ຂປລ
ການແຂ່ງຂັນກິລາຊີເກມຄັ້ງທີ 32 ໃນວັນທີ 8 ພຶດສະພາ ທັບນັກກິລາລາວ ໄດ້ລົງຊີງໄຊໃນຫລາຍລາຍການ ແລະ ສາມາດຍາດໄດ້ຫລຽນມາໃຫ້ທັບນັກກິລາລາວ ຕື່ມອີກຈໍານວນໜຶ່ງ.
ການແຂ່ງຂັນກິລາຊີເກມຄັ້ງທີ 32 ໃນວັນທີ 8 ພຶດສະພາ ທັບນັກກິລາລາວ ໄດ້ລົງຊີງໄຊໃນຫລາຍລາຍການ ແລະ ສາມາດຍາດໄດ້ຫລຽນມາໃຫ້ທັບນັກກິລາລາວ ຕື່ມອີກຈໍານວນຫນຶ່ງ ຄື ຫລຽນເງິນ ໄດ້ຈາກທ້າວ ບຸນຕາມີ ສຸທຳມະວົງ ຈາກກິລາ ເປຕັງປະເພດຊາຍດ່ຽວ, ໂດຍເສຍໃຫ້ນັກກິລາຈາກມາເລເຊຍ ຢ່າງ ໜ້າເສຍດາຍ 9-13 ຄະແນນ, ທັງສອງເຄີຍພໍ້ກັນໃນຮອບແບ່ງກຸ່ມ ເຊິ່ງເປັນ ບຸນຕາມີ ຊະນະ 12-10. ສ່ວນຫລຽນທອງຮ່ວມປະເພດນີ້ເປັນຂອງ ໄທ ແລະ ກຳປູເຈຍ ເຈົ້າພາບ. ຂະນະທີ່ນາງ ພຸດທິດາ ພີມມະສອນ ນັກກິລາໂວວິນາມ ປະເພດຟ້ອນດ່ຽວຍິງ ບໍ່ມີອຸປະກອນ ໄດ້ຫລຽນທອງຮ່ວມ ມຽນມາ, ຫລຽນຄຳ ແມ່ນນັກກິລາຈາກໄທ ແລະ ຫລຽນເງິນ ກຳປູເຈຍ ເຈົ້າພາບ.
ສໍາລັບນາງ ລົດແກ້ວ ອິນທະກຸມມານ ນັກກິລາແລ່ນທົນທີມຊາດລາວ ເລີ່ມລົງແຂ່ງລາຍການ 5.000 ແມັດ ໃນວັນທີ 8 ພຶດສິພາ ແລະ ວັນທີ 11 ພຶດສະພາ 2023 ຈະແຂ່ງຂັນລາຍການ 1.500 ແມັດ ແລະ ວັນທີ 12 ພຶດສະພາ 2023 ຈະແຂ່ງຂັນລາຍການ 10.000 ແມັດ. ລົດແກ້ວ ຫາກໍຄວ້າ 2 ຫລຽນຄຳ 1 ຫລຽນທອງ ການແຂ່ງຂັນລາຍການ ສິງກະໂປ ໂອເພັນ ເມື່ອບໍ່ດົນມານີ້ ເປັນການອຸ່ນເຄື່ອງທົດສອບສະມັດຕະພາບຮ່າງກາຍ ກ່ອນລຸຍຊີເກມຄັ້ງນີ້.
ແນວໃດກໍຕາມ, ເປັນທີ່ຫນ້າໜ້າເສຍດາຍທີ່ ນ້ອງ ເຈດ ພົມສະຫວັດ ສະເລແມນ ນັກກິລາຈູຈິດຊຸ ລູກຊອດ ລາວ-ອາເມຣິກາ ບໍ່ສາມາດລົງແຂ່ງປະເພດຕໍ່ສູ້ ຮຸ່ນນໍ້າໜັກ -69 ກິໂລ ລາຍການ Ne-Waza NOGI ເນື່ອງຈາກເຈັບຂໍ້ມື ຈາກຮອບຊິງຊະນະເລີດປະເພດຕໍ່ສູ້ ຮຸ່ນນໍ້າໜັກ -69 ກິໂລ ລາຍການ Ne-Waza GI ໃນມື້ວານນີ້ ເຈດ ໄດ້ຫລຽນເງິນທຳອິດໃຫ້ທີມຊາດລາວ ໃນຊີເກມ ຄັ້ງທີ 32.
ໂດຍ: ສຸພາສະຫວັນ
KPL
