ຂປລ.ຕາມຂ່າວຈາກ ວິທະຍຸສາກົນ ຫວຽດນາມ,ວັນທີ 16 ພະຈິກນີ້ ຢູ່ ອິນໂດເນເຊຍ, ກອງປະຊຸມ ລັດຖະມົນຕີ ກະຊວງ ປ້ອງກັນ ປະເທດ ອາຊຽນ ເປີດກວ້າງ (ADMM+) ຄັ້ງທີ 10 ໄດ້ຮັບຮອງເອົາ ຖະແຫລງການຮ່ວມ ກ່ຽວກັບ ແມ່ຍິງ, ສັນຕິພາບ ແລະ ຄວາມໝັ້ນຄົງ. ກອງປະຊຸມ ຄັ້ງນີ້ ໄດ້ໃຫ້ຄຳໝັ້ນ ສັນຍາ ຊຸກຍູ້ ການເຂົ້າ ຮ່ວມ ແລະ ການຊີ້ນຳ ຢ່າງຄົບຖ້ວນ, ຍຸຕິທຳ ແລະ ມີຄວາມໝາຍ ຂອງແມ່ຍິງ ໃນທຸກຂົງເຂດ ສັນຕິພາບ ແລະ ຄວາມໝັ້ນຄົງ, ພິເສດ ແມ່ນໃນການປ້ອງກັນ, ສະກັດກັ້ນ, ຄຸ້ມຄອງ ແລະ ແກ້ໄຂ ການປະທະກັນ ທີ່ນຳໃຊ້ ອາວຸດ, ກໍຄື ການສ້າງ ແລະ ຟື້ນຟູ ສັນຕິພາບ ຫລັງການ ປະທະກັນ ເພື່ອແນໃສ່ ມຸ່ງໄປເຖິງ ການສ້າງ ພາກພື້ນ ມີສະຖຽນ ລະພາບ, ສັນຕິພາບ ແລະ ປອດໄພ. ກອງປະຊຸມ ໃຫ້ຄຳໝັ້ນ ສັນຍາ ເພີ່ມທະວີ ບັນດາ ຂອບເຂດ ການຮ່ວມມື ໃນພາກພື້ນ ກ່ຽວກັບ ການປະຕິບັດ ໂຄງການ ດຳເນີນງານ ແມ່ຍິງ ສັນຕິພາບ ແລະ ຄວາມໝັ້ນຄົງ (WPS) ແນໃສ່ ປົກປັກ ຮັກສາ, ເຄົາລົບ ແລະ ຊຸກຍູ້ ການປະຕິບັດສິດ ຂອງແມ່ຍິງ ແລະ ເດັກຍິງ ຢ່າງ ຄົບຖ້ວນ ຕໍ່ໜ້າ ໄພນາບຂູ່ ກໍຄື ສິ່ງທ້າທາຍ ຄວາມໝັ້ນຄົງ ພວມເກີດຂຶ້ນ ແລະ ພວມເພີ່ມຂຶ້ນ ຢ່າງແຮງ. ນອກນັ້ນ, ໃຫ້ຄຳໝັ້ນ ສັນຍາຊຸກຍູ້ ຍົກສູງ ກຳລັງ ຄວາມສາມາດ, ການເຂົ້າຮ່ວມ ແລະ ບົດບາດ ນຳພາ ຂອງແມ່ຍິງ ດ້ວຍຖານະ ເປັນນັກວາງແຜນ ກຳນົດ ນະໂຍບາຍ ໃນທຸກວິວັດ ທະນາການ ອອກຄຳຕັດສິນ ຢູ່ທຸກຂັ້ນ, ຮັບຮອງ ເອົາບັນດາ ວິວັດການ ແລະ ກົນໄກລະບອບ ລະບຽບການ ທີ່ກ່ຽວຂ້ອງໃນ ADMM+ ຫລື ຮ່ວມມື ລະຫວ່າງ ບັນດາ ປະເທດ ADMM+. ທ່ານ ພົອ ຟານວັນຢາງ, ລັດຖະມົນຕີ ກະຊວງ ປ້ອງກັນ ປະເທດ ຫວຽດນາມ, ສະເໜີ ໃຫ້ບັນດາ ປະເທດ ສືບຕໍ່ຍົກສູງ ບົດບາດ ໃຈກາງຂອງ ອາຊຽນ, ເພີ່ມທະວີ ການສ້າງ, ປັບປຸງ ຄວາມໄວ້ເນື້ອ ເຊື່ອໃຈ ຍຸດທະສາດ ບົນຈິດໃຈ ເຄົາລົບກົດໝາຍ ແລະ ເຄົາລົບ ເຊິ່ງກັນ ແລະ ກັນ, ຍຸຕິທຳ, ຕ່າງຝ່າຍ ຕ່າງມີຜົນປະໂຫຍດ./.

KPL