ຂປລ. ໃນວາລະກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX, ພາຍໃຕ້ການເປັນປະທານຂອງ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ທ່ານ ຄຳແສນ ສີສະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 9 ແຂວງຊຽງຂວາງ ໄດ້ປະກອບຄຳຄິດຄຳເຫັນ ໃສ່ກົດໝາຍວ່າດ້ວຍການປິ່ນປົວ ສະບັບປັງປຸງ ໂດຍລວມແມ່ນເຫັນດີເປັນເອກະພາບ ເພາະກົດໝາຍສະບັບນີ້ ແນໃສ່ເພື່ອແກ້ໄຂບັນຫາ ປະກົດການຫຍໍ້ທໍ້ ທີ່ເກີດຂຶ້ນໃນສັງຄົມ ແລະ ຕິດພັນກັບການປິ່ນປົວສຸຂະພາບ.

ແນວໃດກໍຕາມ, ທ່ານ ຄຳແສນ ສີສະວົງ ໄດ້ກ່າວວ່າ: ໃນໄລຍະຜ່ານ ເຫັນວ່າການປິ່ນປົວ, ຮັກສາສຸຂະພາບ ຢູ່ໃນສະຖານບໍລິການສາທາລະນະສຸກ ເປັນບັນຫາໜຶ່ງທີ່ສຳຄັນ ແຕ່ຍັງມີຫາງສຽງຈາກສັງຄົມຈົ່ມວ່າ ເປັນຕົ້ນການບໍລິການ ບໍດີເທົ່າທີ່ຄວນ, ສະຖານບໍລິການບໍ່ສະອາດ, ການວາງຢາ, ການວິເຄາະ, ວິໄຈ ແລະ ການບົ່ງມະຕິບາງພະຍາດ ຍັງມີລັກສະນະບໍ່ຊັດເຈນ ແລະ ບໍ່ແໝ້ນຢຳ ເປັນຕົ້ນໄປກວດສຸຂະພາບ ຢູ່ໂຮງໝໍໜຶ່ງ ບົ່ງມະຕິພະຍາດວ່າແນວໜຶ່ງ, ໄປກວດອີກໂຮງໝໍໝຶ່ງ ກະບົ່ງມະຕິພະຍາດອີກແນວໜຶ່ງ ສະນັ້ນ, ເຮັດໃຫ້ຄົນເຈັບ, ຍາດຕິພີນ້ອງ ມີຄວາມສົບສົນ ແລະ ບໍ່ໝັ້ນໃຈທີ່ຈະປິ່ນປົວ ແລະ ຮັກສາ ຢູ່ໂຮງໝໍພາຍໃນ ເຊິ່ງບາງກໍລະນີ້ ແມ່ນໄປຮັກສາ, ປິ່ນປົວຢູ່ປະເທດ ໃກ້ຄຽງ ຈຶ່ງສະເໝີໃຫ້ພາກສ່ວນກ່ຽວຂ້ອງ ເລັ່ງແກ້ໄຂບັນຫາດັ່ງກ່າວຢ່າງຮີບດ່ວນ ເພື່ອເຮັດໃຫ້ລະບົບ ການບໍລິການປິ່ນປົວສຸຂະພາບຢູ່ ສປປ ລາວ ມິຄຸນນະພາບ, ທັນສະໄໝ, ຫລຸດຜ່ອນຫາງສຽງຂອງສັງຄົມ ລວມເຖິງຈັນຍາບັນ, ຈັນຍາທຳຂອງແພດໝໍ.

ທ່ານ ຄຳແສນ ສີສະວົງ ຍັງໄດ້ແລກປ່ຽນຄຳເຫັນໃສ່ມາດຕາ 17 ໂຮງໝໍເອກະຊົນ ເຊິ່ງແມ່ນສະຖານທີ່ ບໍລິການປິ່ນປົວຂອງເອກະຊົນ ທີ່ໄດ້ຮັບອະນຸຍາດ ຈາກລັດຖະບານ. ເຖິງວ່າກົດໝາຍສະບັບດັ່ງກ່າວ ຈະລະບຸກ່ຽວກັບຂະໜາດ ຂອງໂຮງໝໍເອກະຊົນເຊັ່ນ: ຂະໜາດໃຫຍ່, ຂະໜາດກາງ, ຂະໜາດນ້ອຍ ແລະ ລະບຸກ່ຽວກັບອຸປະກອນຕ່າງໆ ເປັນຕົ້ນອຸປະກອນການແພດ, ຕຽງນອນ, ຜູ້ປກອບວິຊາຊີບ ແລະ ໃຫ້ການບໍລິການປິ່ນປົວທົ່ົວໄປ ຫລື ສະເພາະທາງ ຕາມລະບຽບການ ແລ້ວກໍຕາມ ແຕ່ຂໍສະເໝີຕື່ມໃຫ້ມີການກຳນົດ ຈະແຈ້ງຕື່ມກ່ຽວກັບຈຳນວນ ເປັນຕົ້ນຄວນມີຕຽງນອນເທົ່າໃດຕຽງ ເພື່ອຮັບປະກັນຄວາມພຽງພໍຂອງ ຄົນເຈັບທີ່ມາໃຊ້ບໍລິການຢູ່ໂຮງໝໍນັັ້ນໆ.

ນອກຈາກນີ້, ສສຊ ຫລາຍທ່ານ ກໍໄດ້ສະເໜີໃຫ້ ຕັດບາງເນື້ອໃນ, ເພີ່ມຄຳອະທິບາຍ ໃສ່ບາງໝວດ, ບາງພາກ ແລະ ບາງມາດຕາ ເປັນຕົ້ນມາດຕາ 31 ການວາງຢາ, ມາດຕາ 54 ຄ່າທຳນຽມ, ຄ່າບໍລິການ ແລະ ຄ່າປິ່ນປົວ, ມາດຕາ 32 ການຈ່າຍຢາ, ມາດຕາ 40 ຈັນຍາບັນຂອງຜູ້ປະກອບວິຊາຊີບ, ມາດຕາ 27 ການກວດພະຍາດ ແລະ ອື່ນໆ

ຂ່າວ: ກິດຕາ

ພາບ: ໄອຄຳ

KPL