳມະນາກອນເຂົ້າຮ່ວມ ທີ່ມາຈາກອ້ອມຂ້າງຫ້ອງວ່າການສູນກາງພັກ ເຂົ້າຮ່ວມ.

ທ່ານ ຄໍາພາ ພິມມະສອນ ໄດ້ມີຄໍາເຫັນວ່າ: ຜົນສໍາເລັດໃນການຝຶກອົບຮົມຄັ້ງນີ້, ຖືເປັນບາດກ້າວສໍາ ຄັນ ເຊິ່ງມັນໄດ້ສະແດງເຖິງຄວາມເອົາໃຈໃສ່ ຂອງຄະນະພັກ, ຄະນະຫ້ອງວ່າການສູນກາງພັກ ທີ່ຖື ສໍາຄັນຕໍ່ການບໍາລຸງກໍ່ສ້າງພະນັກງານ ການນຳຫລັກແຫລ່ງ ຂອງຫ້ອງວ່າການສູນກາງພັກ ໃຫ້ນັບມື້ມີ ຄວາມເຕີບໃຫຍ່ເຂັ້ມແຂງ, ແຕ່ເຖິງຢ່າງໃດກໍຕາມ ອັນນັ້ນກໍ ເປັນພຽງຜົນສໍາເລັດໃນເບື້ອງຕົ້ນເທົ່ານັ້ນ ສິ່ງສໍາຄັນແມ່ນການນໍາເອົາບົດຮຽນ ແລະ ປະສົບການ ໃນການຝຶກອົບຮົມ ໄປຄົ້ນຄວ້າ ແລະ ໝູນໃຊ້ເຂົ້າໃນ ການເຄື່ອນໄຫວ ວຽກງານຕົວຈິງໃຫ້ໄດ້ ຮັບຜົນຢ່າງເປັນຮູບປະທໍາ. ພ້ອມນີ້, ທ່ານຍັງໄດ້ເນັ້ນບາງຈຸດ ທີ່ຄວນເອົາໃຈໃສ່ໃນຕໍ່ໜ້າດັ່ງນີ້: ບັນດາສຳມະນາກອນ ກໍຄື ພະນັກງານການນຳຫລັກແຫລ່ງຂັ້ນກາງ ຂອງຫ້ອງວ່າການວ່າການສູນກາງພັກ ຈົ່ງພ້ອມກັນສືບຕໍ່ເສີມ ຂະຫຍາຍເນື້ອໃນ ແລະ ບົດ ຮຽນຈາກການເຂົ້າຮ່ວມຝຶກອົບຮົມຄັ້ງນີ້ ເຂົ້າໃນການຈັດຕັ້ງປະຕິບັດ ວຽກງານຕົວຈິງຂອງຕົນຢ່າງປະດິດສ້າງ ແລະ ມີປະສິດທິຜົນສູງຂຶ້ນ, ສ້າງການຫັນປ່ຽນໃໝ່ຢ່າງແຂງແຮງ ໃນການຈັດຕັ້ງນຳພາ, ຕັ້ງໜ້າແຂ່ງຂັນພັດທະນາຕົນເອງ ແລະ ການຈັດຕັ້ງ, ເອົາໃຈໃສ່ຍົກສູງຄວາມອາດສາມາດ ໃນການນໍາພາພະນັກງານ-ລັດຖະກອນ ທີ່ຢູ່ໃນຄວາມຮັບຜິດ ຊອບຂອງຕົນ, ເປັນເຈົ້າການຈັດຕັ້ງຜັນຂະຫຍາຍວຽກງານໃນ ຄວາມຮັບຜິດຊອບຂອງຕົນໃຫ້ສູງຂຶ້ນ ເພື່ອເປັນກໍາລັງແຮງໃຫ້ແກ່ຄະນະພັກ, ຄະນະຫ້ອງວ່າການສູນກາງພັກ ໃນການຈັດຕັ້ງປະຕິບັດ ບັນດາຄາດ ໝາຍ ຂອງກອງປະຊຸມໃຫຍ່ ອົງຄະນະພັກຫ້ອງວ່າການ ສູນກາງພັກ ໃຫ້ບັນລຸຕາມຈຸດປະສົງຄາດໝາຍທີ່ວາງໄວ້.

⁠ທ່ານ ຄໍາພາ ພິມມະສອນ ຍັງກ່າວຕື່ມວ່າ: ພາຍຫລັງບັນດາສຳມະນາກອນ ໄດ້ສໍາເລັດການຝຶກອົບຮົມກັບໄປປະຈຳການປົກກະຕິແລ້ວ ໃຫ້ບັນດາກົມກອງທີ່ບັນດາພະນັກງານຫລັກແຫລ່ງ ຂັ້ນກາງສັງກັດຢູ່ ສືບຕໍ່ຕິດຕາມ, ຊຸກຍູ້, ກໍ່ສ້າງ ເຂົາເຈົ້າຕໍ່ໄປ ດ້ວຍການມອບ ວຽກມອບງານ, ນໍາໃຊ້, ທົດສອບໃນໜ້າວຽກຕົວຈິງ ໃຫ້ຫລາຍຂຶ້ນ ເພື່ອເປັນການກໍ່ສ້າງພະນັກງານ ທາງດ້ານຄວາມຮູ້ຄວາມສາມາດ, ຊຸກຍູ້ໃຫ້ເຂົາເຈົ້າໄດ້ລົງເລິກຕົວຈິງ ໃນການໝູນໃຊ້ບົດຮຽນ, ຄວາມຮູ້ທາງດ້ານທິດສະດີ ທີ່ໄດ້ຈາກການຝຶກອົບຮົມ ມາຜັນຂະຫຍາຍ ເຂົ້າສູ່ຕົວຈິງຢ່າງເປັນຮູບປະທຳ ແລະ ມີປະສິດທິຜົນສູງຂຶ້ນ.

ຂ່າວ-ພາບ: ສົມຫວັງ

KPL