ຂປລ
ຊຸດຝຶກອົບຮົມວຽກງານ ການນໍາໃຊ້ລະບົບຖານຂໍ້ມູນ ການບໍລິຫານການເງິນພາກລັດ (ໂປຣແກຣມບັນຊີ) ໃຫ້ແກ່ຜູ້ຮັບຜິດຊອບວຽກ ງານການເງິນຂອງບັນດາກົມ, ທຽບເທົ່າກົມພາຍໃນຄະນະໂຄສະນາອົບຮົມສູນກາງພັກ ຈັດຂຶ້ນໃນວັນທີ 2-4 ມີນາ 2026 ຢູ່ຄະນະໂຄສະນາອົບຮົມສູນກາງພັກ.
ຂປລ. ໂດຍການເປັນປະທານ ຂອງ ທ່ານ ບຸນເພັງ ຈັນທະດາລາ ຫົວໜ້າ ຫ້ອງການຄະນະໂຄສະນາອົບຮົມ ສູນກາງພັກ, ມີຫົວໜ້າພະແນກ, ຮອງພະແນກ ຜູ້ຮັບຜິດຊອບວຽກ ງານການເງິນ ຂອງບັນດາກົມ, ທຽບເທົ່າກົມ ແລະ ພາກສ່ວນກ່ຽວ ຂ້ອງເຂົ້າຮ່ວມ.
ທ່ານ ສົດ ວົງພະຈັນ ຫົວໜ້າພະແນການເງິນ ຫ້ອງການຄະນະໂຄສະນາອົບຮົມສູນກາງພັກ ໄດ້ຜ່ານບົດສະຫລຸບກ່ຽວກັບຜົນການຝຶກອົບຮົມການນໍາໃຊ້ລະບົບຖານຂໍ້ມູນການບໍລິຫານການເງິນພາກລັດໃນຄັ້ງນີ້. ຜ່ານການຝຶກອົບຮົມເຮັດໃຫ້ສໍາມະນາກອນມີຄວາມຮັບຮູ້ ແລະ ເຂົ້າໃຈກ່ຽວກັບລະບົບການບໍລິຫານການເງິນພາກລັດ, ກໍາແໜ້ນຂັ້ນຕອນການປ້ອນຂໍ້ມູນ, ການນຳໃຊ້ເຄື່ອງມື ແລະ ແບບຟອມຕ່າງໆໃນລະບົບໃຫ້ຖືກຕ້ອງຕາມເຕັກນິກວິຊາສະເພາະຂອງການເຄື່ອນໄຫວບັນຊີ, ຮູ້ຈັກວິທີການຕິດຕາມ, ກວດກາຄວາມ ຖືກຕ້ອງຂອງການເຄື່ອນໄຫວ ແລະ ການສະຫລຸບລາຍງານລາຍຮັບ- ລາຍຈ່າຍງົບປະມານ ໃຫ້ມີຄວາມ ຊັດເຈນ, ສາມາດສ້າງເອກະສານ ລາຍງານ ການເງິນ ແລະ ສະຫລຸບ ຕົວເລກຜົນການຈັດຕັ້ງປະຕິບັດ ໃຫ້ມີຄວາມວ່ອງໄວ, ຖືກຕ້ອງ ແລະ ທັນຕາມກຳນົດເວລາ. ພ້ອມນັ້ນ, ສໍາມະນາກອນຍັງໄດ້ມີການແລກປ່ຽນຄໍາຄິດຄໍາເຫັນຕໍ່ບັນຫາທີ່ມີຄວາມສົນໃຈ ດ້ວຍຄວາມຮັບຜິດຊອບສູງ ແລະ ເຕັມໄປດ້ວຍເນື້ອໃນຄົບຖ້ວນ.
ໃນໂອກາດນີ້, ທ່ານ ບຸນເພັງ ຈັນທະດາລາກໍໄດ້ມີຄໍາເຫັນວ່າ: ການຫັນເປັນທັນສະໄໝ ດ້ວຍການນໍາໃຊ້ລະບົບຖານຂໍ້ມູນການບໍລິຫານການເງິນພາກລັດ (ໂປຣແກຣມບັນຊີ) ແມ່ນມີຄວາມສໍາຄັນ ແລະ ຈຳເປັນຮີບດ່ວນໃນເງື່ອນໄຂປັດຈຸບັນເພື່ອເຮັດໃຫ້ການຄຸ້ມຄອງບໍລິຫານລັດ ກ້າວໄປສູ່ລະບົບທີ່ທັນສະໄໝໃນການລວມສູນຂໍ້ມູນພາກລັດ ເພື່ອຍົກລະດັບປະສິດທິພາບໃນການບໍລິຫານ ແລະ ການຄຸ້ມຄອງງົບປະມານລັດໃຫ້ມີຄວາມສະດວກ, ວ່ອງໄວ, ພ້ອມທັງເນັ້ນໃຫ້ສໍາມະນາກອນຜູ້ຮັບຜິດຊອບວຽກງານບັນຊີ-ການ ເງິນຂອງບັນດາກົມ, ທຽບເທົ່າກົມພາຍໃນ ຄອສພ ຈົ່ງພ້ອມກັນນຳເອົາບົດຮຽນທິດສະດີ ແລະ ພຶດຕິກໍາຕົວຈິງ ທ່ີໄດ້ຝຶກອົບຮົມໃນຄ້ັງນີ້ໄປຈັດຕັ້ງຜັນຂະຫຍາຍ ແລະ ໝູນໃຊ້ເຂົ້າໃນໜ້າທີ່ວຽກງານໃນຂອບເຂດທີ່ຕົນເອງຮັບຜິດຊອບ ໃຫ້ສອດຄ່ອງກັບສະພາບ ແລະ ຄວາມຮຽກຮ້ອງຕ້ອງການຂອງວຽກງານຕົວຈິງ.
ຂ່າວ-ພາບ: ພະແນກການເງິນຫ້ອງການ ຄອສພ
KPL
