ຂປລ
ຂປລ. ກະຊວງ ສຶກສາທິການ ແລະ ກິລາ ໄດ້ເລັ່ງໃຫ້ ການສະໜັບສະໜູນ, ຊຸກຍູ້ ແລະ ສົ່ງເສີມ ໃຫ້ສະຖາບັນ ການສຶກສາຊັ້ນສູງ ໃນລະດັບວິທະຍາໄລ ທັງພາກລັດ ແລະ ເອກະຊົນ ທົ່ວປະເທດ ສືບຕໍ່ ສ້າງນັກວິຊາການ, ນາຍຊ່າງເຕັກນິກ ລະດັບວິຊາຊີບຊັ້ນສູງ ຫລື ອະນຸປະລິນຍາ
ຂປລ. ກະຊວງສຶກສາທິການ ແລະ ກິລາ ໄດ້ເລັ່ງໃຫ້ ການສະໜັບສະໜູນ, ຊຸກຍູ້ ແລະ ສົ່ງເສີມ ໃຫ້ສະຖາບັນ ການສຶກສາຊັ້ນສູງ ໃນລະດັບວິທະຍາໄລ ທັງພາກລັດ ແລະ ເອກະຊົນ ທົ່ວປະເທດ ສືບຕໍ່ ສ້າງນັກວິຊາການ, ນາຍຊ່າງເຕັກນິກ ລະດັບວິຊາຊີບຊັ້ນສູງ ຫລື ອະນຸປະລິນຍາ ໃຫ້ໄດ້ທັງປະລິມານ ແລະ ຄຸນນະພາບ ໂດຍໃຫ້ມີຫລາກຫລາຍ ສາຂາອາຊີບ. ທັງກຽມຄວາມພ້ອມ ໃນການເປີດສອນຫລັກສູດຕໍ່ເນື່ອງ ລະດັບປະລິນຍາຕີ ໃນຫລາຍສາຂາວິຊາອາຊີບ ເພື່ອສ້າງເງື່ອນໄຂໂອກາດ ໃຫ້ຜູ້ທີ່ຮຽນຈົບລະດັບວິຊາຊີບຊັ້ນສູງ ຫລື ອະນຸປະລິນຍາຕີ ຈາກວິທະຍາໄລຕ່າງໆ ໄດ້ເຂົ້າຮຽນຕໍ່ເນື່ອງ ຕາມຄວາມສາມາດຕົວຈິງ ແລະ ຄວາມສະໝັກໃຈ.
ສະເພາະສົກຮຽນ 2016-2017 ໃຫ້ທຸກສະຖາບັນ ກຽມຄວາມພ້ອມ ເພື່ອສະເໜີ ຍົກຖານະເປັນສະຖາບັນ ຕາມທີ່ກຳນົດໄວ້ ໃນດຳລັດ ວ່າດ້ວຍ ການສຶກສາຊັ້ນສູງ (ມາດຕາ 2 ວັກ 10) ໃຫ້ສາມາດຈັດຕັ້ງ ການຮຽນ-ການສອນ, ການຄົ້ນຄວ້າ ວິທະຍາສາດ ແລະ ການບໍລິການ ວິຊາການ ຕາມຫລັກສູດລະດັບຕ່າງໆ. ພ້ອມນັ້ນ ໃຫ້ອົງການຈັດຕັ້ງກ່ຽວຂ້ອງ ມີພາລະບົດບາດ ໃນການຄຸ້ມຄອງ ສະຖານການສຶກສາຊັ້ນສູງ ທັງຢູ່ສູນກາງ ແລະ ທ້ອງຖິ່ນ, ພ້ອມກວດກາຄືນ ລະບຽບຫລັກການ ແລະ ນິຕິກຳຕ່າງໆໃຫ້ສອດຄ່ອງກັບ ດໍາລັດວ່າດ້ວຍ ການສຶກສາຊັ້ນສູງ. ນອກນີ້, ຍັງໄດ້ຊີ້ນຳ ໃຫ້ວິທະຍາໄລແຫ່ງຕ່າງໆ ສຶກສາ-ຄົ້ນຄ້ວາ ສ້າງເງື່ອນໄຂ ແລະ ຄວາມພ້ອມ ໃນການຮ່ວມມື ດ້ານວິຊາການ ກັບສະຖາບັນການສຶກສາຊັ້ນສູງ ລະດັບວິທະຍາໄລ ພາຍໃນ ແລະ ຕ່າງປະເທດ ເພື່ອກໍ່ສ້າງນັກວິຊາການ ລະດັບສູງຮ່ວມກັນ ໂດຍສອດຄ່ອງກັບ ນະໂຍບາຍ ແລະ ກົດໝາຍຂອງລັດ.
ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ອອກແຈ້ງການ ເມື່ອທ້າຍເດືອນສິງ 2016 ນີ້ ໂດຍລະບຸວ່າ: ການຊຸກຍູ້ສົ່ງເສີມ ສະຖາບັນ ການສຶກສາຊັ້ນສູງ ຍົກຖານະດັ່ງກ່າວ, ແມ່ນເພື່ອຍົກສູງ ຄຸນນະພາບການສ້າງ ນັກວິຊາການລະດັບສູງ ແນໃສ່ໃຫ້ສອດຄ່ອງກັບແຜນພັດທະນາ ເສດຖະກິດ-ສັງຄົມ, ຄວາມຕ້ອງການ ກັບວຽກງານຕົວຈິງ ໃນປັດຈຸບັນ ແລະ ອະນາຄົດ, ພ້ອມນີ້ ຍັງເປັນການຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ, ທັງເປັນການສືບຕໍ່ຜັນຂະຫຍາຍ ຜົນສຳເລັດ ຂອງການປະຕິຮູບ ລະບົບການສຶກສາແຫ່ງຊາດ ເພື່ອຍົກສູງ ຄຸນນະພາບຂອງ ການສຶກສາຊັ້ນສູງ ໃຫ້ໄປຕາມເປົ້າໝາຍ ການພັດທະນາ ແບບຍືນຍົງ, ສອດຄ່ອງກັບ ຍຸດທະສາດ ການພັດທະນາ ຊັບພະຍາກອນມະນຸດແຫ່ງຊາດ ໂດຍສະເພາະ ການປະຕິບັດ ແຜນພັດທະນາ ການສຶກສາ 5 ປີຄັ້ງທີ VIII ໃຫ້ມີຜົນສຳເລັດ ຕາມຄາດໝາຍ./.
KPL
