ຂປລ
ໄດ້ຟັງກ່ຽວກັບຄຳສອນອຳມະຕະຂອງ ພະອະລິຍະສົງ (ພະສົງທີ່ສາມາດລະກິເລດໄດ້ 10 ປະການ) ຜ່ານຊ່ອງຢູທູບ ເຫັນວ່າມີປະໂຫຍດບໍ່ໜ້ອຍ ຖ້າເອົາມາປັບໃຊ້ເຂົ້າໃນຊີວິດປະຈຳວັນ ຈະເຮັດໃຫ້ມີຄວາມສຸກສັງຄົມ ມີຄວາມສະຫງົບ ມີແຕ່ຄວາມໂອບເອື້ອອາລີ ແລະ ເບິ່ງແຍງ ຊ່ວຍເຫລືອກັນ.
ເມື່ອໂລກນີ້ ໄຮ້ແສງແຫ່ງອາທິດ
ຈະມືດມິດ ສ່ອງອັນໃດກໍບໍ່ເຫັນ
ຄົນບໍ່ຍອມຟັງທຳ ມັກທຸກຍາກເຂັນ
ເພາະບໍ່ເຫັນດີຊົ່ວ ທີ່ຕົວກະທຳ !
ໄດ້ຟັງກ່ຽວກັບຄຳສອນອຳມະຕະຂອງ ພະອະລິຍະສົງ (ພະສົງທີ່ສາມາດລະກິເລດໄດ້ 10 ປະການ) ຜ່ານຊ່ອງຢູທູບ ເຫັນວ່າມີປະໂຫຍດບໍ່ໜ້ອຍ ຖ້າເອົາມາປັບໃຊ້ເຂົ້າໃນຊີວິດປະຈຳວັນ ຈະເຮັດໃຫ້ມີຄວາມສຸກສັງ ຄົມມີຄວາມສະຫງົບ ມີແຕ່ຄວາມໂອບເອື້ອອາລີ ແລະ ເບິ່ງແຍງ ຊ່ວຍເຫລືອກັນ.
ພະອາຈານທ່ານໜຶ່ງ ໄດ້ກ່າວສອນໄວ້ວ່າ: “ຕົວຂອງຄົນເຮົາມີ 3 ໂຕຄື: ໂຕຈິງ, ໂຕເປັນ ແລະ ໂຕແຝງ ຊຶ່ງສອງໂຕທຳອິດ ຢ່າໄປຍຶດໝັ້ນຖືໝັ້ນ ໃຫ້ສະລະຖິ້ມໃຫ້ໝົດ ເລືອກເອົາແຕ່ໂຕແຝງ ຊຶ່ງເປັນພະລັງພາຍໃນເນື່ອງຈາກໂຕຈິງ ຍິ່ງນຳໃຊ້ຫລາຍຍິ່ງຊຸດໂຊມ, ໂຕເປັນຍິ່ງໃຊ້ຫລາຍແຮ່ງຫຍຸ້ງແຮ່ງທຸກ, ແຕ່ໂຕແຝງ ຫລື ພະລັງແຝງນັ້ນ ຍິ່ງໃຊ້ຍິ່ງດີມີກໍາລັງວັງຊາ ຊ່ວຍກຳບັງຄວາມທຸກ ເຮັດໃຫ້ເກີດຄວາມປິຕິ ແລະ ມີຄວາມສຸກທີ່ໃຈ.
ໂຕແຝງ ເຮົາຈະຮູ້ເອງ ເຫັນເອງ ເປັນປັດຈັດຕັງ ຮູ້ໄດ້ສະເພາະຕົນເທົ່ານັ້ນ, ສະນັ້ນ ໃຫ້ຟ້າວຊອກຫາໂຕແຝງທີ່ຢູ່ໃນໂຕເຮົາໃຫ້ພົບໂດຍໄວທີ່ສຸດ. ໂຕຈິງ ແມ່ນຮູບກາຍສັງຂານຂອງຄົນ ໂດຍແມ່ນບິດາ ມາຣດາເປັນຜູ້ໃຫ້ກໍາເນີດມາ ມັນເຮັດວຽກຕາມທີ່ຈິດໃຈສັ່ງໃຫ້ເຮັດ. ຕົວເປັນ ແມ່ນສະຖານະພາບໃນສັງຄົມ ທີ່ຜູ້ອື່ນສົມມຸດໃຫ້ເຮົາເປັນ ບໍ່ວ່າເປັນຄົນຮັ່ງ, ຄົນທຸກ, ຄົນງາມ, ຄົນຂີ້ຮ້າຍ, ຄົນດີ ຫລື ຄົນຊົ່ວ, ເປັນຊາວນາ, ພະນັກງານ, ທະຫານ-ເປັນຕໍາຫລວດ.... ໂຕແຝງ ໝາຍເຖິງກາຍທິບ ທີ່ແຝງໃນຈິດວິນຍານ ຫລື ຈິດໃຕ້ສໍານຶກທີ່ດີ ຂອງແຕ່ລະຄົນ ຖ້າຜູ້ໃດຄົ້ນພົບແລ້ວນຳອອກມາໃຊ້ ຈະມີປະໂຫຍດທີ່ສຸດ ແລະ ປະເສີດຫລາຍຕໍ່ ຕົນເອງ. ແຕ່ຄົນສ່ວນຫລາຍ ບໍ່ໃສ່ໃຈທີ່ຈະຊອກຫາມັນ ດັ່ງນັ້ນຈຶ່ງຖືກບົດບັງດ້ວຍກິເລດຕ່າງໆ.
ອະດີດເປັນເລື່ືອງທີ່ຜ່ານພົ້ນໄປແລ້ວ, ສ່ວນອະນາຄົດເປັນທີ່ເລື່ອງທີ່ຍັງມາບໍ່ທັນຮອດ ບໍ່ຄວນຈະໄປເປັນຫ່ວງກັງວົນໃຫ້ອຸກໃຈ, ປັດຈຸບັນແມ່ນສຳຄັນທີ່ສຸດ ໃຫ້ດຸໝັ່ນສຶກສາຄົ້ນຄວ້າຮ່ຳຮຽນ ແລະ ຈັດຕັ້ງປະຕິບັດເຕັມ ທີ່”.
ພະອະລິຍະສົງອີກທ່ານໜຶ່ງ ກ່າວຄຳສອນໄວ້ວ່າ: “ໜຶ່ງຊີວິດ ຈະມີຄຸນຄ່າຕໍ່ສັງຄົມ ເມື່ອໄດ້ຂ້າໂຕເອງ,ໃນທີ່ນີ້ໝາຍເຖິງ ຂ້າຄວາມເຫັນແກ່ຕົວ, ຂ້າກິເລດ, ຄວາມໂລບມາກໂລພາ, ເພາະຊັບສົມບັດຄືໂຕທຸກ ລາບຍົດຄືໂຕຜີ ເປັນຜີຮ້າຍຜີຫລອກ ໂດຍສັງຄົມຫລອກໃຫ້ຕິດມັນ ແລະ ເຮົາຕົກຂຸມກັບດັກ. ຄໍາຍ້ອງຍໍສັນລະເສີນຄືໂຕມານ ເຮັດໃຫ້ຄົນເຮົາຫລົງ ສຸດທ້າຍພາໃຫ້ຕົນເອງຕົກຢູ່ໃນວັງວົນແຫ່ງຄວາມທຸກ ຍິ່ງມີຕຳແໜ່ງໃຫຍ່ ຍິ່ງພາໃຫ້ລະເຫລີງ ຫລົງຜິດໄດ້ ແລະ ກາຍເປັນໄພອັນຕະລາຍຕໍ່ສັງຄົມ ດັ່ງນັ້ນ, ຈົ່ງຍຶດໝັ້ນໃນສິລະທຳ ແລະ ຄຸນງາມຄວາມດີ”.
ຄົນຈຳນວນໜຶ່ງໃນສັງຄົມ ໂສເລກັນໃນສະພາກາເຟວ່າ: ຄົນທຳດີໄດ້ດີ ມີຢູ່ໃສ ? ຄົນເຮັດຊົ່ວຈັງໄຮ ພັດໄດ້ດີ. ທ່ານຜູ້ອ່ານທີ່ຮັກແພງ ! ຖ້າເອົາວັດຖຸມາວັດແທກຜົນຂອງຄວາມດີນັ້ນ ມັນກໍຍາກຢູ່, ແຕ່ຖ້າເອົາຄວາມສຸກສະຫງົບເຢັນທີ່ໃຈ, ຄອບຄົວຜາສຸກ ເປັນໂຕຊີ້ວັດ ການຄິດດີ ເວົ້າດີ ທຳດີ ແມ່ນໄດ້ຜົນດີເກີນຄາດ. ສ່ວນຜູ້ເຮັດຊົ່ວນັ້ນ ກໍປຽບເໝືອນໄຟໃນກ້ອງຖ່ານ ຮອດຍາມໃດໜຶ່ງໄຟນັ້ນກໍຈະລຸກແຮງແດງຂຶ້ນ, ເຖິງມີເງິນຫລາຍ ກໍບໍ່ໝາຍຄວາມວ່າ ຈະມີຄວາມສຸກ ເພາະຖືກຍາດຕິພີ່ນ້ອງ, ສັງຄົມ ກ່າວຕຳນິວິຈານ ປະນາມແບບບໍ່ຮູ້ຈົບ ທີ່ສຳຄັນ ຜູ້ກ່ຽວ ຈະມີຄວາມລະແວງແຄງໃຈໄປຕະຫລອດຊີວິດ.
ໂດຍ: ມືອ່ອນ ໄອທີ
KPL
