ຂປລ
*ດັ່ງທີ່ເຮົາຮູ້ນໍາກັນແລ້ວວ່າພັກ-ລັດ ຍາມໃດກໍ່ຖືເອົາບັນຫາການແກ້ໄຂຄວາມທຸກຍາກ ເພື່ອພັດທະນາ ແລະ ຍົກລະດັບຊີວິດການເປັນຢູ່ຂອງປະຊາ ຊົນ ເປັນບັນຫາສໍາຄັນຕົ້ນຕໍ ເວົ້າສະເພາະ ສະຫະພັນແມ່ຍິງແຕ່ລະຂັ້ນ ກໍໄດ້ເອົາໃຈໃສ່ໃນການຊຸກຍູ້ ສະມາຊິກສະຫະພັນແມ່ຍິງ, ແມ່ຍິງລາວບັນດາ ເຜົ່າ ໃນການແກ້ໄຂຄວາມທຸກຍາກ ໃນນັ້ນໄດ້ຖືເອົາວຽກ ງານກະສິກໍາເປັນວຽກພື້ນຖານ ດ້ວຍການສົ່ງເສີມການປູກຝັງ-ລ້ຽງສັດ ແລະ ການບໍລິການ ອື່ນໆ
*ດັ່ງທີ່ເຮົາຮູ້ນໍາກັນແລ້ວວ່າພັກ-ລັດ ຍາມໃດກໍ່ຖືເອົາບັນຫາການແກ້ໄຂຄວາມທຸກຍາກ ເພື່ອພັດທະນາ ແລະ ຍົກລະດັບຊີວິດການເປັນຢູ່ຂອງປະຊາຊົນ ເປັນບັນຫາສໍາຄັນຕົ້ນຕໍ ເວົ້າສະເພາະ ສະຫະພັນແມ່ຍິງແຕ່ລະຂັ້ນ ກໍໄດ້ເອົາໃຈໃສ່ໃນການຊຸກຍູ້ ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ ໃນການແກ້ໄຂຄວາມທຸກຍາກ ໃນນັ້ນໄດ້ຖືເອົາວຽກ ງານກະສິກໍາເປັນວຽກພື້ນຖານ ດ້ວຍການສົ່ງເສີມການປູກຝັງ-ລ້ຽງສັດ ແລະ ການບໍລິການອື່ນໆ ເພື່ອສ້າງລາຍຮັບໃຫ້ແກ່ຄອບຄົວ ໄລຍະຜ່ານມາກໍ່ມີຫລາຍຄອບຄົວທີ່ກາຍເປັນຄອບຄົວຕົວແບບ ໃນປູກຝັງລ້ຽງສັດ ເໝືອນດັ່ງ ນາງ ບຸນທັນ ປະຊາຊົນ ຈາກບ້ານດອນງິ້ວ, ເມືອງງາ, ແຂວງອຸດົມໄຊ.
ນ ບຸນທັນ ຂັນທະລີ ໃຫ້ຮູ້ວ່າ: ຕົນເອງ ແລະ ຜູ້ເປັນຜົວ ເປັນຄູສອນ ອາໄສກິນແຕ່ເງິນເດືອນ ກໍ່ບໍກຸ້ມກິນ ຈຶ່ງປຶກສາຫາລືກັນ ໃນການຊອກອາຊີບເສີມ ເພື່ອໃຫ້ຄອບຄົວກຸ້ມຢູ່ກຸ້ມກິນຄືກັບຄອບຄົວອື່ນຈິ່ງຕັດສິນໃຈເລີ່ມລ້ຽງສັດໃຫ່ຍ ເພາະຜູ້ເປັນຜົວກໍ່ຮັກມັກໃນການລ້ຽງສັດໂດຍ ເບື້ອງຕົ້ນໄດ້ນໍາເອົາເງິນທີ່ສະສົມ ແລະ ທຶນທີ່ພໍ່ແມ່ແບ່ງປັນຈໍານວນ 50 ລ້ານກີບ ເພື່ອມາຊື້ ງົວແລະຄວາຍ ຈໍານວນ 7 ຄູ່, ອຸປະກອນຕ່າງໆ ເປັນຕົ້ນແມ່ນ ເຫລັກໜາມ, ເຫລັກຕະປູ, ສ່ວນສະຖານທີ່ແມ່ນມີຄວາມສະດວກສະບາຍເໝາະສົມແກ່ການລ້ຽງ, ນອກຈາກນັ້ນຍັງມີສະຖານທີ່ສໍາລັບປູກຫຍ້າໃຫ້ສັດເພາະພາຍໃນຊຸມຊົນໄດ້ກໍານົດ ສະຖານທີ່ລ້ຽງສັດສະເພາະຂອງແຕ່ລະຄອບຄົວ ສະຖານທີ່ດັ່ງກ່າວຢູ່ຫ່າງຈາກບ້ານ ສະນັ້ນ, ຕ້ອງໄດ້ເອົາໃຈໃສ່ ໃນທຸກຂັ້ນຕອນຂອງການລ້ຽງ ເຊັ່ນ: ການໃຫ້ອາຫານ(ຫຍ້າ) ຕ້ອງພຽງພໍກັບຄວາມຕ້ອງການຂອງສັດ ນອກນີ້,ກໍໃຫ້ນໍ້າ, ເກືອ ແລະ ສັກຢາກັນພະຍາດ ຢ່າງເປັນປົກກະຕິ ເພື່ອເຮັດໃຫ້ສັດ ມີຮ່າງກາຍສົມບູນ ແລະ ບໍ່ເປັນພະຍາດ.
ນ ບຸນທັນ ຍັງເວົ້າຕື່ມອີກວ່າ: ໃນໄລຍະ 5 ປີ ແຕ່ປີ 2015-2020 ທີ່ເຮັດອາຊີບສາມາດ ສ້າງລາຍຮັບເຂົ້າຄອບຄົວໄດ້ 250 ລ້ານກີບ ແລະ ໃນປີ 2021ຈົນມາຮອດປັດຈຸບັນ ສາມາດສ້າງລາຍຮັບໄດ້ 130ລ້ານ ຕໍ່ປີ ສະເລ່ຍຜົນໄດ້ຮັບໃນໄລຍະ 3 ປີ ກໍາໄລທັງໝົດ ປະມານ 390 ລ້ານກີບ ເຊິ່ງລາຍຮັບນີ້ ເຮັດໃຫ້ຊີວິດ ການເປັນຢູ່ຂອງຄອບຄົວດີຂຶ້ນຈາກເມື່ອກ່ອນຫລາຍ ດັ່ງນັ້ນ, ຈຶ່ງມີແຜນຂະຫຍາຍເນື້ອທີ ແລະ ເພີ່ມ ຈໍານວນສັດລ້ຽງຂຶ້ນຕື່ມອີກ 50 ໂຕ, ຂະຫຍາຍເນື້ອທີ່ການປູກຫຍ້າ ແລະ ບົວລະບັດສວນໃຫ້ຄົງທີ່ຕະຫລອດໄປ ເພື່ອລູກຫລານບໍ່ມີວຽກເຮັດງານທໍາ ສາມາດຍຶດຖືອາຊີບທີ່ພໍ່ແມ່ໄດ້ສ້າງພື້ນຖານໃຫ້ໄວ້ ພ້ອມທັງຝາກຂໍ້ຄິດດີໆເຖິງ ເອື້ອຍນ້ອງແມ່ຍິງບັນດາເຜົ່າ ໂດຍສະເພາະແມ່ນຄູ- ອາຈານ ຖ້າມີເງື່ອນໄຂ ແຕ່ຕົ້ນທຶນບໍ່ຫລາຍກໍ່ສາມາດລ້ຽງໄດ້ເຊັ່ນກັນ ຂໍພຽງແຕ່ເຮົາຕັດສິນໃຈລົງມືເຮັດ, ມີຄວາມຕັ້ງໃຈ, ດຸໝັ່ນ ກໍ່ຈະເຮັດໃຫ້ຄອບຄົວມີລາຍຮັບເພີ່ມ ແລະ ຖ້າທ່ານໃດມີຄວາມສົນໃຈກໍ່ສາມາດໃຫ້ຄຳປຶກສາຖອດຖອນບົດຮຽນ ແລະ ແລກປ່ຽນປະສົບການໄດ້ ກັບຄອບຄົວຂອງທ່ານ ທີ່ບ້ານດອນງິ້ວ,ເມືອງງາ, ແຂວງອຸດົມໄຊ.
ຂຽນ: ມາລິດາ
KPL
