ຂປລ
ຂປລ. ພິທີມອບລາງວັນທຸລະກິດ ຊັ້ນນຳດີເດັ່ນ ໃນການປະກອບສ່ວນສຳຄັນ ຕໍ່ການພັດທະນາ ເສດຖະກິດ-ສັງຄົມ ໃນປີ 2022 ໃນວັນທີ 25 ມັງກອນ 2023 ຜ່ານມານີ້, ຢູ່ນະຄອນຫລວງວຽງຈັນ, ໃນນັ້ນ ບໍລິສັດ ຊືເຟິງ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ກໍໄດ້ຮັບລາງວັນດັ່ງກ່າວ ທີ່ມີຜົນງານ ໃນການປະກອບສ່ວນສຳຄັນ ຂອງບໍ່ຄຳ-ທອງເຊໂປນ.
ຂປລ. ພິທີມອບລາງວັນທຸລະກິດ ຊັ້ນນຳດີເດັ່ນ ໃນການປະກອບສ່ວນສຳຄັນ ຕໍ່ການພັດທະນາ ເສດຖະກິດ-ສັງຄົມ ໃນປີ 2022 ໃນວັນທີ 25 ມັງກອນ 2023 ຜ່ານມານີ້, ຢູ່ນະຄອນຫລວງວຽງຈັນ, ໃນນັ້ນ ບໍລິສັດ ຊືເຟິງ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ກໍໄດ້ຮັບລາງວັນດັ່ງກ່າວ ທີ່ມີຜົນງານ ໃນການປະກອບສ່ວນສຳຄັນ ຂອງບໍ່ຄຳ-ທອງເຊໂປນ.
ໂອກາດນີ້, ທ່ານ ສະໝານ ອະເນກາ ຜູ້ອຳນວຍການໃຫຍ່ ລຊມລ ໄດ້ກ່າວວ່າ: ບໍລິສັດ ລຊມລ ດຳເນີນ ການຂຸດຄົ້ນ-ຜະລິດຄຳ-ທອງໃນປີ 2003, ບໍ່ຄຳ-ທອງ ເຊໂປນ ໄດ້ຜະລິດຄຳຫຼາຍກວ່າ 1,5 ລ້ານ ອອນສ໌ ແລະ ຜະລິດແຜ່ນທອງ ຫລາຍກວ່າ 1,1 ລ້ານໂຕນ ອັນໄດ້ປະກອບສ່ວນລາຍຮັບ ໂດຍກົງຫລາຍກວ່າ 1,6 ຕື້ໂດລາສະຫະລັດ ໃຫ້ແກ່ ສປປ ລາວ ໂດຍຜ່ານການຈ່າຍພາສີ-ອາກອນ, ຄ່າພາສີຊັບພະຍາກອນແຮ່ທາດ ແລະ ເງິນປັນຜົນ. ນອກນັ້ນ, ຍັງໄດ້ສ້າງຜົນປະໂຫຍດ ທາງອ້ອມຫລາຍຮ້ອຍລ້ານໂດລາ ດ້ວຍການສ້າງວຽກເຮັດງານທຳ, ຜ່ານການຝຶກອົບຮົມຕ່າງໆ, ການພັດທະນາຊຸມຊົນ, ແລະ ການຈ່າຍເງິນໃຫ້ແກ່ ຄູ່ຮ່ວມທຸລະກິດ ແລະ ຜູ້ສະໜອງທ້ອງຖິ່ນ. ລຊມລ ໄດ້ລົງທຶນປະມານ 50 ລ້ານໂດລາສະຫະລັດ ໃສ່ການພັດທະນາ ໂຄງລ່າງພື້ນຖານແຫ່ງຊາດ ແລະ ທ້ອງຖິ່ນ, ລົງທຶນ 56 ລ້ານໂດລາສະຫະລັດ ໃສ່ການເກັບກູ້ລະເບີດບໍ່ທັນແຕກ ແລະ ຫລາຍລ້ານໂດລາສະຫະລັດ ເຂົ້າໃນການອະນຸລັກມໍລະດົກ ທາງດ້ານວັດທະນະທຳ ແລະ ແຜນງານອື່ນໆ. ນັບແຕ່ປີ 2016 ເປັນຕົ້ນມາ, ລຊມລ ເປັນບໍລິສັດບໍ່ແຮ່ໜຶ່ງດຽວຢູ່ໃນ ສປປ ລາວ ທີ່ໄດ້ຮັບກຽດຕິສັກໃນຂັ້ນ A+ ທີ່ເປັນລະດັບສູງສຸດຈາກ ກະຊວງພະລັງງານ ແລະ ບໍ່ແຮ່ ໂດຍການເປັນແບບຢ່າງ ທີ່ນຳໜ້າໃຫ້ແແກ່ໂຄງການອື່ນໆ. ນອກຈາກນີ້, ປະຊາ ຊົນພາຍໃນເມືອງວິລະບູລີ ແຂວງສະຫວັນນະເຂດ ຫລາຍກວ່າ 40.000 ຄົນ ໄດ້ຮັບຜົນປະໂຫຍດຈາກ ໂຄງການພັດທະນາຊຸມຊົນ ຂອງໂຄງການຄຳ-ທອງເຊໂປນ ລວມມູນຄ່າ 20 ລ້ານໂດລາສະຫະ ລັດ. ມາຮອດປັດຈຸບັນ, ລາຍໄດ້ຂອງຊຸມຊົນ ທ້ອງຖິ່ນຜ່ານ ກຸ່ມທຸລະກິດທ້ອງຖິ່ນ ໄດ້ທະວີຄູ່ຂຶ້ນເປັນ 50 ລ້ານ ໂດລາສະຫະລັດ ຕະຫລອດອາຍຸການບໍ່ແຮ່ ຄຳ-ທອງ ເຊໂປນ.
ທ່ານ ສະໝານ ອະເນກາ ຍັງໃຫ້ຮູ້ອີກວ່າ: ຜ່ານມາ ລຊມລ ໄດ້ຮັບ ລາງວັນທຸລະກິດ ດີເດັ່ນຈາລຶກວັນ ຄົບຮອບ 40 ປີ ຂອງ ສປປ ລາວ, ສຳລັບການປະກອບສ່ວນ ຕໍ່ການພັດທະນາ ເສດຖະກິດ-ສັງຄົມ, ລາງວັນ ບໍລິສັດຂຸດຄົ້ນບໍ່ແຮ່ ດີເດັ່ນຂອງອາຊຽນ ແລະ ລາງວັນບໍລິສັດ ທີ່ມີຄວາມຮັບຜິດຊອບຕໍ່ສັງຄົມ ແລະ ການພັດທະນາ ຊຸມຊົນຂອງອາຊຽນ. ການຍ້ອງຍໍຄັ້ງນີ້ ຈະເປັນກຳລັງໃຈ ໃຫ້ບໍລິສັດໄດ້ຕັ້ງໜ້າສືບຕໍ່ເປັນນັກລົງທຶນ ທີ່ມີຄວາມຮັບຜິດຊອບສູງ ໃນຂະຫຍາຍທຸລະກິດ ແລະ ສ້າງຜົນປະໂຫຍດທີ່ດີ ໃຫ້ແກ່ທຸກພາກສ່ວນ ກ່ຽວຂ້ອງໃນສັງຄົມ.
KPL
