ຂປລ
ທ່ານ ໂດ້ຮຸງຫວຽດ, ຮອງລັດຖະມົນຕີ ກະຊວງ ການຕ່າງປະເທດ ຫວຽດນາມ, ຫົວໜ້າ ກອງປະຊຸມ ເຈົ້າໜ້າທີ່ ອາວຸໂສ ອາຊຽນ (SOM) ຂອງ ຫວຽດນາມ, ພ້ອມກັບ ຫົວໜ້າ SOM ແລະ ຫົວໜ້າ ຄະນະ ຂອງບັນດາປະເທດ ອາຊຽນ ແລະ ອົດສະຕຣາລີ ໄດ້ເຂົ້າຮ່ວມເວທີປາໄສ ອາຊຽນ - ອົດສະຕຣາລີ ຄັ້ງທີ 36 ໄດ້ຈັດຂຶ້ນຢູ່ ເມວເບີນ ຂອງອົດສະຕຣາລີ.
ຂປລ.ວິທະຍຸ ກະຈາຍສຽງ ແຫ່ງຊາດ ຫວຽດນາມ, ວັນທີ 6 ກຸມພານີ້, ທ່ານ ໂດ້ຮຸງຫວຽດ, ຮອງລັດຖະມົນຕີ ກະຊວງ ການຕ່າງປະເທດ ຫວຽດນາມ, ຫົວໜ້າ ກອງປະຊຸມ ເຈົ້າໜ້າທີ່ ອາວຸໂສ ອາຊຽນ (SOM) ຂອງ ຫວຽດນາມ, ພ້ອມກັບ ຫົວໜ້າ SOM ແລະ ຫົວໜ້າ ຄະນະ ຂອງບັນດາປະເທດ ອາຊຽນ ແລະ ອົດສະຕຣາລີ ໄດ້ເຂົ້າຮ່ວມເວທີປາໄສ ອາຊຽນ - ອົດສະຕຣາລີ ຄັ້ງທີ 36 ໄດ້ຈັດຂຶ້ນຢູ່ ເມວເບີນ ຂອງອົດສະຕຣາລີ. ນອກຈາກ ວຽກງານ ກວດຄືນ ສະພາບການ ຮ່ວມມື ແລະ ແລກປ່ຽນ ບັນດາວິທີ ການຊຸກຍູ້ ການພົວພັນ ໃນໄລຍະທີ່ຈະມາເຖິງ, ກອງປະຊຸມຄັ້ງນີ້ ຍັງແນໃສ່ກະກຽມໃຫ້ແກ່ ກອງປະຊຸມສຸດ ຍອດພິເສດ ອາຊຽນ - ອົດສະຕຣາລີ ເພື່ອສະເຫລີມສະຫລອງ ສາຍພົວພັນຄູ່ຮ່ວມເຈລະຈາ ລະຫວ່າງ ສອງຝ່າຍ ຄົບຮອບ 50 ປີ (1974 - 2024), ຈັດຂຶ້ນທີ່ ເມວເບີນ ໃນເດືອນ ມີນາ ທີ່ຈະມາເຖິງ. ໃນກອງປະຊຸມ, ສອງຝ່າຍ ເຫັນດີເປັນເອກະພາບ ເສີມສ້າງສາຍພົວພັນ ຄູ່ຮ່ວມມື ຍຸດທະສາດ ຮອບດ້ານ (CSP, ປີ 2021) ໃຫ້ເລິກເຊິ່ງຍິ່ງຂຶ້ນ ຕາມທິດມີປະສິດຕິຜົນ, ແທດຈິງ ແລະ ພ້ອມກັນມີຜົນປະໂຫຍດ; ຜັນຂະຫຍາຍ ການເຈລະຈາສ້າງແຜນການ ວາລະການຮ່ວມມື ໃນໄລຍະໃໝ່ (2025-2029) ເພື່ອລາຍງານ ບັນດາ ລັດຖະມົນຕີ ການຕ່າງປະເທດ ຮັບຮອງເອົາ ເນື່ອງໃນໂອກາດ ກອງປະຊຸມລັດຖະມົນຕີການຕ່າງປະເທດ ອາຊຽນ ຢູ່ລາວ ໃນເດືອນ ກໍລະກົດ 2024, ໃນນັ້ນ ໃຫ້ບູລິມະສິດແກ່ວຽກງານຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະ ບຳລຸງສ້າງ ຊັບພະຍາກອນມະນຸດ, ຄຸ້ມຄອງໄພພິບັດ, ຮ່ວມມືທາງທະເລ, ຮັບມືກັບ ການປ່ຽນແປງ ຂອງດິນຟ້າອາກາດ, ພັດທະນາ ອະນຸພາກພື້ນ ແລະ ຫລຸດຄວາມແຕກໂຕນ ດ້ານການພັດທະນາ, ກໍ່ຄືບັນດາ ຂົງເຂດໃໝ່, ທີ່ມີຫຼາຍທ່າແຮງບົ່ມຊ້ອນ, ຄື: ການຫັນເປັນດິຈິຕອນ, ເສດຖະກິດສີຂຽວ, ພະລັງງານໝູນວຽນ, ພະລັງງານທົດແທນ.ກ່ຽວກັບ ການພັດທະນາ ອະນຸພາກພື້ນ ແລະ ຂໍ້ລິເລີ່ມ ເຊື່ອມໂຍງ ອາຊຽນ (IAI), ຕາງໜ້າ ອາຊຽນ ກ່າວຄຳເຫັນ ທ່ານ ໂດ້ຮຸງຫວຽດ ໄດ້ກ່າວເໜັ້ນໜັກ ເຖິງລະດັບ ຄວາມສຳຄັນ ຂອງການຮ່ວມມື ເພື່ອຫລຸດຜ່ອນ ຄວາມແຕກໂຕນ ດ້ານການພັດທະນາ ແລະ ພັດທະນາ ອະນຸພາກພື້ນ ຕໍ່ກັບຄວາມມານະ ພະຍາຍາມ ສ້າງສາ ປະຊາຄົມ ອາຊຽນ; ຍົກອອກບັນດາວິທີ ການແກ້ໄຂ ເພື່ອຊຸກຍູ້ ການຮ່ວມມື ໃນບັນດາ ຂົງເຂດນີ້, ໃນນັ້ນ ສະ ເໜີ ອົດສະຕຣາລີ ຈັດຕັ້ງກົນໄກ ການຮ່ວມມື ເພື່ອປະສານສົມທົບ ແຫລ່ງກຳລັງ ຢ່າງມີປະສິດທິພາບ ແລະ ເພີ່ມທະວີ ການຮ່ວມມື ຢ່າງມີປະສິດຕິຜົນ ລະຫວ່າງ ອົດສະຕຣາລີ ແລະ ບັນດາປະເທດ ອະນຸພາກພື້ນ ແມ່ນ້ຳຂອງ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
