ວັນ​ທີ 28 ຕຸ​ລານີ້ CMGໄດ້​ປະ​ກາດ “ຂໍ້​ສະ​ເໜີ​ຂອງ​ສູນ​ກາງ​ ພັກ​ກອມ​ມູ​ນິດ​ຈີນ ກ່ຽວ​ກັບ ​ກາ​ນ​ວາງ​ແຜ​ນ​ ພັດ​ທະ​ນາ​ເສດ​ຖະ​ກິດ-​ສັງ​ຄົ​ມ ​ແຫ່ງ​ຊາດ 5 ປີ ​ຄັ້ງ​ທີ XV” ສະ​ບັບ​ພາ​ສາ​ລາວ. ກອງ​ປະ​ຊຸມ​ຄົບ​ຄະ​ນະ​ ຄັ້ງ​ທີ 4 ຂອງ ຄະ​ນະ​ກຳ​ມະ​ການ​ສູນ​ກາງ​ ພັກ​ຄອມ​ມູ​ນິດ​ຈີນ ​ສະ​ໄໝ​ທີ XX ໄດ້​ວິ​ເຄາະ​​ສະ​ພາບ​ການ​ທັງ​ພາຍ​ໃນ ​ແລະ​ ຕ່າງປະ​ເທດຢ່າງ​ເລິກ​ເຊິ່ງ ແລະ ສະ​ເໜີ​ຂໍ້​ສະ​ເໜີ​ ກ່ຽວ​ກັບ​ການ​ວາງແຜ​ນ​ ພັດ​ທະ​ນາ​ເສດ​ຖະ​ກິດ​-ສັງຄົ​ມແຫ່ງ​ຊາດ 5 ປີ ​ຄັ້ງ​ທີ XV .

“ຂໍ້​ສະ​ເໜີ​” ​​ໄດ້​ແບ່ງ​ອອກ​ເປັນ 15 ພາກ ໂດຍ​ມີ ​ເນື້ອ​ໃນກວມ​ເອົາ 3 ດ້ານຄື:ເນື້ອ​ໃນ​ດ້ານ​ທີ 1: ເປັນ​ຂໍ້​ບັນ​ຍາຍ​ ໂດຍປະ​ກອບ​ມີ​ພາກທີ 1 ແລະ ພາກ​ທີ 2, 3 ເຊິ່ງ​ຕົ້ນ​ຕໍ​ແມ່ນ​ ໄດ້​ບັນ​ຍາຍ​​ກ່ຽວ​ກັບ​ເນື້ອ​ໃນ​ຕ່າງໆ ເຊັ່ນ: ຜົນ​​ງ​ານ​ອັນ​ສຳ​ຄັນ​ເປັນ​ຢ່າງ​ຍິ່ງ ໃນ​ການ​ພັດ​ທະ​ນາ​​ປະ​ເທດຈີນ ​ໃນ​ໄລ​ຍະ “ແຜນ​ພັດ​ທະ​ນາ 5 ປີ​ ຄັ້ງ​ທີ XIV”,

ຖາ​ນະ​​ບົດ​ບາດສຳ​ຄັນ ​ທີ່​ເປັນການ​ສືບ​ທອດ​ອັນ​ເກົ່າ ແລະ ບຸກ​ເບີກ​ໄປ​ສູ່​ອັນ​ໃໝ່ ຂອງ​ໄລ​ຍະ “​ແຜນ​ພັດ​ທະ​ນາ 5 ປີ​ ຄັ້ງ​ທີ XV” ​ໃນ​ຂະ​ບວນ​ການ ​ບັນ​ລຸ​ສັງ​ຄົມ​ນິ​ຍົມ​ທັນ​ສະ​ໄໝໂດຍ​ພື້ນ​ຖານ, ການ​ປ່ຽນ​ແປງທີ່​ເລິກ​ເຊິ່ງ ແລະ​ ສັບ​ສົນ​ໃນ​ສະ​ພາບ​ແວດ​ລ້ອມ​ ການ​ພັ​ດ​ທະ​ນາ​ຂອງ​ຈີນ ​ທີ່​ຈະ​ຜະ​ເຊີນ​ໃນ​ໄລ​ຍະ “​ແຜນ​ພັດ​ທະ​ນາ 5 ປີ​ ຄັ້ງ​ທີ XV”, ​ແນວ​ຄິດ​ຊີ້​ນຳ, ຫຼັກ​ການ ແລະ ເປົ້າ​ໝາຍ​ຕົ້ນ​ຕໍ ​ແຫ່ງການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ໃນ​ໄລ​ຍະ 5 ປີ​ຕໍ່​ໜ້າ.

 ເນື້ອ​ໃນ​ດ້ານ​ທີ 2 ມີ 12 ພາກ ຄື: ​ພາກ​ທີ 2 ຫາ ​ພາກ​ທີ 14 ເປັນ​ຂໍ້​ບັນ​ຍາຍ​ຍ່ອຍ ເຊິ່ງ​ຕົ້ນ​ຕໍ​ໄດ້​​ສຸມ​ໃສ່​ບັນ​ຫາ​ສຳ​ຄັນ​ທີ່​ພົວ​ພັນ​ເຖິງ​ ສະ​ພາບ​ການ​ລວມ​ເປັນ​ໄລ​ຍະ​ຍາວ, ຈັດ​ວາງ​ໜ້າ​ທີ່​ຍຸດ​ທະ​ສາດ ແລະ ມາດ​ຕະ​ການ​ອັນ​ສຳ​ຄັນ​ຍິ່ງ ​ໃນ​ໄລ​ຍະ​ “ແຜນ​ພັດ​ທະ​ນາ 5 ປີ ​ຄັ້ງ​ທີ XV” ຕາມ​ຂົງ​ເຂດ, ກຳ​ນົດ​ແນວຄວາມ​ຄິດ ແລະ ວຽກ​ງານ​ຈຸດ​ສຸມ​ໃນ​ຂົງ​ເຂດ​ຕ່າງໆ ເຊັ່ນ: ການ​ພັດ​ທະ​ນາ​ອຸດ​ສາ​ຫະ​ກຳ, ການ​ປະ​ດິດ​ສ້າງ​ໃໝ່​ດ້ານວິ​ທະ​ຍາ​ສາດ​ເຕັກ​ໂນ​ໂລ​ຊີ, ຕະຫຼາດ​ພາຍ​ໃນ, ໂຄງ​ປະ​ກອບ​ເສດ​ຖະ​ກິດ, ການ​ເປີດ​ປະ​ຕູ​ສູ່​ພາຍ​ນອກ, ການ​ພັດ​ທະ​ນາ​ຊົນ​ນະ​ບົດ​ ໃຫ້​ຈະ​ເລີນ ແລະ ການ​ພັດ​ທະ​ນາ​ ຂອງ​ເຂດ​ແຄ້ວນ ຕະຫຼອດ​ຮອດການ​ສ້າງ​ສາ​ດ້ານ​ວັດ​ທະ​ນະ​ທຳ, ການ​ຮັບ​ປະ​ກັນ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ, ການ​ພັດ​ທະ​ນາ​ຕາມ​ທິດ​ສີ​ຂຽວ, ການ​ພັດ​ທະ​ນາ​ຢ່າງ​ມີ​ຄວາມ​ໝັ້ນ​ຄົງ, ການສ້າງ​ສາ​ດ້ານ​ການ​ປ້ອງ​ກັນ​ປະ​ເທດ​ ແລະ ​ອື່ນໆ.

ເນື້ອ​ໃນ​ດ້ານ​ທີ 3 ແມ່ນ​ພາກ​ທີ 15 ແລະ ບົດ​ບັນ​ຍັດ​ສຸດ​ທ້າຍ ເຊິ່ງ​ຕົ້ນ​ຕໍ​​ ໄດ້​ຈັດ​ວາງ​ໜ້າ​ທີ່​ຕ່າງໆ ເຊັ່ນ​: ການ​ຍຶດ​ໝັ້ນ ແລະ ເພີ່ມ​ທະ​ວີ​ການ​ນຳ​ພາ ​ແບບລວມ​ສູນ​ເປັນ​ເອ​ກະ​ພາບ​ ຂອງ​​ສູນ​ກາງພັກ, ຊຸກ​ຍູ້​ການ​ສ້າ​ງ​​ສາປະ​ຊາ​ທິ​ປະ​ໄຕ ແລະ ​ການປົກ​ຄອງ​ຕາມ​ກົດ​ໝາຍ​ ສັງ​ຄົມ​ນິ​ຍົມ, ວຽກ​ງານ​ຮົງ​ກົງ, ມາເກົາ ແລະ ໄຕ້​ຫວັນ, ຊຸກ​ຍູ້​ການ​ສ້າງ​ປະ​ຊາ​ຄົມ ​ຮ່ວມ​ຊາ​ຕາ​ກຳ​ຂອງ ມວນ​ມະ​ນຸດ ແລະ ປຸກ​ລະ​ດົມ​ຄວາມ​ຫ້າວ​ຫັນ, ຄວາມ​ເປັນ​ເຈົ້າ​ການ,  ​ຫົວ​ຄິດ​ປະ​ດິດ​ສ້າງ​ ຂອງ​ທົ່ວ​ສັງ​ຄົມ​ ຢ່າງ​ເຕັມ​ທີ່ ແລະ ອື່ນໆ.

KPL