ຂປລ.ຂະແໜງການທ່ອງທ່ຽວຂອງຈີນ ໄດ້ຮັບການຟື້ນຟູຢ່າງຕັ້ງໜ້າ ແລະ ເຂັ້ມແຂງ ໃນປີ 2023 ພາຍຫລັງ ໄດ້ຮັບຜົນກະທົບຢ່າງໜັກໜ່ວງ ຈາກການແຜ່ລະບາດ ຂອງພະຍາດໂຄວິດ-19 ເຊິ່ງບັນດາປັດໄຈ ທີ່ສໍາຄັນ ໃນການປະກອບສ່ວນ ເຂົ້າໃນການຟື້ນຟູ ເສດຖະກິດການທ່ອງທ່ຽວຂອງຈີນ ລວມມີ: ການຜ່ອນຜັນຂໍ້ຈຳກັດການເດີນທາງ; ການເພີ່ມລາຍຮັບຂອງຜູ້ບໍລິໂພກຈີນ ແລະ ການທ່ອງທ່ຽວ ພາຍໃນ ໄດ້ຮັບຄວາມນິຍົມເພີ່ມຂຶ້ນ.ໃນນັ້ນ, ການທ່ອງທ່ຽວເເບບຊົນນະບົດ ເປັນໜຶ່ງປັດໄຈສໍາຄັນທີ່ຊ່ວຍກະຕຸ້ນ ໃຫ້ການທ່ອງທ່ຽວພາຍໃນຂອງ ສປ ຈີນ ຂະຫຍາຍຕົວເພີ່ມຂຶ້ນ ສະເເດງອອກໃນລາຍຮັບຈາກ ການທ່ອງທ່ຽວພາຍໃນປະເທດ ປີ 2023 ເພີ່ມຂຶ້ນ 96%, ມີມູນຄ່າຫລາຍກວ່າ 400 ຕື້ຢວນ (ປະມານ 57 ຕື້ USD) ເຊິ່ງໄດ້ປະກອບສ່ວນສໍາຄັນ ໃນການຂະຫຍາຍຕົວ ຂອງເສດຖະກິດ ແລະ ຍົກສູງ ບົດບາດຂອງຈີນ ໃຫ້ກາຍເປັນປະເທດທ່ອງທ່ຽວ ພາຍໃນຫລາຍທີ່ສຸດ ຂອງຕະຫລາດການທ່ອງທ່ຽວໃນທົ່ວໂລກ.

      ການພັດທະນາ ການທ່ອງທ່ຽວແບບຊົນນະບົດ ໄດ້ກາຍເປັນສ່ວນໜຶ່ງທີ່ສໍາຄັນ ເພື່ອຊຸກຍູ້ການພັດ ທະນາ ອຸດສາຫະກຳ ດ້ານການທ່ອງທ່ຽວ ໂດຍອົງການທ່ອງທ່ຽວໂລກ (UNWTO) ໄດ້ໃຫ້ຄຳ ອະທິບາຍ ວ່າການທ່ອງທ່ຽວຊົນນະບົດ ເປັນການເປີດປະສົບການການທ່ອງທ່ຽວ ທີ່ກ່ຽວຂ້ອງກັບການເຄື່ອນໄຫວ ທາງທຳມະຊາດ, ກະສິກໍາ, ວັດທະນະທຳ ແລະ ວິຖີຊີວິດໃນຊົນນະບົດ ເຊິ່ງລວມມີ ກິດຈະກໍາ ທົ່ວໄປ ຂອງນັກທ່ອງທ່ຽວ ເຊັ່ນ: ຂີ່ເຮືອ, ປຸງແຕ່ງອາຫານທ້ອງຖິ່ນ, ງານຫັດຖະກໍາ, ແລະ ການທ່ອງທ່ຽວ ສະຖານທີ່ທໍາມະຊາດ.

      ການທ່ອງທ່ຽວຊົນນະບົດ ໄດ້ມີການພັດທະນາຢ່າງວ່ອງໄວ ແລະ ການທ່ອງທ່ຽວ ຮູບເເບບດັ່ງກ່າວ ໄດ້ກາຍເປັນແນວຄວາມຄິດທີ່ສຳຄັນ ຂອງການທ່ອງທ່ຽວຈີນ ເຊິ່ງຕົວຢ່າງໜຶ່ງທີ່ໜ້າສົນໃຈແມ່ນ ບ້ານ Shimen Shanzhuang ໃນ ເມືອງ Qufu, ແຂວງ Shandong ພາກຕາເວັນອອກຂອງຈີນ. ບ້ານດັ່ງ ກ່າວເປັນໝູ່ບ້ານທ່ອງທ່ຽວ ຊົນນະບົດທີ່ສໍາຄັນຂອງຊາດ, ໄດ້ພັດທະນາການທ່ອງທ່ຽວ ຊົນນະບົດ ຢ່າງຕັ້ງໜ້າ ແລະ ໄດ້ຮັບຜົນສໍາເລັດໃນປັດຈຸບັນ ເຊິ່ງໝູ່ບ້ານນີ້ໄດ້ຮັບນັກທ່ອງທ່ຽວ ຫລາຍກວ່າ 400.000 ຄົນໃນແຕ່ລະປີ, ສ້າງລາຍຮັບທັງໝົດ 4 ລ້ານຢວນ (ປະມານ 595.717 ໂດລາສະຫະລັດ), ໝາຍເຖິງລາຍຮັບຕໍ່ຫົວຄົນຕໍ່ປີ 11.000 ຢວນ. ນອກນີ້ ຍັງສ້າງວຽກເຮັດງານທໍາໃຫ້ແກ່ຄົນງານ 860 ກວ່າຄົນໃນແຕ່ລະປີ.

      ສປ ຈີນໄດ້ເຫັນເຖິງຄວາມສໍາຄັນ ຂອງການທ່ອງທ່ຽວຊົນນະບົດ ໃນປີ 2017, ທ່ານ ສີ ຈິ້ນຜິງ ປະທານປະເທດຈີນ ໄດ້ປະກາດຍຸດທະສາດ ຟື້ນຟູຊົນນະບົດ ໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 19 ຂອງພັກກອມມູນິດຈີນ ແລະ ໄດ້ຍົກວຽກງານສົ່ງເສີມການກະສິກຳ ແລະ ການພັດທະນາຊົນນະບົດເປັນວາລະຍຸດທະສາດ. ພ້ອມດຽວກັນນັ້ນ, ກໍມີການຂຶ້ນບັນຊີລາຍຊື່ ບັນດາບ້ານທີ່ສໍາຄັນ ເພື່ອເຂົ້າຮ່ວມໂຄງການສົ່ງເສີມ ການທ່ອງທ່ຽວຊົນນະບົດ ໂດຍມີຈຸດປະສົງເພື່ອປະຕິບັດ ການຟື້ນຟູເຂດຊົນນະບົດ ແລະ ຊຸກຍູ້ການພັດທະນາ ການທ່ອງທ່ຽວພາຍໃນ, ແນໃສ່ເພື່ອສ້າງໂອກາດ ໃນການຊອກ ວຽກເຮັດງານທຳໃຫ້ແກ່ປະຊາຊົນ ແລະ ຮັດແຄບຄວາມຫລຸດໂຕນ ດ້ານການພັດທະນາ ລະຫວ່າງຕົວເມືອງ ແລະ ຊົນນະບົດຂອງຈີນ. ພ້ອມທັງປະຕິບັດນະໂຍບາຍຫລຸດພາສີໃຫ້ແກ່ ວິສະຫະກິດ ການທ່ອງທ່ຽວ,  ການປັບປຸງພື້ນຖານໂຄງລ່າງ ເປັນຕົ້ນ ຖະໜົນຫົນທາງ, ຈຸດຮັບສັນຍານ ໂທລະສັບ, ອິນເຕີເນັດ, ໂຄງການປັບປຸງເຮືອນຊານ ຂອງປະຊາຊົນໃຫ້ເປັນ HOME STAY, ການປັບປຸງສະຖານ ທີ່ທ່ອງທ່ຽວທາງທໍາມະຊາດ, ການສົ່ງເສີມການຜະລິດກະສິກໍາ ໃຫ້ກາຍເປັນສິນຄ້າທ້ອງຖິ່ນ, ຄຽງຄູ່ກັບການພັດທະນາເເບບຍືນຍົງ  ແລະ ການໃຫ້ຄວາມຮູ້ແກ່ປະຊາຊົນ ໃນເຂດຊົນນະບົດໃຫ້ຮັບຮູ້ ແລະ ເຂົ້າໃຈ ກ່ຽວກັບການອະນຸລັກສິ່ງເເວດລ້ອມ.

      ຕໍ່ບົດຮຽນຂອງ ສປ ຈີນ ທີ່ໄດ້ກ່າວມານັ້ນ, ສະເພາະ ສປປ ລາວ, ກົມພັດທະນາ ການທ່ອງທ່ຽວຂອງລາວ ໄດ້ເປີດເຜີຍລາຍງານ ເມື່ອບໍ່ດົນມານີ້ວ່າ ມີນັກທ່ອງທ່ຽວສາກົນ ມາຢ້ຽມຢາມລາວເຖິງ 1,6 ລ້ານເທື່ອຄົນ, ນັບແຕ່ເດືອນມັງກອນ ຫາ ເດືອນມິຖຸນາ ປີ 2023, ຖ້າທຽບໃສ່ປີ 2022 ແມ່ນມີພຽງ 644.756 ຄົນ. ໃນນັ້ນ, 5 ປະເທດ ທີ່ມີພົນລະເມືອງໄປ ຢ້ຽມຢາມປະເທດລາວ ລວມມີ: ໄທ, ຫວຽດນາມ, ສປ ຈີນ, ສ ເກົາຫລີ ແລະ ອາເມລິກາ. ສະຖານທີ່ ທີ່ໄດ້ຮັບຄວາມນິຍົມສໍາລັບ ນັກທ່ອງທ່ຽວ ກໍເເມ່ນ ສະຖານທີ່ທ່ອງທ່ຽວທາງທຳມະຊາດ ເປັນຕົ້ນເເມ່ນ ເມືອງວັງວຽງ ແຂວງວຽງຈັນ, ແຂວງຫລວງພະບາງ,  ແລະ ເເຂວງຈໍາປາສັກ. ກິດຈະກໍາ ທີ່ໄດ້ຮັບຄວາມນິຍົມຊົມຊອບ ຈາກນັກທ່ອງທ່ຽວ ຂອງ ແຕ່ລະເເຂວງແມ່ນຄ້າຍຄື ຫລື ມີຄວາມແຕກຕ່າງກັນເຊັ່ນ: ການລ່ອງເຮືອຊົມທໍາມະຊາດ ແມ່ນໍ້າຂອງ, ພູຜາປ່າໄມ້, ຢ້ຽມຊົມວັດວາອາຮາມ ແລະ ວັດທະນະທໍາ ຮີດຄອງປະເພນີການໃສ່ບາດ. ຍ້ອນເຫັນໄດ້ໃຈຄວາມສໍາຄັນ ຂອງທ່າເເຮງດັ່ງກ່າວ, ສປປ ລາວ ຄວນສຸມໃສ່ພັດທະນາ ການທ່ອງທ່ຽວແບບຊົນນະບົດ ເພື່ອເປັນການສ້າງ ເສດຖະກິດຊົນນະບົດ ເນື່ອງຈາກ ສປປ ລາວ ຍັງມີເຂດຊົນນະບົດ ແລະ ພື້ນທີ່ສ່ວນໃຫຍ່ແມ່ນເປັນພື້ນທີ່ກະສິກໍາ ທີ່ຕ້ອງການການພັດທະນາ ເປັນຈໍານວນຫລາຍ ເຊິ່ງຄວນມີການຄົ້ນຄວ້າ ແລະ ວາງນະໂຍບາຍພັດທະນາ ການທ່ອງທ່ຽວພາຍໃນປະເທດ ເພື່ອເປົ້າໝາຍສົ່ງເສີມ ປັບປຸງຊີວິດການເປັນຢູ່ ຂອງປະຊາ ຊົນຢູ່ເຂດຊົນນະບົດ ແລະ ສ້າງການປ່ຽນແປງ ໃນທາງສ້າງສັນ ໂດຍອີງໃສ່ຖອດຖອນບົດຮຽນຈາກ ສປ ຈີນ ທີ່ສາມາດພັດທະນາ ບ້ານຊົນນະບົດ ໃຫ້ກາຍເປັນເຂດເສດຖະກິດ.

      ໃນປີທ່ອງທ່ຽວລາວ 2024, ສປປ ລາວ ໄດ້ວາງຄາດໝາຍສູ້ຊົນ ເພື່ອດຶງດູດນັກທ່ອງທ່ຽວ ໃຫ້ໄດ້ 4 ລ້ານກວ່າຄົນ ເຊິ່ງລັດຖະບານ ໄດ້ມີການວາງແຜນລົງທຶນ ປັບປຸງພື້ນຖານໂຄງລ່າງ, ຜະລິດສື່ໂຄສະນາທ່ອງທ່ຽວ, ສ້າງ QR code ໃຫ້ແຫລ່ງທ່ອງທ່ຽວ, ສ້າງປື້ມຄູ່ມື ແຫລ່ງທ່ອງທ່ຽວຮອບດ້ານ ເເນໃສ່ສະ ແດງ ມໍລະດົກວັດທະນະທຳ ແລະ ຄວາມງາມທາງທຳມະຊາດ ທີ່ອຸດົມສົມບູນເປັນ ສະຖານທີ່ສຳຄັນ ຂອງນັກທ່ອງທ່ຽວທີ່ມາຢ້ຽມຢາມ. ນອກຈາກສະຖານທີ່ທ່ອງທ່ຽວທີ່ມີຢູ່ແລ້ວ, ຄວນມີການຄົ້ນຄວ້າ ວາງແຜນ ບັນດາເຂດ ຫລື ກຸ່ມບ້ານອື່ນໆ ຂອງ ສປປ ລາວ ທີ່ມີລັກສະນະສະເພາະ ແລະ ມີທ່າເເຮງ ເພື່ອຫັນເປັນສະຖານທີ່ ທ່ອງທ່ຽວທາງຊົນນະບົດ ໂດຍອີງໃສ່ການຖອດຖອນບົດຮຽນ, ວິທີການຄຸ້ມຄອງ ແລະ ນະໂຍບາຍການສົ່ງເສີມ ການທ່ອງທ່ຽວແບບຊົນນະບົດ ຈາກສປ ຈີນ ເພື່ອປັບປຸງຊີວິດ ການເປັນຢູ່ຂອງປະຊາ ຊົນໃນເຂດດັ່ງກ່າວ ພ້ອມທັງສົ່ງເສີມເສດຖະກິດ. ສໍາລັບ ສປປ ລາວ ປັດຈຸບັນມີການປັບປຸງພື້ນຖານໂຄງລ່າງ ເປັນຕົ້ນການສ້າງຖະໜົນຫົນທາງ, ທາງດ່ວນ, ທາງລົດໄຟ ເຊິ່ງຈະປະກອບສ່ວນສໍາຄັນ ໃຫ້ແກ່ການພັດທະນາ ການທ່ອງທ່ຽວຊົນນະບົດຂອງລາວ ໃຫ້ສາມາດເກີດດອກອອກຜົນ ແລະ ຂະຫຍາຍຕົວໄດ້ໄວກວ່າເກົ່າ.

ໂດຍ:ສະຖາບັນການຕ່າງປະເທດ

KPL