ຂປລ
ຂປລ. ຖືວ່າເປັນຂ່າວດີ ກະຊວງສາທາລະນະສຸກ ຂອງສປປ ລາວ ໄດ້ຢືນຢັນມາຮອດວັນທີ 20 ເມສາ 2020 ຍັງກວດບໍ່ພົບຜູ້ຕິດເຊື້ອ ໂຄວິດ-19 ເພີ່ມອີກ ຈາກການເກັບຕົວຢ່າງມາກວດທັງໝົດ 16 ກໍລະນີ ຊຶ່ງມີຜູ້ສຳຜັດໃກ້ຊິດ ກັບຜູ້ຕິດເຊື້ອ 7 ກໍລະນີ ແລະ ມີອາການສົງໄສ 9 ກໍລະນີ. ນັບວ່າເປັນເວລາ 8 ວັນຕິດຕໍ່ກັນແລ້ວ ທີ່ຜົນກວດກຸ່ມເປົ້າໝາຍ ອອກມາເປັນລົບ (ບໍ່ຕິດເຊື້ອ) ແລະ ຍອດຜູ້ຕິດເຊື້ອທັງໝົດຍັງຢູ່ທີ່ 19 ກໍລະນີ
ຂປລ. ຖືວ່າເປັນຂ່າວດີ ກະຊວງສາທາລະນະສຸກ ຂອງສປປ ລາວ ໄດ້ຢືນຢັນມາຮອດວັນທີ 20 ເມສາ 2020 ຍັງກວດບໍ່ພົບຜູ້ຕິດເຊື້ອ ໂຄວິດ-19 ເພີ່ມອີກ ຈາກການເກັບຕົວຢ່າງມາກວດທັງໝົດ 16 ກໍລະນີ ຊຶ່ງມີຜູ້ສຳຜັດໃກ້ຊິດ ກັບຜູ້ຕິດເຊື້ອ 7 ກໍລະນີ ແລະ ມີອາການສົງໄສ 9 ກໍລະນີ. ນັບວ່າເປັນເວລາ 8 ວັນຕິດຕໍ່ກັນແລ້ວ ທີ່ຜົນກວດກຸ່ມເປົ້າໝາຍ ອອກມາເປັນລົບ (ບໍ່ຕິດເຊື້ອ) ແລະ ຍອດຜູ້ຕິດເຊື້ອທັງໝົດຍັງຢູ່ທີ່ 19 ກໍລະນີ (ປິ່ນປົວດີ, ກັບບ້ານແລ້ວ 2 ຄົນ); ປັດຈຸບັນ ຍັງມີຜູ້ຕິດເຊື້ອນອນຢູ່ໂຮງໝໍ 17 ຄົນ, ໃນນັ້ນ, 3 ຄົນ ປິ່ນປົວຢູ່ໂຮງໝໍ ແຂວງຫລວງພະບາງ ແລະ 14 ຄົນ ປິ່ນປົວຢູ່ໂຮງໝໍມິດຕະພາບ ນະຄອນຫລວງວຽງຈັນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມການກວດຫາ ເຊື້ອເພື່ອຢັ້ງຢືນຕໍ່ໄປ.
ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ກ່າວໃນງານຖະແຫລງຂ່າວໃນວັນທີ 20 ເມສາ 2020 ວ່າ: ນັບແຕ່ເດືອນມັງກອນ ຮອດ ວັນທີ 18 ເມສາ 2020 ໄດ້ເກັບຕົວຢ່າງມາກວດທັງໝົດ 1.349 ຄົນ, ກວດພົບເຊື້ອທັງໝົດ 19 ຄົນ, ມີຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 9 ມີນາ ຫາ 18 ເມສາ 2020 ມີ ທັງໝົດ 313 ຄົນ, ໝົດກໍານົດຕິດຕາມ ທັງໝົດ 296 ຄົນ, ຍັງສືບຕໍ່ຕິດຕາມທັງໝົດ 17 ຄົນ ໃນນັ້ນ, ຢູ່ນະຄອນຫລວງວຽງຈັນ 17 ຄົນ, 12 ຄົນ ແມ່ນຕິດຕາມຢູ່ໂຮງໝໍ 103 ແລະ ຕິດຕາມຢູ່ເຮືອນ 5 ຄົນ ໂດຍສະ ເລ່ຍຍັງອີກ 5 ມື້ຈຶ່ງຄົບກຳນົດຕິດຕາມ 14 ວັນ.
ທ່ານ ດຣ. ພູທອນ ເມືອງປາກ ກ່າວອີກວ່າ: ເຖິງວ່າ ສະພາບການຕິດເຊື້ອຢູ່ ສປປ ລາວ ໄດ້ເວັ້ນໄລຍະຫ່າງມາໄດ້ 8 ວັນແລ້ວກໍຕາມ, ຜູ້ຕິດເຊື້ອປິ່ນປົວຢູ່ໂຮງໝໍ ກໍໄດ້ອອກໂຮງໝໍ 2 ຄົນແລ້ວ, ແຕ່ພວກເຮົາ ຈະບໍ່ລົດລະການເຝົ້າລະວັງ ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ ໂດຍສະ ເພາະຜູ້ທີ່ຍັງຈຳກັດບໍລິເວນ ຕົນເອງຢູ່ສູນ ແລະ ຢູ່ເຮືອນ ລວມທັງຜູ້ເດີນທາງ ຜ່ານຊາຍແດນ ເຂົ້າມາໃໝ່ ເພື່ອມາກວດວິເຄາະ ຢັ້ງຢືນພະຍາດໃຫ້ໄດ້ໄວ ແລະ ປິ່ນປົວຢ່າງທັນການ.
ຂ່າວ: ກິດຕາ
ພາບ: ໄອຄຳ
KPL
