ຂປລ. ແຂວງຈຳປາສັກ ອຸດົມສົມບູນໄປດ້ວຍ ຊັບພະຍາກອນທຳມະຊາດ, ມີປະຫັວດສາດ ຄວາມເປັນມາອັນຍາວນານ, ມີຮ່ອງຮອຍ ຄວາມຈະເລີນຮຸ່ງເຮືອງ ທາງດ້ານອະລິຍະທຳ, ວັດທະນະທຳ, ປູສະນິຍະສະຖານອັນລ້ຳຄ່າ ເປັນມູນມໍລະດົກໂລກ ແລະ ມູນມໍລະດົກ ຂອງຊາດ ເຊິ່ງເປັນສີສັນ ທາງດ້ານວັດທະນະທຳ ທີ່ຫລາກຫລາຍ; ມີແຫລ່ງທ່ອງທ່ຽວ ທຳມະຊາດ, ວັດທະນະທຳ ແລະ ປະຫວັດສາດ ຫລາຍແຫ່ງ ທີ່ໜ້າທ່ຽວຊົມ ເປັນຕົ້ນ ວັດພູຈຳປາສັກ, ນ້ຳຕົກຕາດຄອນພະເພັງ, ຫລີ່ຜີ, ປາຂ່ານ້ຳຈືດ ແລະ ແຫລ່ງທ່ອງທ່ຽວອື່ນໆ ທີ່ເປັນແຫລ່ງທ່ອງທ່ຽວ ລະດັບຊາດ, ລະດັບພາກພື້ນ ແລະ ລະດັບໂລກ ເຊິ່ງເປັນຈຸດໝາຍປາຍທາງ ຂອງນັກທ່ອງທ່ຽວ ທັງພາຍໃນ ແລະ ຕ່າງປະເທດ.

ທ່ານ ອຳພົນ ແສງພະຈັນ ຮອງຫົວໜ້າພະແນກ ຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ແຂວງຈຳປາສັກ ໄດ້ລາຍງານ ໃນກອງປະຊຸມ ຄະນະການປະສານງານ ຮ່ວມມືສາກົນຂອງມໍລະດົກໂລກ ວັດພູຈໍາປາສັກ ຄັ້ງທີ 7 ໃນວັນທີ 7 ພະຈິກ 2023 ວ່າ: ແຫລ່ງທ່ອງທ່ຽວທີ່ ໂດດເດັ່ນກວ່າໝູ່ ແມ່ນມໍລະດົກໂລກວັດພູ ພ້ອມພື້ນທີ່ວັດທະນະທຳຈຳປາສັກ ເຊິ່ງໄດ້ຖືກຮັບຮອງຈົດເຂົ້າທະບຽນ ເປັນມໍລະດົກໂລກ ໂດຍອົງການອຸຍແນັສໂກ  (UNESCO) ໃນວັນທີ 16 ທັນວາ 2001, ສະຖານ​ບູຮານ​ວັດ​ພູ ບໍ່ວ່າຈະເປັນການອອກ ແບບ, ການວາງແຜນຜັງ ແລະ ການກໍ່ສ້າງທີ່ກົມກືນ ກັບຈຸດພິເສດ ທາງທຳມະຊາດຂອງພື້ນທີ່, ທັງສອດຄ່ອງກັບຄວາມເຊື່ອຖື ທາງສາສະໜາ ໂດຍສະເພາະ ສາສະໜາຮິນດູ ທີ່ຂະຫຍາຍເຂົ້າມາເຖິງ ຂົງເຂດອາຊີຕາເວັນອອກສ່ຽງໃຕ້ ເປັນເວລາຫລາຍກວ່າ 1.000 ປີມາແລ້ວ ເຊິ່ງເຫັນວ່າ ເຕັມໄປດ້ວຍຄຸນຄ່າອັນໂດດເດັ່ນ ທາງວັດທະນະທຳ ແລະ ສະຖາປັດຕະຍະກຳເກົ່າແກ່. ຜ່ານການເວລາ ແລະ ຄວາມກົດດັນ ຈາກສະພາບແວດລ້ອມ,  ມາຮອດປັດຈຸບັນ ສະຖານທີ່ແຫ່ງນີ້ ໄດ້ຕົກຢູ່ໃນສະພາບຊຸດໂຊມ ຢ່າງໜັກໜ່ວງ ທີ່​ຈະຕ້ອງໄດ້ມີ ຄວາມເອົາໃຈໃສ່ ໃນການຄຸ້ມຄອງປົກປັກຮັກສາ ແລະ ບູລະນະສ້ອມແປງ ໃຫ້ມີຄວາມຍືນຍົງ ເພື່ອຄົນຮຸ່ນຕໍ່ໆໄປ.

ເຖິງຢ່າງໃດກໍຕາມ, ການປະກອບສ່ວນຂອງ ການຈັດຕັ້ງພາກລັດ, ຕະຫລອດເຖິງການສະໜັບສະໜູນ ຊ່ວຍເຫລືອ ຂອງບັນດາປະເທດ ເພື່ອນມິດ ແລະ ອົງການຈັດຕັ້ງສາກົນຕ່າງໆ  ຖືເປັນຜົນສຳເລັດຢ່າງໃຫຍ່ຫລວງ ເຂົ້າໃນການຄຸ້ມຄອງປົກປັກຮັກສາ, ພັດທະນາ ແລະ ເສີມຂະຫຍາຍຄຸນຄ່າ ໃຫ້ມີຄວາມຍືນຍົງ ຈົນເປັນທີ່ຮັບຮູ້ກັນຢ່າງກວ້າງຂວາງ ໂດຍສະເພາະ ຜົນການຄົ້ນຄວ້າ-ສຳຫລວດ ເພື່ອນໍາໄປສູ່ ການອະນຸລັກ ແລະ ບູລະນະສ້ອມແປງ ເພື່ອຮັກສາໄວ້ຊື່ງຄຸນຄ່າ ຂອງໂຄງສ້າງ ບູຮານສະຖານ ບັນດາໂຄງການເຫລົ່ານັ້ນ ປະກອບມີ ໂຄງການຮ່ວມມື ລາວ-ຝຣັ່ງ, ລາວ-ເກົາຫລີ, ລາວ-ອິນເດຍ , ລາວ-ອີຕາລີ, ລາວ-ຍີ່ປຸ່ນ ແລະ ບັນດາປະເທດເພື່ອນມິດອື່ນໆ ຊຶ່ງໄດ້ໃຫ້ ການສະໜັບ ສະໜູນຊ່ວຍເຫລືອ ໃນການກໍ່ສ້າງພື້ນຖານ ໂຄງລ່າງພາຍໃນພື້ນທີ່ມໍລະດົກ.

ຍ້ອນມີການຄຸ້ມຄອງ ແລະ ບຸລະນະປະຕິສັງຂອນຢ່າງຕໍ່ເນື່ອງ ລວມທັງຄວາມເອົາໃຈໃສ່ ໃນດ້ານການບໍລິການ, ການໂຄສະນາ ຜ່ານສື່ຕ່າງໆ  ອັນໄດ້ສ້າງຄວາມສົນໃຈ ໃຫ້ແກ່ນັກທ່ອງທ່ຽວ ທັງພາຍໃນ, ຕ່າງປະເທດ ເດີນທາງເຂົ້າມາ ສຶກສາຄົ້ນຄວ້າ ແລະ ທ່ຽວຊົມທີ່ນັບມື້ນັບຫລາຍຂຶ້ນ. ຕະຫລອດໄລຍະ 22 ປີທີ່ຜ່ານມາ, ຫລັງຈາກໄດ້ຖືກຮັບຮອງ ເປັນມໍລະດົກໂລກແລ້ວນັ້ນ ໄດ້ມີນັກ ທ່ອງທ່ຽວ ເຂົ້າມາທ່ຽວຊົມ ທັງໝົດຫລາຍກວ່າ 1,5 ລ້ານເທື່ອຄົນ. ນອກຈາກນັ້ນ, ສະຖານບູຮານວັດພູ ພ້ອມພື້ນທີ່ ຍັງໄດ້ຮັບການ ຄັດເລືອກ ໃຫ້ເປັນແຫລ່ງທ່ອງທ່ຽວ ຍອດນິຍົມ 2 ປີຊ້ອນ ຄື ປີ 2015 ແລະ 2016 ໂດຍເວັບໄຊ www.lianorg.com ຂອງ ສປ ຈີນ. ສິ່ງດັ່ງກ່າວ, ໄດ້ສະແດງໃຫ້ເຫັນເຖິງ ຄວາມປະທັບໃຈ ຂອງນັກທ່ອງທ່ຽວໃນທົ່ວໂລກ ທີ່ມີຕໍ່ບັນດາແຫລ່ງ ສະຖານບູຮານ, ວັດຖຸບູຮານ ທີ່ນອນໃນພື້ນທີ່ ມໍລະດົກໂລກ ເຊິ່ງແມ່ນໝາກຜົນ-ຜົນງານ ຂອງການເອົາໃຈໃສ່ ໃນການຄຸ້ມຄອງປົກປັກຮັກສາ ໃນໄລຜ່ານມາ ຂອງອໍານາດ ການປົກຄອງທຸກຂັ້ນ ນັບແຕ່ຂັ້ນສູນກາງ ລົງມາເຖິງທ້ອງຖິ່ນ ເຮັດໃຫ້ສະພາບເສດຖະກິດຂອງເມືອງ, ແຂວງ ແລະ ການທ່ອງທ່ຽວ ພາຍໃນແຂວງ ມີບັນຍາກາດຄຶກຄື້ນດີຂື້ນ ເປັນກ້າວໆມາ.

ຂ່າວ: ກິດຕາ

KPL