ຂປລ
ກະຊວງອຸດສາຫະກຳ ແລະ ການຄ້າໄດ້ອອກແຈ້ງການເຖິງຫົວໜ້າພະແນກອຸດສາຫະກຳ ແລະ ການຄ້າແຂວງ/ນະຄອນຫລວງ, ປະທານສະມາຄົມນໍ້າມັນເຊ້ືອໄຟ ແລະ ອາຍແກັດລາວ, ຜູ້ອຳນວຍການບໍລິສັດນຳເຂ້ົາ ແລະ ສົ່ງອອກນໍ້າມັນເຊື້ອໄຟ, ຜູ້ອຳນວຍການບໍລິສັດຈໍາໜ່າຍນໍ້າມັນເຊື້ອໄຟພາຍໃນ, ປໍ້ານໍ້າມັນເຊື້ອໄຟກ່ຽວກັບການສະໜອງນໍ້າມັນເຊື້ອໄຟໃນໄລຍະທີ່ເກີດຄວາມບໍ່ສະຫງົບ ໃນພາກພື້ນຕາເວັນອອກກາງ.
ຂປລ. ແຈ້ງການດັ່ງກ່າວໄດ້ລະບຸວ່າ: ບໍລິສັດນຳເຂົ້າ-ສົ່ງອອກນໍ້າມັນເຊື້ອ ໄຟ ແລະ ບໍລິສັດຈໍາໜ່າຍພາຍໃນ ຕ້ອງລາຍງານແຜນການນຳເຂົ້າ- ການສະໜອງນໍ້າມັນເຊື້ອໄຟປະ ຈໍາວັນສົ່ງໃຫ້ກົມການຄ້າພາຍໃນ ກ່ອນເວລາ 16:00 ໂມງຂອງທຸກໆວັນ; ບໍລິສັດນຳເຂ້ົາ-ສ່ົງອອກ ແລະ ບໍລິສັດຈໍາໜ່າຍນ້ໍາມັນເຊ້ືອໄຟພາຍໃນປະເທດ ຕ້ອງຮັບປະກັນການສະໜອງນໍ້າມັນເຊື້ອໄຟ ໂດຍຕ້ອງໃຫ້ບຸລິມະສິດການສະໜອງໃຫ້ປ້ຳບໍລິສັດລົງທຶນ ແລະ ປໍ້າຕົວແທນກ່ອນ ເພື່ອຮັບໃຊ້ສັງຄົມຢ່າງປົກກະຕິ; ບໍລິສັດຕ້ອງເປັນເຈົ້າການ ຄຸ້ມຄອງປໍ້າບໍລິສັດລົງທຶນ ແລະ ປໍ້າ ຕົວແທນບໍ່ໃຫ້ຂາຍນໍ້າມັນເຊື້ອໄຟ ໃສ່ກະຕຸກ ຫລື ຖັງບັນຈຸທຸກປະເພດ ໃນຂະໜາດບໍລິມາດ 5 ລິດຂຶ້ນໄປ ເດັດຂາດ ແລະ ເປີດບໍລິການເປັນ ປົກກະຕິ ກໍລະນີປິດ ຫລື ຢຸດໃຫ້ ບໍລິການຊົ່ວຄາວ ຕ້ອງແຈ້ງເຫດຜົນໃຫ້ຫ້ອງການອຸດສາຫະກຳ ແລະ ການຄ້າເມືອງ, ນະຄອນບ່ອນທີ່ປໍ້າຕັ້ງຢູ່ຕ້ອງຕິດປ້າຍໃຫ້ຜູ້ຊົມໃຊ້ຊາບກ່ອນ 3 ວັນ; ການສະໜອງນໍ້າມັນເຊື້ອໄຟໃຫ້ບັນດາໂຄງການ, ບໍລິສັດຕ້ອງສະໜອງຂ້ໍມູນສັນຍາຊື້-ຂາຍໃຫ້ກົມການຄ້າພາຍໃນ, ກະຊວງ ອຸດສາຫະກຳ ແລະ ການຄ້າ ຊາບກ່ອນເພື່ອຕິດຕາມກວດກາ.
ຫ້າມກັກຕຸນນໍ້າມັນເຊື້ອໄຟ ເພື່ອເກັງກຳໄລ ຫລື ປັ່ນປ່ວນຕະຫລາດ ຫລື ປະຕິເສດການສະໜອງນໍ້າມັນເຊື້ອໄຟ ໂດຍບໍ່ມີເຫດຜົນ, ຫາກກວດພົບຈະຖືກປັບໃໝມາດຕະການຢ່າງເຂັ້ມງວດກໍລະນີປະຕິເສດການສະໜອງ; ຫາກພົບເຫັນການ ສະໜອງນໍ້າມັນເຊື້ອໄຟໃຫ້ແກ່ປໍ້ານໍ້າມັນເຊື້ອໄຟທີ່ບໍ່ແມ່ນປ້ໍາຕົວແທນ ແລະ ບໍລິສັດ/ໂຄງການໂດຍບໍ່ໄດ້ຮັບອະນຸຍາດ, ການກັກຕຸນນ້ໍາມັນເຊ້ືອໄຟເພື່ອເກັງກຳໄລ ຫລື ປັ່ນປ່ວນຕະຫລາດ, ປິດປໍ້າຊົ່ວຄາວ ຫລື ປິດຖາວອນ ໂດຍບໍ່ມີເຫດຜົນ ແລະ ພຶດຕິກໍາອື່ນໆທີ່ລະເມີດຂໍ້ຫ້າມຕາມດຳລັດ 559/ລບ ແມ່ນໃຫ້ປະຕິບັດຕາມລະບຽບການຢ່າງເຂັ້ມງວດ; ມອບໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫລວງ, ຫ້ອງການອຸດສາຫະກຳ ແລະ ການຄ້າເມືອງ/ນະຄອນເປັນເຈົ້າການໃນການຕິດຕາມ ແລະ ກວດກາການຈັດຕັ້ງປະຕິບັດແຈ້ງການສະບັບນ້ີຢ່າງເຂັ້ມງວດ.
KPL
