ຂປລ
ອິນໂດເນເຊຍ ກຽມ ຈະເປີດກວ້າງ ການຮ່ວມມື ກັບ ສປ ຈີນ ໃນຂົງເຂດ ການສຶກສາຂັ້ນສູງ ແລະ ວິທະຍາສາດ ເຕັກໂນໂລຊີ ເພື່ອເລັ່ງການປະຍຸກໃຊ້ ເຕັກໂນໂລຊີໃໝ່ ແລະ ຮ່ວມກັນບຳລຸງສ້າງ ຜູ້ມີຄວາມຮູ້ຄວາມສາມາດ ດ້ານການປະຍຸກໃຊ້ ເຕັກໂນໂລຊີ ທັນສະໄໝ.
ຂປລ.ວິທະຍຸ ໂທລະພາບ ສູນກາງຈີນ, ຂ່າວສານອັນຕາຣາ ຂອງອິນໂດເນເຊຍ ລາຍງານວ່າ: ອິນໂດເນເຊຍ ກຽມ ຈະເປີດກວ້າງ ການຮ່ວມມື ກັບ ສປ ຈີນ ໃນຂົງເຂດ ການສຶກສາຂັ້ນສູງ ແລະ ວິທະຍາສາດ ເຕັກໂນໂລຊີ ເພື່ອເລັ່ງການປະຍຸກໃຊ້ ເຕັກໂນໂລຊີໃໝ່ ແລະ ຮ່ວມກັນບຳລຸງສ້າງ ຜູ້ມີຄວາມຮູ້ຄວາມສາມາດ ດ້ານການປະຍຸກໃຊ້ ເຕັກໂນໂລຊີ ທັນສະໄໝ. ໃນກອງປະຊຸມ ເວທີປຶກສາຫາລືການຮ່ວມມື ການສຶກສາຊັ້ນສູງ ແລະ ອຸດສາຫະກຳຈີນ-ອາຊີ ຕາເວັນອອກສຽງໃຕ້ ປີ 2026, ເຈົ້າໜ້າທີ່ອິນໂດເນເຊຍ ໄດ້ກ່າວວ່າ: ມະຫາວິທະຍາໄລ ແລະ ສະຖາບັນຄົ້ນຄວ້າ ຂອງອິນໂດເນເຊຍ ຈະລົງເລິກ ການຮ່ວມມືກັບ ມະຫາວິທະຍາໄລ ແລະ ສະຖາບັນ ການສຶກສາຊັ້ນສູງຂອງ ສປ ຈີນ. ຂົງເຂດການຮ່ວມມືລວມມີ ການຄົ້ນຄວ້າຮ່ວມກັນ, ການແລກປ່ຽນ ນັກຮຽນ ນັກສຶກສາ ແລະ ນັກວິຊາການ, ການພັດທະນາ ຜູ້ມີຄວາມຮູ້ ຄວາມສາມາດ, ລວມທັງ ໂຄງການຄົ້ນຄວ້າ ດ້ານການສຶກສາ. ເຈົ້າໜ້າທີ່ທ່ານນີ້ກ່າວວ່າ: ການຮ່ວມມື ລະຫວ່າງ ມະຫາວິທະຍາໄລ ກັບອຸດສາຫະກຳ ຈະມີຜົນດີຕໍ່ການຊ່ວຍ ໃຫ້ການຄົ້ນຄວ້າ ເຊື່ອມຕໍ່ ກັບຄວາມຕ້ອງການຕົວຈິງ ແລະ ເລັ່ງການປະຍຸກໃຊ້ ໃນໂຄງການສຶກສາຄົ້ນຄວ້າ ເຊິ່ງຈະຊ່ວຍບຳລຸງສ້າງ ຜູ້ມີຄວາມຮູ້ຄວາມສາມາດ ດ້ານວິຊາການ ໃນການປະຍຸກໃຊ້ເຕັກໂນໂລຊີ ທັນສະໄໝ ນັບມື້ດີຂຶ້ນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
