ຂປລ
ໃນ 3 ໄຕມາດ ຜ່ານມາຂອງປີນີ້, ຍອດມູນຄ່າ ການຄ້ານຳເຂົ້າ ແລະ ສົ່ງອອກ ລະຫວ່າງ ສປ ຈີນ-ອາຊຽນ ບັນລຸ 5.570 ຕື້ຢວນ, ເພີ່ມຂຶ້ນ 9,6% ເມື່ອທຽບໃສ່ ໄລຍະດຽວກັນ ຂອງປີກາຍ
ຂປລ.ວິທະຍຸ-ໂທລະພາບ ສູນກາງຈີນ, ຫ້ອງການ ຖະແຫລງຂ່າວ ຂອງລັດຖະບານຈີນ ໄດ້ຈັດກອງປະຊຸມ ຖະແຫລງຂ່າວ ເມື່ອບໍ່ດົນມານີ້ ໂດຍລາຍງານ ສະພາບ ການຄ້າ ນຳເຂົ້າ ແລະ ສົ່ງອອກໃນ 3 ໄຕມາດປີ 2025 ວ່າ: ໃນ 3 ໄຕມາດ ຜ່ານມາຂອງປີນີ້, ຍອດມູນຄ່າ ການຄ້ານຳເຂົ້າ ແລະ ສົ່ງອອກ ລະຫວ່າງ ສປ ຈີນ-ອາຊຽນ ບັນລຸ 5.570 ຕື້ຢວນ, ເພີ່ມຂຶ້ນ 9,6% ເມື່ອທຽບໃສ່ ໄລຍະດຽວກັນ ຂອງປີກາຍ, ກວມ 16,6% ໃນຍອດມູນຄ່າ ການຄ້າກັບ ຕ່າງປະເທດຂອງ ສປ ຈີນ, ອາຊຽນ ຍັງຄົງສືບຕໍ່ ເປັນຄູ່ການຄ້າໃຫຍ່ ອັນດັບໜຶ່ງຂອງ ສປ ຈີນ. ອາຊຽນ ໄດ້ເປັນຄູ່ການຄ້າ ດ້ານກະສິກຳໃຫຍ່ທີ່ສຸດຂອງ ສປ ຈີນ ໃນ 8 ປີລຽນຕິດ. ໃນ 3 ໄຕມາດຜ່ານມາປີນີ້ ເຫັນວ່າ ສະເພາະມູນຄ່າ ສິນຄ້າ ກະສິກຳ ທີ່ ສປ ຈີນ ນຳເຂົ້າຈາກ ອາຊຽນ ນັ້ນໄດ້ເພີ່ມຂຶ້ນ 15,3%, ມູນຄ່າສິນຄ້າ ເຄື່ອງກົນຈັກ ແລະ ວັດຖຸດິບ ແຜ່ນແພທີ່ ສປ ຈີນ ສົ່ງອອກໄປ ອາຊຽນ ຕ່າງໄດ້ເພີ່ມຂຶ້ນ 28,2% ແລະ 13,4%, ເຄື່ອງນຸ່ງທີ່ ສປ ຈີນ ນຳເຂົ້າຈາກ ອາຊຽນ ກໍ່ເພີ່ມຂຶ້ນ 9,3%. ສິນຄ້ານຳເຂົ້າ ແລະ ສົ່ງອອກໄປ ອາຊຽນ ເຫລົ່ານັ້ນ ຂົນສົ່ງ ຜ່ານທາງບົກ ໄດ້ເພີ່ມຂຶ້ນ 21%, ພ້ອມດຽວກັນນີ້ ຍັງຂົນສົ່ງ ຜ່ານທາງນ້ຳ ແລະ ທາງອາກາດ ກໍ່ໄດ້ມີການເພີ່ມຂຶ້ນ ຢ່າງວ່ອງໄວ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
