ຂປລ.ການລ້ຽງດູເດັກອ່ອນ ແລະ​ ເດັກນ້ອຍ ນັບແຕ່ມື້ເກີດຈົນຮອດອາຍຸໄດ້ 2​ ປີ​ ໂດຍການຕິດຕາມ ໃຫ້ຄໍາແນະນໍາ ດ້ານໂພຊະນາການ ແມ່ນມີຄວາມສໍາຄັນຫລາຍ ເພາະຈະເຮັດ ໃຫ້ເດັກອ່ອນ ແລະ ເດັກນ້ອຍ ໄດ້ຮັບສານອາຫານທີ່ມີປະໂຫຍດ ກ້າວໄປເຖິງເຮັດໃຫ້ເດັກ ມີພັດທະນາການທີ່ດີ,​ ມີສຸຂະພາບທີ່ແຂງ​ແຮງ​ ແລະ​ ມີການຈະເລີນເຕີບໂຕທີ່ດີ. ສິ່ງສໍາຄັນ ເດັກນ້ອຍທີ່ເກີດມາໄດ້ 1​ ຊົ່ວໂມງທໍາອິດ ຕ້ອງໄດ້ຮັບນໍ້ານົມເຫລືອງຈາກແມ່​ ເພາະນໍ້ານົມເຫລືອງຈາກແມ່ນັ້ນ ມີຄຸນຄ່າທາງດ້ານສານອາຫານ,​ ທັງຍັງເປັນວັກຊີນ ປ້ອງກັນພະຍາດຕ່າງໆ ໃຫ້ແກ່ເດັກນ້ອຍໄດ້ດີນໍາອີກ. ສ່ວນແມ່ຍິງຖືພາ ແລະ ເດັກນ້ອຍທີ່ຂາດສານອາຫານ​ ຈະສົ່ງຜົນສະທ້ອນ ຕໍ່ສຸຂະພາບ​ຂອງເດັກ​ ເປັນຕົ້ນ ເດັກເກີດມາຈະມີນໍ້າໜັກຕໍ່າກວ່າມາດຕະຖານ,​ ມີສຸຂະພາບບໍ່ແຂງແຮງ, ຈະມີອາການຂາດສານອາຫານ ຊໍາເຮື້ອເລື້ອຍໆໄປ​ ແລະ​ ເດັກນ້ອຍ ກໍຈະເກີດມີພະຍາດແຊກຊ້ອນໄດ້ງ່າຍ.



ທ່ານ ໝໍ​ ນາງ​ ພອນພູວຽງ ພັນທະວົງ ຜູ້ຮັບຜິດຊອບວຽກງານແມ່ ແລະ​ ເດັກ​ ໂຮງໝໍ​ແຂວງ​ ອັດຕະປື​ ໄດ້ໃຫ້ສໍາພາດ ເມື່ອວັນທີ 18​ ຕຸລາ​ 2023​ ວ່າ: ຕະຫລອດໄລຍະຜ່ານມາ ທາງໂຮງ​ໝໍແຂວງ​ ອັດຕະປື ໄດ້ໃຫ້ຄວາມສໍາຄັນ ຕໍ່ວຽກງານການສົ່ງ​ເສີມ ໂພຊະນາການໃນເດັກອ່ອນ ແລະ​ ເດັກນ້ອຍ​ ແຕ່ມື້ເກີດຈົນຮອດອາຍຸໄດ້ 2​ ປີ ໂດຍການໃຫ້ຄໍາແນະນໍາ ​ດ້ານວຽກງານ ໂພຊະນາການ​ ນັບຕັ້ງແຕ່ແມ່ຍິງຖືພາ ທີ່ມາຝາກທ້ອງຈົນຮອດມື້ເກີດ​ ລວມໄປເຖິງຕະຫລອດໄລຍະ ຂອງການມາຮັບການສັກຢາ ໃນແຕ່ລະໄລຍະຂອງການນັດໝາຍ. ພ້ອມນັ້ນ, ທາງພະນັກງານແພດໝໍ ຂອງໂຮງໝໍແຂວງ​ ຍັງໄດ້ເຮັດການກັ່ນຕອງ ໂພຊະນາການ ໂດຍການຄິດໄລ່​ ແມ່ຍິງຖືພາມີການຂາດສານອາຫານ ຫລື​ ແມ່ຍິງຖືພາ ທີ່ມີໂພຊະນາການເກີນ ພາຍຫລັງ ທີ່ເດັກນ້ອຍເກີດ ໄດ້​ 6​ ອາທິດ​ ກໍໄດ້ນັດມາຮັບການສັກຢາ​ ໄປຈົນເຖິງອາຍຸໄດ້​ 2​ ປີ ແລະ ການມາສັກຢາແຕ່ລະຄັ້ງ ແມ່ນໄດ້ມີການຕິດຕາມ​ອາຍຸ,​ ນໍ້າໜັກ,​ ລວງສູງ​ ເພື່ອປະເມີນການຂາດ ສານອາຫານຂອງເດັກ ພ້ອມທັງໄດ້ໃຫ້ຄໍາແນະນໍາ​ ແກ່ພໍ່-ແມ່ຂອງເດັກ​ ໃຫ້ເອົາໃຈໃສ່ດ້ານວຽກງານ ໂພຊະນາການແກ່ເດັກ



ທ່ານ ໝໍ​ ນາງ​ ພອນພູວຽງ ພັນທະວົງ​ ກ່າວຕື່ມວ່າ: ຈາກການເກັບກໍາສະຖິຕິ ຂອງໂຮງໝໍ ແຂວງ​ອັດຕະປື ຍັງພົບເຫັນກ່ຽວກັບ ການຂາດສານອາຫານ ໃນເດັກນ້ອຍ​ຢູ່ ໂດຍອີງຕາມສະຖິຕິ ປີ 2021​ ພົບວ່າ ໃນ​ເດັກ​ລຸ່ມ​ 1​ ປີ​ລົງມາ ຂາດສານອາຫານປານກາງ 33 ກໍ ລະນີ ແລະ ຂາດສານອາຫານຮຸນແຮງ 25​ ກໍລະນີ,​ ເດັກອາຍຸ​ 2​-5​ ປີຂາດສານອາຫານປານກາງ​ ມີ​ 15​ ກໍລະນີ ແລະ ຂາດສານອາຫານຮຸນແຮງ​ 25​ ກໍລະນີ; ສະຖິຕິປີ​ 2022 ພົບເຫັນ ເດັກອາຍຸລຸ່ມ​ 1​ ປີ ຂາດສານອາຫານປານກາງ 32 ກໍລະນີ ແລະ ເດັກຂາດສານອາຫານຮຸນແຮງ 4​ ກໍລະນີ,​ ເດັກ​ 2-5​ ປີ, ຂາດສານອາຫານປານກາງ​ 48​ ກໍລະນີ​ ແລະ ເດັກຂາດສານອາຫານຮຸນແຮງ 8​ ກໍລະນີ; ສໍາລັບປີ 2023​ ສະຖິຕິໃນເດືອນ​ 7-8-9 ພົບເຫັນເດັກລຸ່ມ 1​ ປີຂາດສານອາຫານປານກາງ 17  ກໍລະນີ ແລະ ເດັກຂາດສານອາຫານຮຸນແຮງ​ 11​ ກໍລະນີ,​ ສ່ວນເດັກອາຍຸ 2-5​ ປີຂາດສານອາຫານປານກາງ 15​ ກໍລະນີ​ ແລະ​ ເດັກຂາດສານອາຫານຮຸນແຮງ 9​ ກໍລະນີ.


ສະຖິຕິດັ່ງກ່າວ ໄດ້ສະແດງໃຫ້ເຫັນວ່າ ຍັງມີເດັກນ້ອຍ ທີ່ຂາດສານອາຫານ ຈຶ່ງມີຄວາມຈໍາເປັນຕ້ອງໄດ້ເອົາໃຈໃສ່ ໃນການຊຸກຍູ້,​ ສົ່ງເສີມ​ ເພື່ອໃຫ້ຈໍານວນຕົວເລກ ຂອງເດັກນ້ອຍ ທີ່ຂາດ ສານອາຫານຫລຸດລົງ​ ແລະ ກ້າວໄປເຖິງ ຂັ້ນໝົດໄປໃຫ້ໄດ້ໃນຕໍ່ໜ້ານີ້.​