ຂປລ. ຝ່າຍພະສົງນໍາໂດຍ ຍາທ່ານໃຫຍ່ ມະຫາຄໍາມາ ປັນຍາວິຈິດ ຮອງປະທານສູນກາງອົງການພຸດທະສາສະໜາສໍາພັນລາວ (ອພສ), ພະອາຈານ ວັນເພັນ ໄຊຍະສອນ ປະທານອົງການພຸດທະສາສະໜາສໍາພັນລາວແຂວງຄໍາມ່ວນ, ຝ່າຍຄາລະວາດນໍາໂດຍ ທ່ານນາງ ປານີ ຢາທໍ່ຕູ້ ຮອງປະທານປະເທດ, ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ, ທ່ານ ໄຊຊະນະ ໂຄດພູທອນ ກໍາມະການສູນກາງພັກ, ເລຂາພັກແຂວງ, ມີບັນດາອະດີດການນໍາຂັ້ນສູນກາງ, ອະດີດການນໍາຂັ້ນແຂວງ, ປະທານ ຄະນະກໍາມະການຈັດງານ, ຕະຫລອດເຖິງພຸດທະສາສະນິກະຊົເຂົ້າຮ່ວມເປັນຈໍານວນຫລາຍ.

     ກ່ອນເຂົ້າສູ່ພິທີທາງສາສະໜາ, ຄະນະກໍາມະການຈັດງານບຸນປີ 2026 ໄດ້ມອບຮູບຈໍາລອງອົງພະສີໂຄດຕະບອງ, ຮູບຫລຽນພະຍາສີໂຄດຕະບອງ, ຫລຽນພະເຈົ້າໃຫຍ່ສີໂຄດ ໃຫ້ກຽດມອບຂອງທີ່ລະນຶກແກ່ຄະນະການນໍາຂັ້ນສູນກາງ, ຂັ້ນແຂວງ, ບັນດາເມືອງ, ບໍລິສັດຫ້າງຮ້ານ, ຜູ້ໃຫ້ການອຸປະຖໍາຕະຫລອດ ພໍ່ແມ່ປະຊາຊົນຜູ້ທີ່ມາຮ່ວມໃນງານບຸນຄັ້ງນີ້.

    ຈາກນັ້ນ, ທ່ານ ໄຊຊະນະ ໂຄດພູທອນ ກໍໄດ້ໄຕ້ທຽນໄຊຖວາຍຄຸນພະຣັດຕະນະໄຕຣ ເພື່ອໄຫວ້ພະຮັບສິນ, ໃສ່ບາດ, ຢາດນໍ້າ ແລະ ຖວາຍປັດໄຈໄຊຍະທານຕາມສັດທາຂອງໃຜລາວ.  ພ້ອມນີ້, ພາຍໃນງານຍັງໄດ້ມີການຮັບປັດໄຈ ແລະ ເຄ່ືອງໄຊຍະທານຕ່າງໆເພື່ອມາປະຕິສັງຂອນພື້ນຖານໂຄງລ່າງພາຍໃນວັດພະທາດສີໂຄດຕະບອງ ແລະ ເປັນການຄໍ້າຊູພຸດທະສາສະໜາໃຫ້ຄົງຢູ່ຄູ່ກັບພຸດທະສາສະນິກະຊົນຕະຫລອດໄປ.    ສ່ວນໃນຕອນບ່າຍຈະໄດ້ມີການຮັບຊົມການແຂ່ງຂັນກິລາບານສົ່ງຍິງ-ຊາຍ ແລະ ກະຕໍ້ຊາຍປະເພດທີມທົ່ວໄປ ແລະ ທີມອາວຸໂສຮອບຊີງຊະນະເລີດ. ໃນນັ້ນ, ກິລາບານສົ່ງຍິງ-ຊາຍ ຈະໄດ້ເລີ່ມການແຂ່ງຂັນ ໃນເວລາ 14:00 ໂມງ ເປັນຕົ້ນໄປ ຊຶ່ງທີມບານສົ່ງຍິງເປັນການພົບກັນລະຫວ່າງ ຮ້ານລ້າງລົດ ບິວບິວ ແລະ ໂຮງຮຽນມິດຕະພາບຄໍາມ່ວນ-ກວາງບິ່ງ; ທີມບານສົ່ງຊາຍເປັນການພົບກັນລະຫວ່າງຮ້ານ ລ້າງລົດ ບິວບິວ ແລະ ໄວລຸ້ນຂົວ 3. ປະເພດກິລາກະຕໍ້ຊາຍທີມອາວຸໂສ ແລະ ທີມທົ່ວໄປແມ່ນເລີ່ມແຂ່ງຂັນໃນເວລາ 15:00 ໂມງເປັນຕົ້ນໄປ, ກິລາກະຕໍ້ຊາຍທີມອາວຸໂສເປັນການພົບກັນລະຫວ່າງທີມທະວັດໄຊ ແລະ ທີມຮ້ານອາຫານນາງຈອນ, ກະຕໍ້ຊາຍປະເພດທີມທົ່ວໄປເປັນການພົບກັນລະຫວ່າງທີມບ້ານ ມ່ວງສຸມ ແລະ ທີມມີໄຊ ຂົນສົ່ງ. 

    ໃນຕອນຄໍ່າ ເວລາ 20:00 ໂມງ ຈະໄດ້ມີການວຽນທຽນອ້ອມຮອບພຸດທະສິມມາ ແລະ ອົງພະທາດ, ພ້ອມທັງຮັບຊົມກິດຈະກໍາຕ່າງໆພາຍໃນງານ ແລະ ໃນຕອນເຊົ້າຂອງວັນທີ 3 ກຸມພາ 2026 ກົງກັບມ້ືແຮມ 1 ຄໍ່າ ເດືອນ 3 ລາວ ພສ 2568 ຈະໄດ້ມີພິທີໃສ່ບາດຢູ່ບໍລິເວນຕີນຂອງພະທາດ ແລະ ຖວາຍ ພັດຕະຫານ-ປັດໄຈໄຊຍະທານແດ່ພະສົງ ເປັນອັນສໍາເລັດງານບຸນປີ 2026. 

ຂ່າວ-ພາບ: ແດງສະຫວັດ ແສນ ພານິດ

KPL