ໄວໜຸ່ມຍິງ ແລະ ຊາຍ ເຜີຍແຜ່ຜົນຮ້າຍ ຂອງມາດຖານທີ່ບໍ່ດີທາງສັງຄົມ ຜ່ານງານສິລະປະ

04/12/2023 10:37
Email Print 495
ຂປລ ຂປລ. ວັນທີ 1 ທັນວາ 2023, ບັນດາໄວໜຸ່ມ ແລະ ອາຈານ ຮ່ວມແຂ່ງຂັນເຜີຍແຜ່ຜົນຮ້າຍ ຂອງມາດຖານທີ່ບໍ່ດີ ຂອງສັງຄົມ ໂດຍການແຂ່ງຂັນຜົນງານສິລະປະ ໃນວັນທີ 1-3 ທັນວາ 2023 ຈັດໂດຍສະຖາບັນວິຈິດສິນແຫ່ງຊາດ

ຂປລ. ວັນທີ 1 ທັນວາ 2023, ບັນດາໄວໜຸ່ມ ແລະ ອາຈານ ຮ່ວມແຂ່ງຂັນເຜີຍແຜ່ຜົນຮ້າຍ ຂອງມາດຖານທີ່ບໍ່ດີ ຂອງສັງຄົມ ໂດຍການແຂ່ງຂັນ ຜົນງານ ສິລະປະ ໃນວັນທີ 1-3 ທັນວາ 2023 ຈັດໂດຍສະຖາບັນວິຈິດສິນແຫ່ງຊາດ ໂດຍໄດ້ການສະໜັບສະໜູນຈາກ ກະຊວງການຕ່າງປະເທດແຟງລັງ ໂດຍຜ່ານອົງການ ແພລນສາກົນ. ໂດນມີຈຸດປະສົງເພື່ອສ້າງຄວາມເຂັ້ມແຂງ ໃຫ້ແກ່ນັກສິລະປິນສະໝັກຫລິ້ນທີ່ເປັນໄວໜຸ່ມ ໃຫ້ເຜີຍແຜ່ຜົນຮ້າຍຂອງມາດ ຕະຖານທີ່ບໍ່ດີທາງສັງຄົມ ໃຫ້ແກ່ຜູ້ເຂົ້າຊົມ ເພື່ອຄົ້ນຫາ ແລະ ເຂົ້າໃຈຫລາຍຂຶ້ນກ່ຽວກັບ ສາເຫດຂອງການຖືພາໃນກ່ອນໄວ, ຄວາມບໍ່ສະເຫມີພາບຂອງເດັກຍິງ ແລະ ຮູບແບບອື່ນໆ ຂອງຄວາມຮຸນແຮງ ຕໍ່ແມ່ຍິງ ແລະ ເດັກຍິງ.

ກິດຈະກຳຄັ້ງນີ້, ເປັນການສ້າງຄວາມເຂັ້ມແຂງ ໃຫ້ແກ່ສິລະປິນສະໝັກຫລິ້ນຜູ້ໜຸ່ມນ້ອຍ, ປູກຈິດສຳນຶກກ່ຽວກັບຜົນຮ້າຍ ຂອງມາດຖານທີ່ບໍ່ດີຂອງສັງຄົມ ເພື່ອສ້າງຄວາມປ່ຽນແປງ ເຊິ່ງການແຂ່ງຂັນສິລະປະ ໃນຄັ້ງນີ້, ກວມເອົາການແຕ້ມຮູບ, ການຖ່າຍຮູບ ແລະ ການສະແດງຮູບ ແຕ້ມແບບດີຈິຕອນ, ເຊິ່ງໄດ້ສຸມໃສ່ຫົວຂໍ້ທີ່ ແຕກຕ່າງກັນກ່ຽວ ກັບຜົນກະທົບທາງລົບ ຂອງການຖືພາກ່ອນໄວ, ຄວາມບໍ່ສະເໝີພາບທາງເພດ ແລະ ຄວາມຮຸນແຮງຕໍ່ແມ່ຍິງ ແລະ ເດັກຍິງ ເຊິ່ງຜົນງານຮູບແຕ້ມ ດັ່ງກ່າວ ໄດ້ນໍາມາວາງສະແດງຢູ່ ສະຖາບັນວິຈິດສະນແຫ່ງຊາດ.

ທ່ານ ຄຳສຸກ ແກ້ວວົງໄຊ ຜູ້ອຳນວຍການສະຖາບັນ ວິຈິດສິນແຫ່ງຊາດ ໄດ້ກ່າວວ່າ: ເປັນທາງເລືອກທີ່ສະຫລາດ ໃນການສື່ສານມາດຕະຖານ ແລະ ພຶດຕິກຳທີ່ ເປັນອັນຕະລາຍຕໍ່ສັງຄົມ ຜ່ານຜົນງານສິລະປະ ເຖິງວ່າເປັນຫົວຂໍ້ທີ່ໜ້າສົນໃຈ, ແຕ່ຄົນເຮົາຍັງບໍ່ຄ່ອຍສະແດງ ບັນຫາເຫລົ່ານີ້ຜ່ານຜົນງານສິລະປະ. ພ້ອມນີ້, ທ່ານຍັງໄດ້ເຊີນ ນ້ອງໆໄວໜຸ່ມໄປທ່ຽວຊົມ ແລະ ຊອກຫາຄວາມໝາຍ ຂອງຜົນງານສິລະປະ ທີ່ພວກເຮົາຈັດຂຶ້ນ ທີ່ສະຖາບັນວິຈິດສິນ ໃນຄັ້ງນີ້.

ບັນດາສິລະປິນຜູ້ໜຸ່ມນ້ອຍ ປະມານ 130 ຄົນໄດ້ສົ່ງຜົນງານສິລະປະ ຈະນວນ 186 ຜົນງານ ເຂົ້າໃນງານແຂ່ງຂັນສິລະປະ ເພື່ອຢຸດຕິການໃຊ້ຄວາມ ຮຸນແຮງ ຕໍ່ແຍິງ ແລະ ເດັກ ເພື່ອສື່ສານ ແລະ ເຜີຍແຜ່ຜົນກະທົບທາງລົບຂອງການປະຕິບັດ ມາດຕະຖານທີ່ບໍ່ດີທາງສັງຄົມ ໃຫ້ແກ່ສາທາລະນະຊົນທົ່ວໄປ, ນັກຮຽນ, ແລະ ຄູອາຈານ.

ທ່ານນາງ ແຄໂຣລ ແອນ ໂມແທຊັນ ຜູ້ອໍານວຍການປະຈໍາປະເທດລາວຂອງ ອົງການແພລນສາກົນ ປະຈຳ ສປປ ລາວ ໄດ້ກ່າວວ່າ: ພວກເຮົາໄດ້ຮ່ວມມືກັບ ຫລາຍພາກສ່ວນ ເພື່ອເຮັດວຽກກັບໄວໜຸ່ມ ໃນທົ່ວປະເທດໃຫ້ທົ່ວເຖິງ ເພື່ອຮັບຟັງແນວຄວາມຄິດ ແລະ ການສະແດງຄວາມຄິດເຫັນ ຂອງເຂົາເຈົ້າກ່ຽວກັບ ມາດຕະຖານທາງສັງຄົມ ທີ່ເຂົາເຈົ້າໄດ້ພົບເຫັນ. ພ້ອມນີ້, ທ່ານ​ຍັງໄດ້​ເນັ້ນ​ຕື່ມອີກ​ວ່າ: ອົງການແພລນສາກົນ ​ໄດ້​ສ້າງວຄວາມເຂັ້ມແຂງໃຫ້​ແກ່​ເດັກ​ຍິງ, ເດັກ​ຊາຍ ​ແລະ ໄວ​ໜຸ່ມທີ່ຢູ່​ຫ່າງ​ໄກ​ສອກຫລີກ ​ແລະ ບັນດາ​ຊົນ​ເຜົ່າ ​ລວມທັງ​ຍິງ​ໜຸ່ມ​ທີ່​ອອກ​ໂຮງຮຽນ ​ເພື່ອ​ເພີ່ມ​ຄວາມ​ຮູ້​ກ່ຽວ​ກັບ ​ສຸຂະພາບຈະເລີນພັນ ​ແລະ ສິດທິ, ຄວາມ​ເປັນ​ຜູ້ນຳ, ຄວາມ​ສະ​ເໝີ​ພາບ​ທາງ​ເພດ ​ແລະ ສິດທິ​ຂອງ​ເດັກ​ຍິງ​ທຸກ​ຄົນ ເພື່ອໃຫ້ພວກເຂົາເຈົ້າໄດ້ໃຊ້ ຊີວິດຢ່າງມີຄວາມຫວັງ ແລະ ຄວາມຝັນ.

ອົງການແພລນສາກົນ ປະຈຳ ສປປ ລາວ, ພາຍໃຕ້ການຊີ້ນໍາຂອງກະຊວງສຶກສາທິການ ແລະ ກິລາ, ຮ່ວມມືກັບພະນແກສຶກສາທິການ ແລະ ກິລາ ແຂວງບໍ່ແກ້ວ ແລະ ແຂວງອຸດົມໄຊ ໄດ້ສຸມໃສ່ເຮັດວຽກກັບ ນັກຮຽນຊັ້ນມັດທະຍົມສຶກສາ ແລະ ຄູ-ອາຈານ ພ້ອມດ້ວຍ ອົງການຈັດຕັ້ງທາງສັງຄົມ ໂດຍຜ່ານໂຄງການ ເພື່ອສົ່ງເສີມ ຄວາມຮູ້ດ້ານເພດສຶກສາ ແບບມີສ່ວນຮ່ວມ ແລະ ປັບປຸງຂອດການບໍລິການ ດ້ານສຸຂະພາບໃຫ້ເກີດປະໂຫຍດ ແກ່ໄວໜຸ່ມໃນ ໂຮງຮຽນມັດທະຍົມ ແລະ ໄວໜຸ່ມທີ່ປະລະການຮຽນ.

ຂໍ້ມູນ-ພາບ: ອົງການແພລນສາກົນ ປະຈຳ ສປປ ລາວ

KPL

ຂ່າວອື່ນໆ

ads
ads

Top