ຂປລ
ກົມເສດຖະກິດ, ກະຊວງການຕ່າງປະເທດ ແຫ່ງ ສປປ ລາວ ຈັດພິທີເປີດໂຄງການຮ່ວມມືອະນຸພາກພື້ນແມ່ນ້ຳຂອງ-ແມ່ນ້ຳລ້ານຊ້າງ (MLC) ແລະ ສຳມະນາ ພາຍໃຕ້ຫົວຂໍ້ “ຊາວໜຸ່ມ ແລະ ການແລກປ່ຽນຄວາມຮູ້ກ່ຽວກັບການທູດເສດຖະກິດແມ່ນ້ຳຂອງ-ແມ່ນ້ຳລ້ານຊ້າງ” ສົກປີ 2026-2027 ໃນວັນທີ 9 ຕຸລາ 2026 ຢູ່ແຂວງຫຼວງພະບາງ.
ໂຄງການດັ່ງກ່າວ ໄດ້ຮັບການສະໜັບສະໜູນຈາກກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ (MLC Special Fund) ໂດຍມີເປົ້າໝາຍສຳຄັນໃນການເສີມສ້າງຂີດຄວາມສາມາດວຽກງານຄົ້ນຄວ້າໃຫ້ແກ່ຊາວໜຸ່ມ ໂດຍສະເພາະນັກການທູດໜຸ່ມ, ພ້ອມທັງສົ່ງເສີມການຮ່ວມມື ແລະ ແລກປ່ຽນຄວາມຮູ້ປະສົບການ ດ້ານວຽກງານການທູດເສດຖະກິດຮ່ວມກັນຂອງຊາວໜຸ່ມ ຈາກບັນດາປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ.
ພິທີເປີດໂຄງການ ແລະ ການສຳມະນາຄັ້ງນີ້ ຈັດຂຶ້ນໂດຍການເປັນຄະນະປະທານຂອງ ທ່ານ ສົມບູນ ສີຫານາດ ຫົວໜ້າກົມເສດຖະກິດ, ກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສແມ່ນ້ຳຂອງ-ແມ່ນ້ຳລ້ານຊ້າງຂອງ ສປປ ລາວ ແລະ ທ່ານ ຈ່າງ ເຊີຜິງ (ZHANG SHEPING) ກົງສູນໃຫຍ່ ແຫ່ງ ສປ ຈີນ ປະຈຳ ສປປ ລາວ ທີ່ແຂວງຫຼວງພະບາງ. ນອກຈາກນັ້ນ, ຍັງມີສຳມະນາກອນ ແລະ ວິທະຍາກອນຈາກພາກສ່ວນກ່ຽວຂ້ອງ, ຄະນະຮັບຜິດຊອບວຽກງານການທູດເສດຖະກິດຂັ້ນແຂວງ ໃນຂອບເຂດທົ່ວປະເທດ ເຂົ້າຮ່ວມ.
ໂອກາດນີ້, ທ່ານ ສົມບູນ ສີຫານາດ ໄດ້ຍົກໃຫ້ເຫັນເຖິງຄວາມສຳຄັນຂອງການຈັດກອງປະຊຸມຄັ້ງນີ້ ທີ່ເປັນເວທີສຳຄັນໜຶ່ງໃນການຍົກສູງຂີດຄວາມສາມາດ ແລະ ຄວາມຮັບຮູ້ໃຫ້ແກ່ນັກການທູດໜຸ່ມ ແລະ ພະນັກງານກ່ຽວຂ້ອງໃນຂັ້ນທ້ອງຖິ່ນ ສາມາດເຂົ້າໃຈເລິກເຊິ່ງກ່ຽວກັບວຽກງານການທູດເສດຖະກິດ ແລະ ບັນດາບຸລິມະສິດຂອງຂອບການຮ່ວມມື MLC ແລະ ວິທີການນຳສະເໜີບົດໂຄງການ ເພື່ອຂໍການສະໜັບສະໜູນຈາກກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ (MLC Project Proposal for MLC Special Fund). ນອກຈາກນັ້ນ, ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳເຫັນ ແລະ ລະດົມແນວຄວາມຄິດ ເຂົ້າໃນການສ້າງຂໍ້ແນະນຳການຈັດຕັ້ງປະຕິບັດວຽກງານການທູດເສດຖະກິດຂອງ ສປປ ລາວ ເພື່ອໃຫ້ສາມາດນຳໄປຈັດຕັ້ງປະຕິບັດໄດ້ຢ່າງມີປະສິດທິພາບ.
KPL
