ປະເທດລາວ​ ແມ່ນມີຄວາມອຸດົມສົມບູນທາງທຳມະຊາດ, ​ທຳມະຊາດໄດ້ສັນສ້າງສິ່ງມະຫັດສະຈັນທີ່ສວຍງາມ​ ແລະ​ ມີຄຸນຄ່າໜ້າຄົ້ນຫາ ເໝືອນກັບສະຖານທີ່ທ່ອງທ່ຽວ ຖ້ຳ​ນ້ຳ​ແອງ ຫລື ຖ້ຳ​ເກົາ​ເລົາ.​ ຕາມຂໍ້ມູນຂອງກົມໂຄສະນາການທ່ອງທ່ຽວໃຫ້ຮູ້ວ່າ: ຖໍ້ານໍ້າແອງ ​ຕັ້ງ​ຢູ່​ເຂດ​ບ້ານ​ນ້ຳ​ແອງ ເທິງ​ເສັ້ນ​ທາ​ງ​ອະ​ນຸ​ພາ​ກ​ພື້ນ R3A ຊຶ່ງຫ່າງຈາກເທສະບານເມືອງວຽງພູຄາ ແຂວງຫລວງນໍ້າທາ ປະມານ 12 ກິໂລແມັດ. ສະຖານທີ່ນີ້ເປັນມໍລະດົກທາງທໍາມະຊາດ ຊຶ່ງສອດແຊກຄຸນຄ່າທາງດ້ານ​ວັດ​ທະ​ນະ​ທຳ​ ຂຶ້ນ​ຊື່ຂອງແຂວງ​ຫລວງນໍ້າທາ ​ຊຶ່ງໄດ້ເກີດມີມາ​ຫລາຍ​ລ້ານ​ປີແລ້ວ. ຢູ່ໃນບໍລິເວນຖ້ຳດັ່ງ ກ່າວມີອຸໂມງຍາວ 2 ສາຍ, ສາຍທີ່​ໜຶ່ງເອີ້ນວ່າ ລອດ ​ຫລື ຖ້ານໍ້າແອງ, ສ່ວນສາຍທີ່ສອງແມ່ນ ​ຖໍ້າເກົາເລົາ ຍາວຢຽດໄປຕາ​ມ​ສັນພູທີ່ມີປ່າໄມ້ດົກໜາຂຽວງາມ ແລະ ອຸດົມສົມບູນໄປດ້ວຍຊີວະນາໆພັນ. ທັງສອງຖ້ຳນີ້ເປັນຖໍ້າຫີນປູນ ມີຄວາມເລິກເຂົ້າໄປໃນ​ໜ່ວຍ​ພູ 3 ກິໂລແມັດກວ່າ, ຢູ່ດ້ານໃນ ຂອງຖ້ຳ ແມ່ນມີຫີນໂຟດຊິວ (Fossil) ທີ່ໄດ້ສ້າງສິລະປະ​ແຫ່ງຄວາມງາມ ຕາມທໍາມະຊາດຢູ່ຕາມ​ຜາຜະ​ໜັງຖ້ຳ ຊຶ່ງປະກອບມີຫີນຍ້ອຍ ​ແລະ ນົມຜາຫີນ ທີ່ມີລວດລາຍງົດງາມສະດຸດຕາ ແລະ ​ໜ້າປະທັບໃຈ​ຫລາຍທີ່​ສຸດ. ປັດຈຸບັນຖໍ້ານໍ້າແອງ ຫລື ຖ້ຳເ​ກົາເລົ່າ ໄດ້ຮັບການຄຸ້ມຄອງ ໂດຍປະ ຊາຊົນທ້ອງຖິ່ນບ້ານນ້ຳແອງ ຊຶ່ງເປັນຜູ້ໃຫ້ບໍລິການ ແລະ ອໍານວຍຄວາມສະດວກແ​ກ່​ນັກທ່ອງທ່ຽວ ໂດຍສະເພາະແມ່ນການນຳ​ທ່ຽວ ເພື່ອເຂົ້າຊົມຖ້ຳ​ດັ່ງກ່າວ.

ນ້ຳແອງ ​ຫລື​ ຖ້ຳເກົາເລົາເປີດໃຫ້ທ່ານເຂົ້າຊົມທຸກມື້ ເລີ່ມແຕ່ເວລາ 8:30-16:00 ໂມງ. ຖ້າທ່ານໃດໄດ້ໄປຢ້ຽມຢາມແຂວງຫລວງນໍ້າທາ ກໍຍາດເວລາໄປສຳຜັດບັນຍາກາດທ່ຽວຊົມຄວາມງົດງາມຂອງທຳ ຊຶ່ງທຳມະຊາດປັ້ນແຕ່ງຂຶ້ນມາ ໄດ້ຢ່າງສວຍງາມ​ ແລະ​ ມີຄຸນຄ່າທີ່ຫາຊົມໄດ້ຍາກ.​ ຂໍຂອບ ໃຈຂໍ້ມູນທີ່ດີຈາກ​ກົມໂຄສະນາການທ່ອງທ່ຽວ ກະຊວງຖະແຫລງຂ່າວ​ ວັດທະນະທຳ​ ແລະ​ ທ່ອງທ່ຽວ.​/.​

ໂດຍ:ໄໝຄໍາຍ້ອມສິນ

KPL