ຂປລ.  ໂດຍການເປັນປະທານ ຂອງ ທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີຄະນະບໍລິຫານງານສະຫະພັນແມ່ຍິງລາວ, ສະມາຊິກສະຫະພັນແມ່ຍິງລາວ, ຜູ້ຕາງໜ້າຈາກອົງການຈັດຕັ້ງສາກົນເຂົ້າຮ່ວມ. ໃນໂອກາດນີ້, ທ່ານ ນາງ ອາລີ ວົງໜໍ່ບຸນທໍາ ໄດ້ຫວນຄືນປະຫວັດວັນແມ່ຍິງສາກົນ ໂດຍສະເພາະການຕໍ່ສູ້ຂອງກຳມະກອນແມ່ຍິງທີ່ຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫລາຍຊົ່ວໂມງ ແຕ່ໄດ້ຮັບຄ່າຈ້າງແຮງງານລາຄາຖືກ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ ຕໍ່ສະພາບດັ່ງກ່າວ, ກຳມະກອນແມ່ຍິງ ຈຶ່ງໄດ້ສາມັກຄີກັນລຸກຂຶ້ນຕໍ່ສູ້, ໂຮມຊຸມນຸມປະທ້ວງ. ວັນທີ 8 ມີນາ ຈຶ່ງເປັນຂີດໝາຍແຫ່ງໄຊຊະນະພື້ນຖານ ຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາຈົນມາເຖິງປັດຈຸບັນ, ສະເພາະ ສປປ ລາວ ພັກ ແລະ ລັດຖະບານລາວ ໄດ້ກຳນົດແນວທາງນະໂຍບາຍຕໍ່ການພັດທະນາ, ການປົກປ້ອງສິດຜົນປະໂຫຍດຂອງແມ່ຍິງ, ການສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍ ຢູ່ໃນລັດຖະທຳມະນູນ ແລະ ກົດໝາຍຫລາຍສະບັບ; ໄດ້ສ້າງຕັ້ງບັນດາກົນໄກ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ ເຊັ່ນ: ສະຫະພັນແມ່ຍິງລາວ, ຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ  ແລະ  ແມ່-ເດັກ ແລະ ຄະນະສະມາຊິກສະພາແຫ່ງຊາດເພດຍິງ. 

     ໃນແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030)   ໄດ້ກຳນົດໃນເປົ້າໝາຍວຽກຈຸດສຸມ ເຊັ່ນ: ສູ້ຊົນເຮັດໃຫ້ຄ່າດັດສະນີຄວາມບໍ່ສະເໝີພາບຍິງ-ຊາຍ ຫລຸດລົງຈາກ 0,467 ໃນ ປີ 2024 ເປັນ 0,436 ໃນປີ 2030, ດັດສະນີການພັດທະນາຄວາມສະເໝີພາບຍິງ-ຊາຍໃຫ້ເພີ່ມຂຶ້ນຈາກ 0,919 ໃນປີ 2024 ມາເປັນ 0,927 ໃນປີ 2030; ຊຸກຍູ້ສ້າງເງື່ອນໄຂໃຫ້ແມ່ຍິງເປັນ ສສຊ- ສສຂ ກວມ 30% ຂຶ້ນໄປ, ເປັນການນໍາຂັ້ນສູນກາງກວມ 30% ຂຶ້ນໄປ, ເປັນການນໍາຂັ້ນແຂວງກວມ 20% ຂຶ້ນໄປ, ເປັນການນໍາຂັ້ນຕາແສງ, ບ້ານກວມ 10%.  ເຫັນວ່າເປັນຄາດໝາຍສູ້ຊົນທີ່ສູງຫລາຍສໍາລັບເອື້ອຍນ້ອງແມ່ຍິງພວກເຮົາທີ່ຈະຕ້ອງພ້ອມກັນສູ້ຊົນບຸກບືນໃຫ້ບັນລຸຕົວເລກຄາດໝາຍທີ່ວາງໄວ້ ເພື່ອບັນລຸເປົ້າໝາຍດັ່ງກ່າວ ກໍບໍ່ອາດປາສະຈາກໄດ້ການໃຫ້ຄວາມຊ່ວຍເຫລືອ, ຊຸກຍູ້ຈາກທຸກພາກສ່ວນໃນສັງຄົມທັງພາກລັດ, ອົງການຈັດຕັ້ງສາກົນ ແລະ ບັນດາຄູ່ຮ່ວມພັດທະນາ, ການສົ່ງເສີມແມ່ຍິງໃຫ້ມີບົດບາດໃນການນໍາພາ ແມ່ນສໍາຄັນຫລາຍຕໍ່ການຊຸກຍູ້ຂະບວນການພັດທະນາໃນປະເທດ ກໍຄືທົ່ວໂລກ. ດັ່ງນັ້ນ, ບັນຫາຂອງແມ່ຍິງຈຶ່ງຖືກກໍານົດໃນເປົ້າໝາຍສະຫັດສະວັດດ້ານການພັດທະນາ ຫລື SDG ໃນເປົ້າໝາຍທີ 5 ບັນລຸຄວາມສະເໝີພາບລະຫວ່າງຍິງ- ຊາຍ ແລະ ສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ໄວໜຸ່ມຍິງ.

    ປີ 2025 ຜ່ານມາ, ສະຫະພັນແມ່ຍິງລາວໄດ້ເຄື່ອນໄຫວຕາມແຜນງານ, ໂຄງການຂອງຕົນຕິດພັນກັບຂະບວນການລວມຂອງພັກ, ຂອງລັດ, ຂອງຊາດ ແລະ ສາກົນ, ໄດ້ເພີ່ມທະວີ ແລະ ເສີມຂະຫຍາຍສາຍພົວພັນຢ່າງຕັ້ງໜ້າຮ່ວມກັບແມ່ຍິງໃນຂອບສອງຝ່າຍ, ຂົງເຂດອາຊຽນ ແລະ ພົວພັນອົງການຈັດຕັ້ງສາກົນ ໃນການແລກປ່ຽນບົດຮຽນ ໂດຍສະເພາະວຽກງານທ່ີຕິດພັນກັບການພັດທະນາ, ການປົກປ້ອງສິດ ແລະ ຜົນປະໂຫຍດອັນຊອບທໍາຂອງແມ່ຍິງ-ເດັກນ້ອຍ, ການສົ່ງເສີມບົດບາດຍິງ-ຊາຍ, ການສ້າງຄວາມເຂັ້ມແຂງໃຫ້ແກ່ແມ່ຍິງມີຜົນສໍາເລັດເປັນຕົ້ນ.

ຂ່າວ: ກິດຕາ;  ພາບ: ເກດສະໜາ

KPL